ދިވެހިރާއްޖޭގެ ސިފައިންގެ އިސް ބޭކަލުން ނިކުންނަވާ ރާއްޖޭގެ ކަނޑުގެ ސަރަޙައްދަކީ ކޮބައިކަން އެނގިވަޑައިނުގަންނަވާކަމަށް ވިދާޅުވުމުން ލަދުފުޅުގަންނަވާކަމަށް ކުރީގެ ބަންޑާރަނައިބު އާޒިމާ ޝުކޫރު ވިދާޅުވެއްޖެ އެވެ. 

އާޒިމާ މިފަދައިން ވިދާޅުވެފައިވަނީ ރާއްޖޭގެ ކަނޑުގެ ސަރަހައްދަކީ ކޮބައިކަން ހެދިފައިވާ ޤާނޫނުތަކުގެ އަލީގައި ރޭ ކާނިވަލުގެ ބޭއްވި "ބާނަ ބާނަ ތިއްބާ ތިޔަ ވިއްކާލީ ކަނޑު" ޖަލްސާގައި ރައްޔިތުންނަށް އޮޅުންފިލުވައި ދެމުންނެވެ. 

އާޒިމާ ވިދާޅުވީ ދިވެހިރާއްޖޭގެ ކަނޑުގެ ސަރަހައްދު ބައިނަލްއަގުވާމީ ކަނޑުތަކާއި ބެހޭ ޤާނޫނުތަކާއި އެއްގޮތަށް ކަނޑައަޅާ، ޗާޓުތައް ކުރަހާ އދ އަށް ހުށައަޅާފައިވާ ކަމަށެވެ. 

މިއިން އެއްވެސް ކަމަކަށް ރިއާޔަތްކުރުމެއް ނެތި ރާއްޖޭގެ ދެކުނުފަރާތުގެ ކަނޑުގެ ސަރަހައްދު ކަނޑައަޅާފައި ނެތްކަމަށް ސަރުކާރުން ބުނަމުންދާކަމަށް އާޒިމާ ވިދާޅުވި އެވެ.

އެ ވާހަކަތަކާއި ގުޅުވާ އާޒިމާ ވިދާޅުވީ، ކަނޑުގެ ސަރަހައްދު ކަނޑަނާޅާ އޮތްކަމަށް ބުނާއިރު، މި ވެރިކަމުގައި 2019 ވަނަ އަހަރު އެކުލަވާލި (ދިވެހިރާއްޖޭގެ މަސްވެރިކަމުގެ ޤާނޫނުގައި) ރާއްޖޭގެ ޚާއްސަ އިޤްތިޞާދީ ސަރަޙައްދު ހިމާޔަތްކުރުމަށް ފުލުހުންނާއި، ސިފައިންނާއި ކަސްޓަމްސްގެ މައްޗަށް މަސްއޫލިއްޔަތުތަކެއް ކަނޑައަޅާފައިވާ ކަމަށެވެ. 

ޤާނޫނުތަކުގައި މިފަދައިން ބަޔާންކޮށްފައި ވަނިކޮށް ސިފައިންގެ ބޭކަލުން ނިކުންނަވާ، ރާއްޖޭގެ ކަނޑުގެ ސަރަހައްދު ނޭނގޭކަމަށް ވިދާޅުވަމުންދާ ކަމަށާއި، އެ އަޑުތައް އަހާ ލަދުން އިސްދަށަށް ޖަހާލަން ޖެހޭކަމަށް އާޒިމާ ވިދާޅުވި އެވެ. 

އާޒިމާ ވިދާޅުވީ ސިފައިން މި މޭރުމުން ވާހަކަދައްކާއިރު، ރާއްޖޭގެ ރައްޔިތުންނާއި، މި ގައުމާއި މި މައުމުގެ ސަރަހައްދު ސިފައިން ހިމާޔަތްކުރާނެކަމަށް އިތުބާރުކުރެވިދާނެ ކަމާމެދު ސުވާލު އުފެދޭ ކަމަށެވެ. 

އަދި އަސްކަރިއްޔާގެ އިސްވެރިންގެ ކޮމާންޑުގެ ދަށުގައި އޮތް އަސްކަރިއްޔާއަކަށް ދިވެހި ރައްޔިތުން ހިމާޔަތްކުރެވިދާނެ ކަމާމެދު ވެސް މިހާރު ސުވާލު އުފެދޭކަމަށް އާޒިމާ ވިދާޅުވި އެވެ. 

އޭގެ އިތުރުން އާޒިމާ ވަނީ ކަނޑުގެ ސަރަހައްދު ނޭނގޭކަމަށް ސިފައިންގެ އިސްވެރިން ވިދާޅުވާނަމަ، އެއީ އެ ބޭފުޅުންނާއި ދޭތެރޭ އަސްކަރިއްޔާގައި މަސައްކަތް ކުރައްވާ ފަރާތްތަކާއި، ރައްޔިތުން ވަރަށް ބޮޑަށް ވިސްނަންޖެހޭ ކަމެއް ކަމަށެވެ.