ރޭ ކަނޑު ވިއްކާލުމާއި ދެކޮޅު ކޯލިޝަނުން ބޭއްވި ޖަލްސާ ނިމުނީ ރޭވި ގޮތަށް ކަަމަށާއި ރައްޔިތުންނަށް ފެނުނީ ފުލުހުންގެ ދޮގު ބަޔާނެއް ކަމަށް މަހިބަދޫ ދާއިރާގެ މެންބަރު އަހުމަދު ޠާރިގު (ޓޮމް) ވިދާޅުވެއްޖެއެވެ.

ރޭގެ ޖަލްސާއަށް އަމާޒުކޮށް ފުލުހުން ނެރުނު ބަޔާނެއްގައި ގާނޫނާއި އެއްގޮތަށް އިދިކޮޅުގޭ ޖަލްސާގައި އަމަލުތައް ބެހެއްޓުމަށް އިލްތިމާސް ކުރުމުގެ އިތުރުން ފުލުހުން ވަނީ މި ހަރަކާތުގައި ބައިވެރިވާ ބައެއް ފަރާތްތަކުން ގާނޫނާ ޚިލާފު އަމަލުތައް ހިންގުމަށް ރާވަމުންދާ ކަމަށާއި ހިންގާނެކަމަށް ބުނަމުންދާ ކަމަށް ފުލުހުންނަށް މައުލޫމާތު ލިބިފައިވާ ކަމަށް ބުނެފައެވެ. 

މިކަމަށް ރައްދު ދެއްވާ ރޭގެ ޖަލްސާ ގެ ފޮޓޯ އެއް ހިއްސާ ކުރައްވާ ފުލުހުންނަށް ފާޑު ވިދާޅުވަމުން ޓޮމް ކުރެއްވި ޓްވީޓުގައި ވިދާޅުވީ ދިވެހި ފުލުހުންގެ މުއައްސަސާގެ އަގުހިފަހައްޓާނީ އެ ތަނުގެ ފުލުހުން ކަމަށެވެ.

އަދި ރޭ ނެރުން ބަޔާނަކީ ދޮގެއްގެ ގޮތުގައި ސިފަކޮށް ޓޮމް ވިދާޅުވީ ކޮމިޝަނަރ އޮފް ޕޮލިސް މުޙައްމަަދު ޙަމީދުގެ "ޅިޔަންފަހަރިންގެ ހައްގުގައި" މިފަދަ ދޮގު ބަޔާން ނެރުމުން ފުލުހުންނަށް ކުރާ އިތުބާރު ގެއްލިގެންދާ ކަމަށެވެ.

"މިރޭގެ ރެލީ ރޭވިގޮތަށް އެނިމުނީއެވެ. ރައްޔިތުންނަށް ފެނުނީ ފުލުހުން ދެއްކީ ދޮގުބަޔާނެކެެވެ." ޓޮމް އިތުރަށް ވިދާޅުވިއެވެ.

ރާއްޖޭގެ ދެކުނުގެ ކަނޑުގެ ސަރަހައްދުން ބޮޑުބައެއް ދޫކޮށްލި ކަމަށް ބުނާ މައްސަލަ އާއި ގުޅިގެން ރާއްޖޭގެ ސިޔާސީ މަޝްރަހު ވަނީ ހަލަބޮލި ވެފައެވެ. 

އެގޮތުން މިކަމާއި ދެކޮޅަށް ގިނަ ސިޔާސީ ޕާޓީތަކެއް ގުޅިގެން އުފައްދާފައިވާ ކަނޑު ވިއްކާލުމާއި ދެކޮޅު އިއްތިހާދުން ރޭ މާލޭގެ ކާނިވާ ސަރަހައްދުގައި "ބާނަ ބާނަތިއްބާ ތިޔަ ވިއްކާލީ ކަނޑު" ޖަލްސާ ވަނީ ބާއްވާފައެވެ.

އެ އިއްތިހާދުގައި ޕީޕީއެމް-ޕީއެންސީ ކޯލިޝަންގެ އިތުރުން، ދި ޑިމޮކްރެޓްސް (ކުރީގެ ފިކުރެއްގެ ދިރުން) އާއި މޯލްޑިވްސް ނެޝަނަލް ޕާޓީ އަދި ޖުމްހޫރީ ޕާޓީ ހިމެނެއެވެ. އެ ކޯލިޝަނުގައި އުމަރު ނަސީރާއި، ކުރީގެ ބަންޑާރަ ނައިބުންވެސް އިސްކޮށް ހަރަކާތްތެރިވެ އެވެ. 

ޖުމްހޫރީ ޕާޓީގެ ކައުންސިލް މެމްބަރުންނާއި އާންމު މެމްބަރުން ބައިވެރި ނުވުމަށް ޕާޓީގެ ލީޑަރު އަދި ރިޔާސީ ކެންޑީޑޭޓު ޤާސިމް އިބްރާހިމް އެދިވަޑައިގެންފައިވީ ނަމަވެސް ރޭގެ ޖަލްސާގައި އެޕާޓީގެ މަޖްލިސް މެމްބަރު އަލީ ހުސައިން ޖަލްސާގައި ބައިވެރިވެ ވަޑައިގަތެވެ.