ކަސްޓަމަރުން ސްކޭމް އިން ރައްކާތެރިކުރުމަށާއި ސެކިއުރިޓީ އިތުރަށް ހަރުދަނާކުރުމަށް އަޅަމުންދާ ފިޔަވަޅުތަކުގެ ތެރެއިން އިތުރު ފިޔަވަޅެއްގެ ގޮތުން، ބޭންކް އޮފް މޯލްޑިވްސް (ބީއެމްއެލް) އިން ކުއްލި ހާލަތްތަކުގައި އިންޓަރނެޓް ބޭންކިންގ އަދި ކާޑުތަކުގެ ހިދުމަތް ކަސްޓަމަރު އަމިއްލައަށް ވަގުތުން މެދުކަނޑާލެވޭ 'ކިލް ސްވިޗް' ތައާރަފްކޮށްފިއެވެ.

މިކަމާއި ގުޅޭގޮތުން ބީއެމްއެލްއިން ނެރުން ބަޔާނެއްގައި ބުނެފައިވަނީ 'ކިލް ސްވިޗް' ބޭނުންކޮށްގެން ވަގުތުން އެކްޓިވްކޮށް ހުންނަ އިންޓަރނެޓް އަދި މޯބައިލް ބޭންކިންގ ސެޝަންތަކުން ލޮގްއައުޓްވެ، ސްކޭމެއް މެދުވެރިވާ ހާލަތްތަކުގައި އިތުރު މުއާމަލާތެއް ހިނގުމުގެ ކުރިން ކާޑުތައް ފްރީޒްކޮށްލެވޭނެ ކަމަށެވެ.

މިއާއިއެކު މި ފީޗަރ ކަސްޓަމަރުން ބޭންކަށް ގުޅައިގެން އެކްޓިވް ކުރުމުގެ ބަދަލުގައި އިންޓަރނެޓް ބޭންކިންގެ ލޮގިން ޕޭޖުގައި ކަސްޓަމަރަށް އަމިއްލައަށް ބޭނުންކޮށް ވަގުތުން އެކްޓިވާނެ ފަންކްޝަނެއް ކަމަށް ބީއެމްއެލްއިން ވަނީ ބުނެފައެވެ.

އެގޮތުން ކިލް ސްވިޗް އެކްޓިވޭޓް ކުރާނެ ގޮތް:

1. ބޭންކުގެ ވެބްސައިޓް www.bankofmaldives.com.mv އިން އިންޓަރނެޓް ބޭންކިންގ ލޮގިން ޕޭޖަށް ދާށެވެ.

2. 'ކިލް ސްވިޗް' އަށް ފިތާލާށެވެ.

3. އައިޑީ ކާޑު ނަންބަރު ޖަހާށެވެ.

4. ކޮންފަރމް ކުރުމަށް އޯޓީޕީ ޖަހާށެވެ.

ކިލް ސްވިޗް އެކްޓިވޭޓް ވުމުން، ސްކްރީން އަށް އަދި އެސްއެމްއެސް މެދުވެރިކޮށް ކޮންފަމޭޝަން ލިބޭނެއެވެ.

ބެންކް ވެބްސައިޓްގެ ލޮގިން ޕޭޖުން ކިލް ސްވިޗް ދައްކާލާފައި

ކިލް ސްވިޗް ކުރުމަށްފަހު، ކަސްޓަމަރުންނަށް އިންޓަރނެޓް ބޭންކިންގ އަދި ކާޑުތައް އަލުން ރީއެކްޓިވޭޓް ކުރެވޭނީ ކަސްޓަމަރުން ކޮންޓެކްޓް ސެންޓަރ ގުޅައިގެން އަށް ނުވަތަ އެންމެ ކައިރި ބްރާންޗަކަށް ހާޒިރުވެގެން ކަމަށް ބެންކް އިން ވަނީ ބުނެފައެވެ. އަދި ބޭންކުން އެކްޓިވޭޓް ކޮށްދޭނީ ވެރިފިކޭޝަން މަރުހަލާ އެއް ހިންގުމަށް ފަހުގައި ކަމަށް ބެންކުން ވަނީ ފާހަގަކޮށްފައެވެ.

ކިލް ސްވިޗްގެ އިތުރުން ބޭންކުން މިހާރުވެސް އިންޓަރނެޓް ބޭންކިންގ އަދި މޯބައިލް އެޕް ގައި ކާޑު ފްރީޒް/ އަންފްރީޒް ފީޗަރއެއް ވަނީ ގާއިމްކޮށްފައެވެ. މި ފީޗަރ މެދުވެރިކޮށް ކަސްޓަމަރުންނަށް ވަގުތީ ގޮތުން ކާޑު އިނެކްޓިވޭޓް ކުރެވޭނެއެވެ.

މިފާއިތުވި މަސްތަކުގައި ބޭންކުންވަނީ ކަސްޓަމަރުން ސްކޭމްއިން ރައްކާތެރިކުރުމަށް ގިނަގުނަ ފިޔަވަޅުތަކެއް އަޅާފައެވެ. އެގޮތުން؛

▪ މެއި މަހު ބޭންކުން ވަނީ އިންޓަރނެޓް އަދި މޯބައިލް ބޭންކިންގ ލޮގިންއަށް ޓޫފެކްޓަރ އޮތަންޓިކޭޝަން (2 އެފްއޭ) ތައާރަފްކޮށްފައެވެ. އަލަށް ގެނެވުނު އަޕްޑޭޓް އާއެކު، ލޮގިންވާ ފަރާތަކީ ރަޖިސްޓްރީވެފައިވާ ކަސްޓަމަރުކަން ޔަގީން ކުރުމަށްޓަކައި އިތުރު ސެކިއުރިޓީ ލެޔާއެއް އިތުރުކުރެވުނެވެ.

▪ މާރިޗު މަހު، އިންޓަރނެޓް އަދި މޯބައިލް ބޭންކިންގ އަށް ލޮގިން ކުރަން މަސައްކަތް ކުރާ ކޮންމެ ފަހަރަކު އެލާރޓް އަންނަގޮތް ހަމަޖައްސައި، ހުރިހާ ސްކޭން-ޓު-ޕޭ ޕޭމަންޓްތަކަށް ވަން ޓައިމް ޕާސްވޯޑް (އޯޓީޕީ) އިތުރުކުރެވުނެވެ.

▪ މިދިޔަ އަހަރު، ބޭންކުންވަނީ އޮތަންޓިކޭޓަރ އެޕްތައް މެދުވެރިކޮށް އޯޓީޕީ ލިބޭނެ ގޮތް ހަމަޖައްސައި، ޑިފޯލްޓް އޯޓީޕީ ޗެނެލް އެއްގޮތުގައި ކުރިން ގާއިމްކޮށްފައިވާ އީމެއިލް ހުއްޓާލާ އިންޓަރނެޓް އަދި މޯބައިލް ބޭންކިންގ މުއާމަލާތްތަކަށް ޕުޝް ނޯޓިފިކޭޝަން ފޮނުވަން ފައްޓާފައެވެ.

ބީއެމްއެލް އިން މިހާރު 325،000 ކަސްޓަމަރުންނަށް ހިދުމަތް ފޯރުކޮށްދެމުންދާއިރު، މުޅި ރާއްޖެ ހިމެނޭ ބޭންކިންގ ވިއުގަޔަކާއެކު 20 އަތޮޅުގައި 38 ބްރާންޗް، 87 ސެލްފްސަރވިސް ބޭންކިންގ ސެންޓަރ، 143 އޭޓީއެމް، 200 އަށް ވުރެ ގިނަ ކޭޝް އޭޖެންޓުންގެ އިތުރުން އެންމެ ޒަމާނީ އޮންލައިން ބޭންކިންގ ޚިދުމަތާއެކު ބީއެމްއެލްގެ ގެ އަމާޒަކީ އަމިއްލަ ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދިނުން ކަމަށް އެބެންކުން ވަނީ ބުނެފައެވެ.