ދަ ޑިމޮކްރެޓްސް ގެ ވެރިކަމެއްގައި ވައްކަމުން ދައުލަތް ސަލާމަތް ކުރާނެކަމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު އީވާ އަބްދުالله ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުން އީވާ ވަނީ އެމްޑީޕީން ނިކުމެ "ދަ ޑިމޮކްރެޓްސް" ގެ ނަމުގައި ޕާޓީއެއް އުފައްދަން ކުރަމުންދާ މަސައްކަތަށް ހުރަސްއެޅުމަށް ސަރުކާރުން ކުރަމުންދާ ކަންކަމަށް އަލިއަޅުވާލާ ނުރުހުން ފާޅުކޮށްފަ އެވެ.
އެގޮތުން އޭނާ ވިދާޅުވީ ޑިމޮކްރެޓްސްއާއި ގުޅެމުންދަނީ ސަރުކާރު ހިންގާ މައި ޕާޓީ ހިންގަމުންދާ ގޮތުން މާޔޫސްވެ، ކަންކަން އަލުން އިސްލާހުކުރުމަށް މަސައްކަތް ކުރަން ބޭނުންވާ ފަރާތްތައް ކަމަށެވެ. އެމީހުންނަކީ ބަތަލުންތަކެއްގެ ގޮތުގައި އީވާ ސިފަކުރެއްވި އެވެ.
އެއާއެކު އޭނާ ވިދާޅުވީ "ދަ ޑިމޮކްރެޓްސް" ގެ ވެރިކަމެއްގައި ވެރިކަމުގެ ނިޒާމުގައި ހުރި ގިނަ މައްސަލަތަކެއް ޙައްލުކުރާނެ ކަމަށެވެ. އެ ވެރިކަން ވެގެންދާނީ ރައްޔިތުންގެ ފުދުންތެރިކަން އިތުރުކޮށް، ވައްކަމުގެ ނުބައި ފަސާދައިން ދައުލަތް ސަލާމަތްކުރާނެ ވެރިކަމުގެ ގޮތުގައި ކަމަށް އީވާ ވިދާޅުވި އެވެ.
"ރިޔާސީ އިންތިޚާބު މި އަންނަނީ. އަޅުގަނޑުމެން ގެންނަ ކެންޑިޑޭޓާއެކު އަޅުގަނޑުމެން އުފައްދާ ސަރުކާރެއްގައި އިރާދަކުރެއްވިޔާ ދިވެހިރާއްޖޭގެ ގޭބީސީގެ އާމްދަނީތައް އަޅުގަނޑުމެން އިތުރުކުރާނަން. ދިވެހިރާއްޔިތުން އަތުން ގެއްލެމުން މިދާ މިނިވަންކަން އަޅުގަނޑުމެން އަނބުރާ ހޯދާދޭނަން. ވައްކަމުން އިރާދަކުރެއްވިއްޔާ ސަރުކާރު، ދައުލަތް ހިންގުން ސަލާމަތްކޮށްދޭނަން"
ގަލޮޅު އުތުރު ދާއިރާގެ މެމްބަރު އީވާ އަބްދުالله
ދަ ޑިމެކްރެޓސް އަކީ ރައްޔިތުންގެ މަޖިލީހުގެ އެމްޑީޕީއަށް ނިސްބަތްވާ 12 މެމްބަރުންގެ އިތުރުން ރައީސް މުޙައްމަދު ނަޝީދަށް ތާއީދުކުރައްވާ ބައެއް ފަރާތްތަށް އެމްޑީޕީން އިސްތިއުފާ ދެއްވުމަށްފަހު، އުފައްދަން މަސައްކަތް ކުރާ ޕާޓީއެކެވެ.
އެ ޕާޓީ ރަޖިސްޓްރީކުރުމަށް ބޭނުންވާ އަދަދަށް ފޯމު ހަމަކޮށް މިހާރު އިލެކްޝަން ކޮމިޝަނަށް ވަނީ ހުށައަޅާފަ އެވެ.
ޕާޓީ ރަޖިސްޓްރީ ވުމާއެކު، އެ ޕާޓީ ވެގެންދާނީ މަޖިލީހުގެ މައިނޯރިޓީ ޕާޓީއަށެވެ. އަދި އަންނަ ރިޔާސީ އިންތިޚާބުގައި ދި ޑިމޮކްރެޓްސްއިން ވާދަކުރާނެކަން މިހާރު އެ ޕާޓީން ވަނީ އިއުލާނުކޮށްފަ އެވެ.
Advertisement
This content is created and paid for by advertisers and does not involve Voice Journalists
