ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ވަފާތެރި މަޖިލީހުގެ މެންބަރުން އިސްވެ އުފެއްދެވި 'ދަ ޑިމޮކްރެޓްސް' ޕާޓީއަށް ސޮއިކުރާ މެންބަރުންނަށް ސަރުކާރުން ބިރުދައްކާ ކަމަށްބުނެ، އެކަން ހުއްޓުވުމަށް އެދި މަޖިލީހަށް ހުށަހެޅި ކުއްލި މައްސަލަ ބޭރުކޮށްލައިފި އެވެ. 

މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފް ހުށަހަޅާފައިވާ މި މައްސަލާގައި ބުނީ 'ދަ ޑިމޮކްރެޓްސް' އުފެއްދުމަށް 1 ޖޫން 2023 ގައި އިލެކްޝަންސް ކޮމިޝަނަށް ހުށަހެޅި ފޯމުތަކުގައި ހުރި މައުލޫމާތުވަނީ ސަރުކާރުން ވަގަށް ހޯދައި، އެމައުލޫމާތު ބޭނުންކޮށްގެން ފޯމު ހުށަހެޅި މީސްމީހުނަށް ގުޅައި ބިރުދައްކާން ފަށާފައިވާ ކަމަށެވެ. 

"ސަރުކާރުން އެކަން ހިންގަނީ ފުޅާ ދާއިރާއެއްގައެވެ. ސަރުކާރުގެ މިނިސްޓަރުންނާއ،ި ސަރުކާރު ހިއްސާވާ ކުންފުނިތަކުގެ ވެރީންނާއ،ި ސަރުކާރުގެ އެކިއެކި މަޤާމުތަކުގައި ތިއްބެވި ބޭބޭފުޅުން ވަޑައިގަންނަވަނީ އެ މުޑުދާރު ޢަމަލު ހިންގަވަމުންނެވެ. އެގޮތުން ގުޅުއްވާ ފަރާތްތަކުގެ އަރިހުން ސާފު ކުރަމުން ގެންދަނީ، ގޯއްޗަށް ނުވަތަ ފްލެޓަށް އެދި ފޯމު ހުށަހަޅާފައިވޭތޯ، ނުވަތަ ދަރިފުޅު ސްޓޫޑެންޓް ލޯނަށް ހުށަހަޅާފައިވޭތޯ ފަދަ ކަންކަމެވެ. ސަރުކާރުން ގުޅުއްވާ ބޭފުޅުން ޑިމޮކްރެޓްސް އަށް ސޮއިކުރައްވާފައިވާ ބޭފުޅުންނަށް އަންގަމުންދަނީ ސަރުކާރުގައި ނުވަތަ ސަރުކާރު ހިއްސާވާ ކުންފުނީގައި އޮތް ދަރިފުޅުގެ ވަޒީފާގައި އޭނާ ބަހައްޓާން ބޭނުންނަމަ 'ޑިމޮކްރެޓްސް' އަށް ކޮށްފައި އޮތް ސޮއި އަނބުރާ ނެގުމަށެވ.ެ އަދި ޑިމޮކްރެޓްސް އަށް ކޮށްފައި އޮތް ސޮއި އެއީ އޭނާ ކޮށްފައި އޮތް ސޮއެއް ނޫންކަމަށް އިލެކްޝަންސް ކޮމިޝަންގައި ބުނުމަށްވެސް ދަނީ އެ ފަރާތްތަކުން އަންގަމުންނެވެ." ސަރުކާރުން ބިރު ދެއްކުމަށް ކުރަމުންދާ ކަންކަން ފާހަގަކުރައްވައި ހަސަން ލަތީފް ގެ މައްސަލައިގައި ބުނެފައިވެއެވެ.

Advertisement

އެ މައްސަލާގައި އިތުރަށް ބުނީ، އެކަންކަމަކީ، އެމ.ްޑ.ީޕީ އުފެއްދި މަޤްޞަދުތަކާއި އެޕާޓީން ވަކާލާތު ކުރަމުން ދިޔަ ހަމަތަކާއި އުޞޫލުތަކާ ދިމާ އިދިކޮޅު އަމަލުތަކެއް ކަމަށާ، އެއީ އެމ.ްޑ.ީޕީ އުފެއްދުމަށް މަސައްކަތްކުރިއިރު، އެމްޑީޕީ އުފެދުނަ ނުދިނުމަށް އޭރު އޮތް ސަރުކާރުން އެޕާޓީ އުފެއްދުމުގެ މަސައްކަތް ކުރެއްވި ބޭބޭފުޅުންނާ ކުރިމަތި ކުރުވި ކަންކަން ކަމަށެވެ. އަދި އެކަންކަން ކުރުމުގައި މިހާރު އިސްވެ ހުންނެވީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ކަމަށްވާތީ ލަދުވެތިވާ ކަމަށްވެސް ބުނެފައިވެއެވެ. 

މިއާއެކު ހަސަން ލަތީފް ވަނީ 'ދަ ޑިމޮކްރެޓްސް' އުފެއްދުމަށް ސޮއިކުރެއްވި މެންބަރުން ސާބިތުކަމާއެކު ދެމި ތިބުމަށާއި ބިރުފަހަނައަޅާ ދިޔުމަށް އެދިފައެވެ.

އަދި އެޕާޓީ އުފެއްދުމަށް ސޮއިކޮށްފައިވާ ފަރާތްތަކަށް ސަރުކާރުން އެއްވެސް މިންވަރަކަށް ބިރު ނުދެއްކުމަށް ސަރުކާރަށް ގޮވާލާފައެވެ. 

މި މައްސަލަ އަށް ބަހުސް ކުރުމަށް މަޖިލީހުގެ ރިޔާސަތުގައި އިންނަވައި ރައީސް ނަޝީދު ވޯޓަށް އެއްސެވުމުން ވޯޓުގައި ބައިވެރިވި 49 މެންބަރުންގެ ތެރެއިން 33 މެންބަރުން ވޯޓު ދެއްވީ މައްސަލަ ބަލައިގަންނަން ނުފެންނަ ކަމަށެވެ. އަދި ފެންނަ ކަމަށް ވޯޓު ދެއްވީ 16 މެންބަރުންނެވެ. އެހެން ކަމުން މައްސަލަ ވަނީ މަޖިލީހުން ބޭރުކޮށްލާފައެވެ.