ކަނޑު ވިއްކުލާ ދެކޮޅަށް މިރޭ ކާނިވަލުގައި ބާއްވާ ޖަލްސާގައި ފުލުހުންނާއި ސިވިލް ސަރވިސް މުވައްޒަފުންވެސް ބައިވެރިވާނެ ކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަދި ޕީޕީއެމްގެ ނައިބު ރައީސް އަަޙްމަދު ޝިޔާމް ވިދާޅުވެއްޖެއެވެ.

މިރޭގެ ޖަލްސާއާ ބެހޭގޮތުން ނޫސްވެރިންނަށް މައުލޫމާތު ދެއްވަމުން ޝިޔާމް ވިދާޅުވީ، މި ޖަލްސާއަށް އިސްރަށްވެހިންނާއި ޒުވާނުން އަދި ކަނބަލުންވެސް ޝައުގުވެރިކަން ފާޅުކުށްފައިވާ ކަަމަށެވެ.

"މި ޖަލްސާގަ ސިވިލް ސަރވިސް މުވައްޒަފުންވެސް ބައިވެރި ވާކަން އަޅުގަނޑުމެނަނަށް އެބަ އެނގޭ. މި ޖަލްސާގަ ދިވެހިރާއްޖޭގެ ފުލުހުންނާ ދިވެހިރާއްޖޭގެ ސިފައިންގެ ތެރެއިންވެސް ވަރަށް ގިނަ ބޭފުޅުން ބައިވެރިވެވަޑައިގަންނަވާކަން އަޅުގަނޑުމެންނަށް އެނގޭ. އަދި މީގެ ކުރިން ފޯސަސްގަ މަސައްކަތް ކުރައްވާފަ، އެމްއެންޑީއެފްގަ ފުލުހުންގެ ތެރޭގަ މަސައްކަތް ކުރައްވާ ޝަރަފްވެރިކަމާއެކީގަ ރިޓަޔަރ ކުރައްވައިގެން ތިއްބެވި ވަރަށް ގިނަ ބޭފުޅުންވެސް މި ޖަލްސާގަ ބައިވެރިވަޑައިގަތުމަށް ޝައުގުވެރިކަން ފާޅުކުރައްވާފަ އެބަހުރި" ޝިޔާމް ވިދާޅުވިއެވެ.

މީގެ އިތުރުން ރަށްރަށުގެ ކައުންސިލްތަކުންވެސް، ވަކި ޕާޓީއެއް ނުބަލާ ވަރަށް ގިނަ މީހުން މާލެ އަހިސްފައިވާ ކަމަށާއި އަދި މިއަދުވެސް އަންނާނެ ކަމަށް ޝިޔާމް ވިދާޅުވިއެވެ.

އެ ފަރާތްތަކުން މާލޭގައި އުޅޭއިރު، އަމާންކަން ގެއްލޭފަދަ އެއްވެސް ކަމެއް ނުކުރުމަށް ނަސޭހަތްތެރި ވެފައި ވާނެ ކަމަށް ޝިޔާމް ވިދާޅުވިއެވެ.

މީގެ އިތުރުން ޝިޔާމް ވިދާޅުވޯީ، ޖަލްސާ ފެށޭނީ8:30ގައި ކަމަށްވީ ނަމަވެސް ވަރަށް ގިނަ ބޭފުޅުން ބައިވެރިވާނެތީ، ގޮނޑިތަކުން ޖާގަ ލިބޭނީ ދުރާލާ ޖަލްސާއަށް ގޮސްގެން ކަމަށެވެ.

އެހެންކަމުން އިޝާ ނަމާދު ނިމިގެން ކާނިވަލާ ދިމާއަށް މިސްރާބު ޖެހުމަށް ޝިޔާމް ވަނީ އެދިވަޑައިގެންފައެވެ.

މިރޭ ބާއްވާ ބޮޑު ޖަލްސާއަކީ މިހާތަނަށް ސިޔާސީ ޕާޓީތައް ގުޅިގެން ބާއްވާ އެންމެ ބޮޑު ހަރަކާތަށް ވެގެންދާނެކަމަށް "ކަނޑު ވިއްކާލުމާއި ދެކޮޅު" ކޯލިޝަނުން ވަނީ ބުނެފަ އެވެ. 

މި ހަރަކާތަކީ ސިޔާސީ ޕާޓީތަކުން އިސް ނަގައިގެން ކުރިއަށް ގެންދިޔަ ނަމަވެސް ސިޔާސީ ހަރަކާތެއް ނޫން ކަމަށާއި، ސަރަހައްދާއި ގުޅޭ މި މައްސަލައަކީ ޤައުމީ ބޮޑު މައްސަލައެއްކަމަށް އެ އިއްތިހާދުން އަންނަނީ ބުނަމުންނެވެ. 

މި ބޮޑު ޖަލްސާއަކީ ދިވެހި ރައްޔިތުން ކަނޑު ވިއްކާލުމާއި ދެކޮޅުކަން ސަރުކާރާއި މުޅި ދުނިޔެއަށް ދެއްކުމަށް ލިބިގެންދާނެ ފަހި ފުރުސަތެއް ކަމަށާއި، މި ޖަލްސާގައި ވީހާވެސް ގިނަ ބަޔަކު ބައިވެރިވެވަޑައިގަތުމަކީ އެ އިއްތިހާދުގެ ވަރަށް ބޮޑު އެދުމެއްގައި އިއްތިހާދުން ވަނީ ބުނެފައެވެ.