ރާއްޖޭގެ ކަނޑުން ބައެއް ގެއްލުނު ގޮތުގެ ދިރާސާއެއް ކުރަން، މާވަށު ދާއިރާގެ މެންބަރު މުހައްމަދު ސަޢީދު ސްކޫލުތަކުގެ ކިބައިން އެދިލައްވައިފި އެވެ.

ސަންގުޓީވީގެ ޕްރޮގްރާމެއްގައި ވާހަކަ ދައްކަވަމުން ސައީދު ވިދާޅުވީ އެކަމުގެ ދިރާސާއެއް ކުރަން ވިސްނާފައި ވާނެ ކަމަށެވެ. އަދި ދިވެހިރާއްޖޭގައި ކިޔަވައިދޭ މަދަރުސާތަކާއި ސްކޫލު/ ކޮލެޖް ޔުނިވަރސިޓީ ތަންތަނުން ކިޔަވާ ދަރިވަރުންނާއި ކިޔަވައިދޭ މީހުންވެސް، ގައުމީ މަސްލަހަތު އޮތް ބޮޑު ކަމެއް ކަން ދެނެގެން މިކަމުގެ ދިރާސާއެއް ކުރުން ވަރަށް ބޮޑަށް އެދޭކަމަށް ސައީދު ވިދާޅުވިއެވެ.

"އަޅުގަނޑުމެންގެ ބޭނުމަކީ ޓީވީގެ ޒަރިއްޔާއިންވެސް ރާއްޖޭގެ ހަގީގަތުގަ ގެއްލިގެން މިއުޅޭ ސަރަހައްދަކީ ކިހާވަރެއްގެ ސަރަހައްދެއްކަމާ، އަދި އެތަނުން އިގްތިޞާދީގޮތުން ކިހާ ބޮޑު ނަފާއެއް އަޅުގަނޑުމެން ދިވެހިން އަތްމަތިން ގެއްލިގެންކަން މި ދިޔައީ، ދިވެހި ލޮބުވެތި ރައްޔިތުންނަށް ވިސްނަދިނުން. އެ ބޭފުޅުންގެ ސިކުނޑިފުޅަށް މި ވާހަކަތައް ގެނައުން" ސައީދު ވިދާޅުވިއެވެ.

ޗާގޯސް މައްސަލައިގައި އުފައްދާފައިވާ އިއްތިހާދުން "ކަނޑު ވިއްކުމާއި ދެކޮޅު" ނަމުގައި މުޅި ރާއްޖެއަށް ހުޅުވާލައިގެން މިއަދު ބޮޑު ރެލީ އެއް ވަނީ ތައްޔާރު ވެފައެވެ.

މި ރެލީގެ އިތުރުން ޗާގޯސް މައްސަލައިގައި އިންޓަނޭޝަނަލް ޓްރައިބިއުނަލް އޮފް ދަ ލޯ އޮފް ދަ ސީ (އިޓްލޮސް)ގެ ނިންމުން ރާއްޖެއިން ބަލައިނުގަންނާނެ ކަމަށް މޮރިޝަސްގެ ސަރުކާރަށާއި އިޓްލޮސްއަށް އަދި ކަމާބެހޭ އެހެނިހެން ފަރާތްތަކަށް އެންގުމާ އެކު އެ މައްސަލަ ބަލައިދިނުމަށް އިޓްލޮސްއަށް ހުށަހެޅުމަށް އެދި ޕެޓިޝަނެއް އެކުލާވާލައި، އޭގައި ސޮއި ކުރަން ފަށާފައިވާކަން ވެސް ކަނޑު ވިއްކުމާ ދެކޮޅު އިއްތިހާދުން ވަނީ ބުނެފައެވެ.