ޖުމްހޫރީ ޕާޓީގެ ރިޔާސީ ޓިކެޓް އެޕާޓީގެ ލީޑަރު އަދި ޕާޓީގެ ރިޔާސީ ކެނޑިޑޭޓް ޤާސިމް އިބްރާހިމް އާއި ރޭ ހަވާލުކުރުމާއިއެކު ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދު މަރުހަބާ ދަންނަވާފިއެވެ.

ނަޝީދު ޤާސިމަށް މަރުހަބާ ދަންނަވާފައިވަނީ އެމަނިކުފާނު ކުރެއްވި ޓްވީޓެއްގައެވެ.

މި ޓްވީޓުގައި އެމަނިކުފާނު އިތުރަށް ފާހަގަކުރެއްވީ މިނިވަން އިންސާފްވެރި އިންތިޚާބް އަކަށް މަގުފަހި ކުރުމަކީ އެންމެންގެވެސް ވާޖިބެއް ކަމަށެވެ.

ރޭ ކަނިވާ ސަރަހައްދުގައި ބޭއްވުނު ހާއްސަ ހަފްލާއެއްގައި ޤާސިމަށް ވަނީ އެ ޕާޓީގެ ރިޔާސީ ޓިކެޓް ހަވާލުކޮށްފައެވެ. 

އެގޮތުން ޤާސިމަށް ރިޔާސީ ޓިކެޓު ހަވާލުކޮށްފައިވަނީ ޒުވާނުންނާއި، ދޮށީ އުމުރުގެ މީހުންނާއި އަންހެނުންނާއި އެކި އުމުރުފުރާގެ މީހުން ތަމްސީލުވާނެ ހެން އެއްބައެއްގެ އަތުން އަނެއް ބައެއްގެ އަތްމަތިން ޕާޓީގެ ސެކެޓްރީ ޖެނެރަލް އަލީ އާރިފްގެ އަތްޕުޅަށް އަރުވައިގެންނެވެ. 

ޤާސިމާއި ރިޔާސީ ޓިކެޓު ހަވާލުކުރެއްވީ ޕާޓީގެ ސެކެޓްރީ ޖެނެރަލް އާރިފެވެ. 

އެއާއެކު ޤާސިމް ވަނީ ރައްޔިތުންގެ އުންމީދުތަކުގައި ކުލަ ޖައްސާދިނުމަށް ރިޔާސީ އިންތިޚާބުގައި ޖޭޕީ ތަމްސީލުކުރެއްވުމަށް ޕާޓީން އެރުވި ރިޔާސީ ޓިކެޓު ޤަބޫލުފުޅު ކުރައްވާފަ އެވެ. އަދި އެ މަސައްކަތް ކުރުމަށް އޭނާ ތައްޔާރަށް ހުންނެވިކަމަށް ޓިކެޓު ޤަބޫލުފުޅު ކުރައްވަމުން ޤާސިމް ވިދާޅުވި އެވެ. 

ޤާސިމަށް ރިޔާސީ ޓިކެޓު ހަވާލުކުރުމަށް ބޭއްވި ރަސްމިއްޔާތުގައި ގިނަ އަދަދެއްގެ ބަޔަކު ވަނީ ބައިވެރިވެފައެވެ. 

މި ޖަލްސާގައި، ރިޔާސީ އިންތިޚާބުގައި ޖޭޕީން ގެންގުޅޭނެ ސްލޯގަންއާއި ރަސްމީ ލަވަ ވެސް ވަނީ ލޯންޗުކޮށްފަ އެވެ. އަދި މި ޖަލްސާގައި ޤާސިމްގެ ގައުމީ ޚިދުމަތާއި ގުޅޭ ޕްރޮފައިލް ރިޕޯޓެއް ވެސް ވަނީ ހުށައަޅާފަ އެވެ.