އަންނަ ހުކުރު ދުވަހުގެ ރޭ ކާނިވާ ސަރަހައްދުގައި ކަނޑުވިއްކުމާ ދެކޮޅު އިއްތިހާދުން ބާއްވާ "ބާނަ ބާނަ ތިއްބާ ތިޔަ ވިއްކާލީ ކަނޑު" ޖަލްސާ ޕްރޮމޯޓް ކުރުމުގެ ހަރަކާތްތައް އަތޮޅުތެރޭގައި ވެސް ކުރިއަށްދާކަމަށް އެ އިއްތިހާދުން ބުނެފި އެވެ.

އިއްތިހާދުގެ ފަރާތުން ވާހަކަދެއްކެވި އިސް ބޭފުޅަކު ވިދާޅުވީ މިޖަލްސާ ޕްރޮމޯޓް ކުރުމަށްޓަކައި ރަށްރަށަށް ވެސް ދަތުރު ކުރަމުންދާ ކަމަށެވެ.

ކަނޑުވިއްކާލުމާއި ދެކޮޅު ޕެޓިޝަނުގައި ސޮއިކުރުމުގެ ހަރަކާތް

އެ އިއްތިހާދުން ބުނީ ކަނޑު ވިއްކާލުމާއި ދެކޮޅަށް އެ އިއްތިހާދުން ފަށާފައިވާ ޕެޓިޝަނަށް ވެސް ހޫނު ތަރުހީބެއް ލިބެމުންދާ ކަމަށެވެ. އަދި ހުކުރު ދުވަހުގެ ރޭ އޮންނަ ބޮޑު ޖަލްސާގައި ބައިވެރިވުމަށް ރަށްރަތުގެ ޓީމުތައް މިހާރު ތައްޔާރުވަމުންދާ ކަމަށެވެ. 

ޖޫން 2 ގައި ބާއްވާ ބޮޑު ޖަލްސާއަކީ މިހާތަނަށް ސިޔާސީ ޕާޓީތައް ގުޅިގެން ބާއްވާ އެންމެ ބޮޑު ހަރަކާތަށް ވެގެންދާނެކަމަށް "ކަނޑު ވިއްކާލުމާއި ދެކޮޅު" ކޯލިޝަނުން ވަނީ ބުނެފަ އެވެ. 

ކަނޑުވިއްކާލުމާއި ދެކޮޅު ޕެޓިޝަނުގައި ސޮއިކުރުމުގެ ހަރަކާތް

މި ހަރަކާތަކީ ސިޔާސީ ޕާޓީތަކުން އިސް ނަގައިގެން ކުރިއަށް ގެންދިޔަ ނަމަވެސް ސިޔާސީ ހަރަކާތެއް ނޫން ކަމަށާއި، ސަރަހައްދާއި ގުޅޭ މި މައްސަލައަކީ ޤައުމީ ބޮޑު މައްސަލައެއްކަމަށް އެ އިއްތިހާދުން އަންނަނީ ބުނަމުންނެވެ. 

ޖޫން 2 ވާ ހުކުރު ދުވަހުގެރޭ ކާނިވާ ސަރަހައްދުގައި ބާއްވާ މި ބޮޑު ޖަލްސާއަކީ ދިވެހި ރައްޔިތުން ކަނޑު ވިއްކާލުމާއި ދެކޮޅުކަން ސަރުކާރާއި މުޅި ދުނިޔެއަށް ދެއްކުމަށް ލިބިގެންދާނެ ފަހި ފުރުސަތެއް ކަމަށާއި، މި ޖަލްސާގައި ވީހާވެސް ގިނަ ބަޔަކު ބައިވެރިވެވަޑައިގަތުމަކީ އެ އިއްތިހާދުގެ ވަރަށް ބޮޑު އެދުމެއްގައި އިއްތިހާދުން ވަނީ ބުނެފައެވެ.