ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ އިސްތަށިފުޅުގައި ގައުމު ވިއްކާލައިފިކަމުގެ "ވަގު ތުހުމަތު" އަޅުވަނީ އެމަނިކުފާނަށް ފާޑުކިޔަން އިދިކޮޅު ފަރާތްތަކަށް ކިޔޭނެ އެއްވެސް އިތުރު އެއްޗެއް ނެތުމުންކަމަށް ރައްޔިތުންގ މަޖިލީހުގެ ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ ވިދާޅުވެއްޖެ އެވެ. 

ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ 7 ވަނަ ޖަލްސާގައި ވާހަކަދައްކަވަމުން ޣަފޫރު ވިދާޅުވީ ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހު ރާއްޖޭގެ ކަނޑުން ބައެއް ދޫކޮށްލެއްވިކަމަށް ވިދާޅުވެ ބައެއް ސިޔާސީ ލީޑަރުން ދައްކަވަމުން ދާ ވާހަކަތަކީ ކަނޑައެޅިގެން އެބޭފުޅުން ހައްދަވާ އިތުރުފުޅެއް ކަމަށެވެ. 

އަދި އެ މޭރުމުން އެބޭފުޅުން ވާހަކަދައްކަވަނީ، މި ވެރިކަމަށް ކިޔާނެ އިތުރު އެއްވެސް ފާޑެއް ނެތުމުންކަމަށް ޣަފޫރު ވިދާޅުވި އެވެ. 

ރައްޔިތުންގެ މަޖިލީހުގައި މިއަދު ތާވަލުކުރެވުނު ބަންޑާރަނައިބުގެ އިތުބާރު ނެތްކަމުގެ މައްސަލައަށް ޖަވާބުދާރީވުމުގެ ބައި މަޖިލީހުގެ ރައީސް މުޙައްމަދު ނަޝީދު މަޑުޖައްސާލި މަޑުޖައްސާލުމާއި ގުޅިގެން ވެސް ޣަފޫރު ވަނީ ނުރުހުން ފާޅުކުރައްވާފަ އެވެ. 

އެގޮތުން ޣަފޫރު ވިދާޅުވީ ރިޔާސަތުން މިހާރު ހަމައެކަނި އަޑުއަހަނީ މަޖިލީހުގައި ސަރުކާރާއި ދެކޮޅަށް މަސައްކަތް ކުރާ މެމްބަރުންގެ ވާހަކަތަކާއި، އެބޭފުޅުންގެ ޚިޔާލުތަކުގެ އަޑު އެކަނިކަމަށެވެ. 

އެގޮތުން ބަންޑާރަނައިބު ޖަވާބުދާރީވާން ޖެހޭގޮތާއި ގުޅިގެން، އަދި އެ މައްސަލަ ދެން ކުރިއަށް ގެންދާނެ ގޮތަކާއި ގުޅިގެން ސުޕްރިމް ކޯޓުގެ ލަފާފުޅެއް ހޯއްދަވަން ނަޝީދު ނިންމާފައިވާއިރު، އެމަނިކުފާނަށް އެ ނިންމުން ނިންމޭނީ މަޖިލީހުގައި އެކަމަށްޓަކައި ވޯޓަށް އަހައިގެންކަމަށް ޣަފޫރު ވިދާޅުވި އެވެ. 

އޭގެ އިތުރުން އޭނާ ވިދާޅުވީ، ބަންޑާރަ ނައިބު މަޖިލީހަށް ހާޒިރުވެވަޑައިގެން ޖަވާބުދާރީވުމަކީ އެމަނިކުފާނުގެ އިޚްތިޔާރީ ކަމެއް ކަމަށެވެ. އެ އިޚްތިޔާރު ބަންޑާރަނައިބު ބޭނުން ނުކުރެއްވުމަކީ އެ މައްސަލަ މަޑުޖައްސާލަން ޖެހޭ ސަބަބެއް ނޫން ކަމަށާއި، އެފަދައިން ރިޔާސަތުން އަމަލުކުރުމުން، އެއީ އޮއްޓަރެއް ނެތް މައްސަލަތަކެއްކަން ސާފުވެގެންދާކަމަށް ޣަފޫރު ވިދާޅުވި އެވެ.