ރައްޔިތުންގެ މަޖިލީހުގެ އެމްޑީޕީއަށް ނިސްބަތްވާ 12 މެމްބަރުން އިސްތިއުފާދެއްވުމާއެކު، މަޖިލީހުގެ ކޮމެޓީތައް އަލުން އެކުލަވާލުމުގެ މަސައްކަތް ކުރަން ޖެހިފައިވާއިރު، އެކަން ނުކުރައްވާ މަޖިލީހުގެ ރައީސް މުޙައްމަދު ނަޝީދު ދިގު ދަންމަނީ ކޮތަޅު ބިލު އިސްލާހުކުރިޔަ ނުދީ ރައްޔިތުން ލައްވާ ސަރުކާރަށް އެއްޗެހި ކިޔުވުމަށްކަމަށް ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުޙައްމަދު ޝަފީއު ވިދާޅުވެއްޖެ އެވެ. 

ޝަފީއު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ 10 ވަނަ ޖަލްސާއަށް ހުށައަޅާފައިވާ ތަކެތީގެ އަގުތައް ކޮންޓްރޯލުކުރުމަށް ސަރުކާރަށް ގޮވާލާ ގަރާރަށް ބަހުސްކުރައްވަމުން ނެވެ. 

އެ ގަރާރަށް ބަހުސްކުރައްވަން ފައްޓަވަމުން ޝިފާއު ވިދާޅުވީ ތަކެތީގެ އަގުތައް އުފުލެމުންދާ މި ދަނޑިވަޅުގައި ރައްޔިތުންގެ ތަކުލީފުތައް ކުޑަކުރުމަށް ސަރުކާރުން ކުރަމުންދާ މަސައްކަތްތައް ފާހަގަކޮށް ޝުކުރުއަދާކުރުން މުހިންމު ކަމަށެވެ. 

އެގޮތުން ސަރުކާރުން ވަނީ ސިވިލް ސާވިސް މުވައްޒަފުންނާއި، ޓީޗަރުންނާއި ނަރުހުންގެ މުސާރަތަކަށް ހެޔޮ ބަދަލުތަކެއް ގެނެއްދީފައި ކަމަށާއި، މިއީ ތަކެތީގެ އަގުތައް އުފުލެމުންދާ މި ދަނޑިވަޅުގައި ސަރުކާރުން އުފުލި ބޮޑު ބުރައެއްކަމަށް އޭނާ ވިދާޅުވިއެވެ. 

އެއާއެކު ޝިފާއު ވިދާޅުވީ ރައްޔިތުންގެ ޖީބުތަކަށް ލުއި ގޮތްތަކެއް ހޯދައިދިނުމަށް ސަރުކާރުން ކުރާ މަސައްކަތްތަކަށް ރައީސް ނަޝީދު މަޖިލީހުގެ ރިޔާސަތުގައި އިންނަވާ ހުރަސްއަޅަމުންދާ ކަމަށެވެ. 

މަޖިލީހުގެ ކޮމެޓީތައް އެކުލަވާނުލާ ހުންނެވުމަކީ، ރައްޔިތުންގެ ހައްގުގައި ފާސްކުރަން ޖެހޭ މުހިންމު މަސައްކަތްތައް ކުރުމަށް އެޅިގެންދާ ވަރަށް ބޮޑު ހުރަހެއްކަމަށް ޝިފާއު ވިދާޅުވި އެވެ. 

ޝިފާއު ވިދާޅުވީ ރައްޔިތުންނަށް ލުއި ފަސޭހަ ގޮތްތައް ހޯދާދިނުމަށް ސަރުކާރުން މަސައްކަތް ކުރަމުންދާއިރު، ރައްޔިތުންގެ މަޖިލީހަކީ އެކަމަށް އޮތް ހުރަހަކަށް ވެގެން ނުވާނެ ކަމަށެވެ. އަދި ވަކިން ޚާއްސަކޮށް ރިޔާސަތުން އެކަމަށް ހުރަސްއަޅައިގެން ނުވާނެކަމަށް ޝިފާއު ވިދާޅުވި އެވެ. 

ޕްލާސްޓިކް ކޮތަޅު ބޮނޑި ޓެކްސް ނެގުން އިސްތިސްނާ ނުކޮށް ކުނި މެނޭޖުކުރުމުގެ ޤާނޫނަށް ގެނައި އިސްލާހުގެ ސަބަބުން، ކޮތަޅު ބޮނޑީގެ އަގުތައް ވަނީ އިންތިހާއަށް އުފުލިގެން ގޮސްފައެވެ. 

އެކަމާއި ގުޅިގެން ރައްޔިތުންގެ ޝަކުވާ އިތުރުވަމުން ދިއުމާއި ގުޅިގެން ސަރުކާރުން ވަނީ އަލުން އެ ބިލު އިސްލާހުކުރުމަށް ހުށައަޅާފައެވެ. 

އެހެން ނަމަވެސް ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގައި އެ ބިލު ހުށައެޅި ނަމަވެސް ދައުރު ނިންމާލީ ބިލުގެ މަސައްކަތް ޕާކުކޮށްފައި ބާއްވާފައެވެ. އަދި މި ދައުރު ފެށިގެން 10 ވަނަ ޖަލްސާއާއި ހަމަޔަށް އައިސްފައިވާއިރު، މިހާތަނަށް އެ ބިލުގެ މަސައްކަތް ތާވަލުކޮށްފައެއް ވެސް ނުވެއެވެ.