އިންޑިޔާގެ އެހީގައި ރާއްޖޭގެ ބައެއް ރަށްރަށަށް ހަދިޔާކުރާ އިޖުތިމާއީ ތަރައްގީގެ މަޝްރޫއުތަކުގެ ތެރޭގައި އައުޓްޑޯ ޖިމް އަޅައި ބަހެއް ހަދިޔާ ކުރުން ހިމެނިއްޖެއެވެ.

މި މަޝްރޫއުތަކުގެ އެއްބަސްވުމުގައި ސޮއިކުރުން އޮތީ މިއަދު ފޮރިން މިނިސްޓްރީގައެވެ.

ރާއްޖޭގެ ފަރާތުން މި އެއްބަސްވުންތަކުގައި ސޮއިކުރެއްވީ ސްޓޭޓް މިނިސްޓަރު އަހުމަދު ހަލީލެވެ. އަދި އިންޑިޔާގެ ފަރާތުން ސޮއިކުރެއްވީ އެގައުމުން ރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރެވެ.

މި އެސްބަސްވުމުގެ ދަށުން ހިމެނެނީ:-

1- މާލޭގައި ހުންނަ އާޓްސް ސެންޓަރު ތަރައްޤީކުރުން

2- ޅ.ހިންނަވަރު އާ ކައުންސިލް އިދާރާ އިމާރާތްކުރުން

3- އަބްދުއްސަމަދު މެމޯރިއަލް ހޮސްޕިޓަލުގައި ނަފްސާނީ ދުޅަހެޔޮކަމުގެ ޔުނިޓެއް ގާއިމުކުރުން

4- 4 ސްކޫލްއަކަށް ބަސް ހޯދުން (ނ.ކެނދިކުޅުދޫ، ލ.ގަން، ކުޅުދުއްފުށި އަދި ފުވައްމުލައް ސިޓީ)

5- ލ.އަތޮޅު ތަޢުލީމީ މަރުކަޒުގެ ސްކޫލް ޑިޖިޓަލައިޒޭޝަން ޕްރޮގްރާމް

6- ށ.މިލަންދޫ ރަނިންގ ޓްރެކް ތަރައްޤީކުރުން

7- އައްޑޫ ހިތަދޫގެ ބޭރުމަތި ދާއިރާގައި އައުޓްޑޯ ޖިމް ތަރައްޤީކުރުން

8- އައްޑޫ ހިތަދޫގެ ރަސްގެދަރަ ދާއިރާގައި އައުޓްޑޯ ޖިމް ތަރައްޤީކުރުން

9- ހއ.ދިއްދޫގައި އައުޓްޑޯ ޖިމް ތަރައްޤީކުރުން

10- ގދ.ވާދޫ ގައިއައުޓްޑޯ ޖިމް ތަރައްޤީކުރުން

މީގެ އިތުރުން، އިންޑިޔާއިން ރާއްޖެއަށް ހަދިޔާކުރި ޓީބީ ބަލީގެ ބޭސްވެސް މި ރަސްމިއްޔާތުގައި ވަނީ ހަވާލުކޮށްފައެވެ. ރާއްޖޭގެ ފަރާތުން އެއާ ހަވާލުވެވަޑައިގަތީ ޑިރެކްޓަރ ޖެނެރަލް އޮފް ހެލްތް މައިމޫނާ އަބޫބަކުރެވެ.

މި މަޝްރޫއުތައް ހިންގާނީ، ޖަނަވަރީ މަހު އިންޑިޔާއާއި ރާއްޖެ ވެފައިވާ އެއްބަސްވުމުގެ ދަށުން އިތުރުކޮށްދިން 100 މިލިއަން ޑޮލަރުގެ ލައިން އޮފް ކްރެޑިޓްގެ ދަށުންނެވެ.