ކަނޑުވިއްކި މައްސަލައިގައި ފުރިހަމަ އިންކުއަރީއެއް ހަދަންޖެހޭ ކަމަށް ރައްޔިތުންގެ މަޖިލީހުގެ ހިތަދޫ އުތުރު ދާއިރާ މެމްބަރު އަދި އެމްޑީޕީ ޕާލިމެންޓްރީ ގްރޫޕުގެ ލީޑަރު މުޙައްމަދު އަސްލަމް ވިދާޅުވެއްޖެ އެވެ.
އަސްލަމް މިހެން ވިދާޅުވީ ރޭ ޕީއެސްއެމްގެ ޕްރޮގްރާމެއްގައި ވާހަކަ ދައްކަވަމުންނެވެ.
އަސްލަމް ވިދާޅުވީ ކަނޑު ވިއްކާލިކަމަށް ބުނާ މައްސަލައިގައި، ކަން ހިނގިގޮތް ބެލުމަށްޓަކައި ރައްޔިތުންގެ މަޖިލީހުގެ ފަރާތުން ފުރިހަމަ އިންކުއަރީއެއް ހަދަންޖެހޭ ކަމަށެވެ.
ޗާގޯސް މައްސަލައިގައި އިދިކޮޅު ފަރާތްތަކުން ސަރުކާރަށް ބޮޑެތި ތުހުމަތުތައް ކުރާކަމަށް އަސްލަމް ވިދާޅުވިއެވެ. އަދި އެކަމާ ގުޅިގެން އެކި ގޮތްގޮތަށް ، ވަރަށް ހުރުރުކޮށް ބައެއް މީހުން ފަތުރަމުންދާ ވާހަކަތަކުގެ ތެދު ދޮގު ބަލައި އިންކުއަރީއެއް ހަދަން ޖެހޭކަމަށް ގަބޫލު ކުރައްވާ ކަމަށް އަސްލަމް ވިދާޅުވިއެވެ.
އަދި މަޖިލީހުގެ ކޮމެޓީތައް އަލުން އެކުލަވާލައި ނިމުމުން، މޮރިޝަސްއަށް ރައީސް ޞާލިހު ފޮނުއްވެވި ކަމަށް ބުނާ ސިޓީ ހޯދުމަށް މަސައްކަތް ކުރާނެ ކަމަށް އަސްލަމް ވިދާޅުވިއެވެ. ސިޓީ ލިބިއްޖެނަމަ މަޖިލީހުގެ 241 ކޮމިޓީން ބެލުމަށްފަހު ސިޓީ އާއްމު ކުރަން ޖެހޭ ނަމަ ކުރައްވާނެ ކަމަށްވެސް އަސްލަމް ވިދާޅުވިއެވެ.
ޗާގޯސް މައްސަލައިގައި އިދިކޮޅު ފަރާތްތަކުން ވަނީ ކަނޑު ވިއްކުމާ ދެކޮޅުގެ ނަމުގައި އިއްތިހާދެއް ހދާފައެވެ. އެ އިއްތިހާދުގައި ހިމެނެނީ އެމްއެންޕީއާ، ޕީޕީއެމް ޕީއެންސީ ކޯލިޝަނުގެ އިތުރުން ރިޔާސީ އިންތިޚާބުގައި ވާދަކުރައްވާނެކަން އިއުލާނު ކުރައްވާފައިވާ، ކުރީގެ ބަންޑާރަނައިބު ޑރ. މުޙައްމަދު މުނައްވަރާއި އުމަރު ނަސީރު ފަދަ ބޭފުޅުންނެވެ.
Advertisement
This content is created and paid for by advertisers and does not involve Voice Journalists
