އައްޑޫ ސިޓީއަށް ބޮޑު ބަދަލެއް ގެނައުމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު އައްޑޫ އަށް ރަސްމީ ދަތުރުފުޅެއްގައި މިއަދު ވަޑައިގެންފިއެވެ.

ތިން ދުވަހުގެ މި ދަތުރުފުޅުގައި ރައީސުލްޖުމްހޫރިއްޔާގެ އަރިހުގައި ސަރުކާރުގެ މަތީފަންތީގެ ވަފުދެއް ބައިވެރިވެވަޑައިގަންނަވައެވެ.

އައްޑޫ ސިޓީގެ ތަރައްޤީއަށް ބޮޑެތި ބަދަލުތަކެއް ގެނައުމަށް ސަރުކާރުން ކުރަމުންދާ މަސައްކަތްތަކުގެ ސަބަބުން އެ ސިޓީއަކީ ސަރަޙައްދީ އިޤްތިޞާދުގެ މައި ހަބަކަށް ބަދަލުވެ، އޭގެ އެތަކެއް ފައިދާތަކާއި މަންފާއެއް ރައްޔިތުންނަށް ލިބިގެންދާނެ ކަމަށް ރައީސް އޮފީހުން ވަނީ ވިދާޅުވެފައެވެ.

މިއާއިއެކު ރައީސުލްޖުމްހޫރިއްޔާގެ މި ދަތުރުފުޅުގައި އައްޑޫ ސިޓީއަށް ގެނެވިގެންދާ ބޮޑެތި ތަރައްޤީގެ ބަދަލުތަކުގެ ތެރެއިން ހިންގޭ ބައެއް މަޝްރޫއުތައް ފައްޓަވައި ދެއްވައި، މިހާރު ކުރިޔަށްދާ މަޝްރޫޢުތަކުގެ މަސައްކަތް ބައްލަވައިލާނެ ކަމަށް ރައީސް އޮފީހުން ވިދާޅުވިއެވެ.

އެގޮތުން އައްޑޫ ސިޓީގެ މަރަދޫ އާއި ހަންކެނޑެ ސަރަހައްދުގެ ބިންހިއްކުމުގެ ބިޔަ މަޝްރޫޢާއި، ގަން އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫޢު އެމަނިކުފާނު އިފްތިތާހު ކޮށްދެއްވާނެއެވެ.

އަދި، އައްޑޫ ސިޓީގައި މިހާރު ކުރިޔަށްދާ ބޮޑެތި އެހެން މަޝްރޫޢުތަކުގެ ތެރެއިން، އައްޑޫ ސިޓީގެ މަގުތައް ހެދުމުގެ މަޝްރޫޢުގެ މަސައްކަތްތައް ކުރިޔަށްދާގޮތް އެމަނިކުފާނު ބައްލަވައި ލައްވާނެއެވެ.

މީގެ އިތުރުން އައްޑޫ ސިޓީ ހުޅުދޫގައި ހުންނަ، ޑްރަގް ޑިޓޮކްސިފިކޭޝަން އެންޑް ކޮމިއުނިޓީ ރިހެބިލިޓޭޝަން ސެންޓަރަށް ވެސް އެމަނިކުފާނު ޒިޔާރަތްކުރައްވާނެއެވެ.     

ރައީސުލްޖުމްހޫރިއްޔާ އައްޑޫ ސިޓީއަށް ކުރައްވާ މި ދަތުރުފުޅުގައި، އައްޑޫ ސިޓީކައުންސިލާއި، އ.ތ.މ ކޮމިޓީއާއި ބައްދަލުކުރެއްވުމުގެ އިތުރުން، އައްޑޫ ސިޓީގެ ރައްޔިތުންނާއިއެކު ރޭގަނޑުގެ ފަރިއްކޮޅެއްގައި ބައިވެރިވެވަޑައިގަންނަވާނެއެވެ.

އައްޑޫ ސިޓީއަށް ރައީސުލްޖުމްހޫރިއްޔާގެ އިތުރުން އިންޑިއާގެ ވަފުދެއްވެސް ޒިޔާރަތް ކުރުމަށް ހަމަ ޖެހިފައިވާ ކަމަށް އިންޑިއާގެ މީޑިއާ ތަކުން ވަނީ ރިޕޯޓް ކޮށްފައިވެއެވެ.

އެގޮތުން އައްޑޫސިޓީ އަށް ވަޑައިގަތުމަށް ހަމަޖެހިފައިވާ އިންޑިޔާގެ ވަފުދުގެ ބޭފުޅުންވަނީ މިއަދު މެންދުރު ރާއްޖެ ވަޑައިގެންފައެެވެ. 

މި ބޭފުޅުންގެ ތެރޭގައު އިންޑިއާގެ އެކްސްޓަރނަލް އެފެއާޒްގެ ސްޓޭޓް މިނިސްޓަރ ޝްރީ މުރަލީޑަރަން ހިމެނި ވަޑައިގަންނަވާއިރު މި ދަތުރުފުޅުގައި އައްޑޫ ސިޓީގެ މަޝްރޫއުތައް އިފްތިތާހު ކުރުމުގައާއި ހިނގަމުންދާ މަޝްްރޫއުތައް ބެއްލެވުމުގައި މިނިސްޓަރ ބައިވެރިވެ ވަޑައިގަންނަވާނެ ކަމަށް ވަނީ ރިޕޯޓް ކޮށްފައެވެ.

މިއާއިއެކު ރައީސުލްޖުމްހޫރިއްޔާއާއި ސަރުކާރުގެ މަތީ ފަންތީގެ ބޭފުޅުންނާއިއެކު ދެގައުމުގެ ދެމެދުގައި އެއްބާރުލުން ދިނުމާއި ގުޅުން އިތުރަށް ތަރައްގީ ކުރުމުގެ މަޝްވަރާތައް ކުރިއަށް ދާނެ ކަމަށާއި އެއްބަސްވުންތަކެއްގައި ސޮއި ކުރެވިގެން ދާނެ ކަމަށް ވެސް މީޑިއާ ތަކުން ވަނީ ބުނެފައެވެ.

އައްޑޫ ސިޓީއަށް މިއަދު ޒިޔާރަތް ކުރެއްވުމަށް ރައީސް ނިންމަވާފައިވާއިރު މިދިޔަ ހަފްތާގައި އެމަނިކުފާނު ވަނީ ފ އަތޮޅުގެ ރަށްތަކަށް ވެސް ޒިޔާރަތް ކުރައްވާ އެ ރަށްތަށުގެ ހާލަތު ގާތުން ބައްލަވާފައެވެ.

އެގޮތުން ރައީސްް ޒިޔާރަތްކުރެއްވާފައިވަނީ ފ އަތޮޅު ނިލަންދޫ، ދަރަނބޫދޫ، މަގޫދޫ، ބިލެއްދޫ، އަދި ފީއައްޔަށެވެ.