މިރޭގެ އެއްވުމުން ނަތީޖާއެއް ނިކުންނާނެ ކަމަށް ދެކެވަޑައިނުގަންނަވާ ކަމަށް ޖުމްހޫރީ ޕާޓީގެ ލީޑަރު އަދި ރިޔާސީ ކެންޑީޑޭޓު ޤާސިމް އިބްރާހިމް ވިދާޅުވެއްޖެއެވެ.
ޤާސިމް މިހެން ވިދާޅުވީ، ކަނޑުވި ވިއްކުމާ ދެކޮޅު އިއްތިހާދުން މިރޭ ޖަލްސާއެއް ބާއްވަން އިއުލާނު ކޮށްފައި ވަނިކޮށެވެ.
އެކަމުގައި އެމަނިކުފާނުގެ ޚިޔާލުފުޅު ފާޅުކުރައްވައި ޤާސިމް ވިދާޅުވީ އެންމެ ފުރަތަމަވެސް ކަނޑު ވިއްކުމާ ދެކޮޅު ހަދައި ބަޔާނެއް ނެރުނީ ޖޭޕީގެ ފަރާތުން ކަމަށާއި ދިވެހި ބިމުން ބައެއް ގެއްލުމަށް ނޭދޭކަމަށެވެ. އަދި އޭގެ ފަހުގައިވެސް ސިލްސިލާ ގޮތެއްގައި އެކަމުގެ ހަރަކާތްތަކުގައި ބައިވެރިވަމުން ދިޔަ ކަމަށެވެ.
ނަމަވެސް މިރޭގެ ޖަލްސާއިން ހާސިލުވާނެ ނަތީޖާއެއް ފެނިވަޑައިނުގަންނަވާ ކަމަށް ޤާސިމް ވިދާޅުވިއެވެ.
"މިރޭ މި ބާއްވަން އުޅޭ ބައްދަލުވުމުން ހޯދިދާނެ ނަތީޖާއެއް ނުވަތަ ކުރެވިދާނެ ކަމެއް އަޅުގަނޑަކަށެއް އިހުސާސެއް ނުކުރެވޭ. ކޮން ކަމެއްތޯ ކުރެވޭނީ. ފަސާދަ އުފައްދާ ފިތުނަ އުދެއްދުން ފިޔަވާ އެހެން ކޮން ނަތީޖާއެއްތޯ ލިބޭނީ،" ޤާސިމް ވިދާޅުވިއެވެ.
މިރޭގެ ޖަލްސާގެ ސަބަބުން އެޓްލޮސްއިން ނިންމާފައިވާ ނިންމުމަށް ބަދަލެއް ގެނެވޭނީތޯ ޤާސިމް ވަނީ ސުވާލު އުފައްދާފައެވެ.
މީގެއިތުރުން ޤާސިމް ވިދާޅުވީ، އެކަމުގައި ކުށްވެރިވާ ފަރާތްތަކަށް ފިޔަވަޅު އެޅުމުގެ މަސައްކަތް މަޖިލީހުން ކުރަމުން ދާކަމަށެވެ. އަދި މިރޭގެ ހަރަކާތަކީ ސިޔާސީ ހަރަކާތެއްކަން ފާހަގަ ކުރައްވައި ޤާސިމް ވިދާޅުވީ މިރޭގެ ޖަލްސާގައި ޖޭޕީގެ މީހުން ބައިވެރިވާން ނުޖެހޭ ކަމަށެވެ.
ކަނޑުވިއްކުމާ ދެކޮޅު އިއްތިހާދުން ބާއްވާ ޖަލްސާ އޮތީ މިރޭ 8:30ގައި ކާނިވަލުގައެވެ.
Advertisement
This content is created and paid for by advertisers and does not involve Voice Journalists
