ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ވެރިކަން ދަމަހައްޓަން ރައްޔިތުން ބޭނުންވާ ކަމަށާއި، އެމަނިކުފާނު މިއަދު ވެރިކަމުގައި އެ ހުންނަވަނީ ރައްޔިތުންގެ ލޯތްބާއި އިތުބާރު ހޯއްދަވައިގެން ކަމަށް ރައްޔިތުންގެ މަޖިލީހުގެ އިހަވަންދޫ ދާއިރާގެ މެންބަރު މުހައްމަދު ޝިފާއު ވިދާޅުވެއްޖެ އެވެ.
ޝިފާއު މިފަދައިން ވިދާޅުވީ ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ ހަވަން ޖަލްސާގައި ވާހަކަދައްކަވަމުން ނެވެ.
ޝިފާއު ވިދާޅުވީ ރައީސް ޞާލިހު ވެރިކަމުގައި ހުންނަވާ ދިވެހިރާއްޖެއިން ޒައްރެއްގެ މިންވަރުވެސް ގެއްލިގެން ދާނެފަދަ ކަމެއް އެމަނިކުފާނު ނުކުރަވާނެކަން ރައްޔިތުން ޔަގީންކުރާ ކަމަށެވެ. އަދި އެމަނިކުފާނަކީ ޚިޔާނާތްތެރިވާނެ ދައުލަތުން ވައްކަންކޮށް ރައްޔިތުންނަށް އަނިޔާވެރިވާނެ ވެރިއެއްކަމަށް ރައްޔިތުން ޤަބޫލު ނުކުރާނެ ކަމަށް އޭނާ ވިދާޅުވި އެވެ.
"ޔަގީންކުރޭ މި ދިވެހިރާއްޖޭގެ ރައްޔިތަކަށް މި ދިވެހިރާއްޖޭގެ މިނިވަންކަމަށް މި ދިވެހިރާއްޖޭގެ ވައި، ކަނޑު، ބިމުން ވެސް ކުޑަ ކުޑަ ޒައްރެއްގެ މިންވަރުވެސް ބީވެގެންދިޔަ މި ރައީސުލްޖުމްހޫރިއްޔާ ނުދެއްވާނެކަން"
މެމްބަރު މުޙައްމަދު ޝިފާއު
ޝިފާއު ވިދާޅުވީ ވޭތުވެ ދިޔަ 100 އަހަރަށް ބަލާލިކަމުގައިވީ ނަމަވެސް އަމާންކަމާއި ސުލްހަ މަސަލަސްކަން ގާއިމްކުރުމަށް އެންމެ ބޮޑަށް ބާރުއަޅާ، އެމަގަށް އެންމެ ގިނަ މަސައްކަތްކުރި ސަރުކާރަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ސަރުކާރު ވެގެންދާނެ ކަމަށް ޝިފާއު ވިދާޅުވި އެވެ.
އެއާއެކު އޭނާ ވިދާޅުވީ ސަރުކާރާއި ދެކޮޅަށް މަސައްކަތް ކުރަނީ ވެރިކަން ބޭނުންވެގެން އުޅޭ ބައެއް ކަމަށެވެ.
އެހެން ނަމަވެސް ސަރުކާރާއި ދެކޮޅަށް ބަޔަކު މަސައްކަތް ކުރި ނަމަވެސް، ރައްޔިތުން ތިބީ ރައީސް ޞާލިހުގެ ވެރިކަން ބަދަލުކޮށް އެހެން ބަޔަކަށް ފުރުސަތު ދޭގޮތަށް ނޫންކަމަށް ޝިފާއު ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
