އެޑިއުކޭޝަން މިނިސްޓްރީއިން ހދ. މަކުނުދޫގައި އެޅުމަށް މަސައްކަތް ކުރާ މަލްޓިޕާޕޯސް ހޯލް އިމާރާތް ކުރާ އިންޑިއާ މުވައްޒަފުންނަށް މުސާރަ ނުލިބި 3 މަސް ވުމާއިއެކު އެ ރަށުގެ ކައުންސިލް އިދާރާއަށް ގޮސް އިހުތިޖާޖު ކުރަން ފަށައިފިއެވެ.

ހދ. މަކުނުދޫ ސްކޫލްގެ މަލްޓިޕާޕޮސް ހޯލް އިމާރާތް ކުރުމަށް މިނިސްޓްރީ އޮފް އެޑިއުކޭޝަންއިން ހަވާލުކޮށްފައިވަނީ އެއިމް ކޮންސްޓްރަކްޝަން ޕްރައިވެޓް ލިމިޓެޑް އާއެވެ.

އެގޮތުން އެކުންފުންޏާއި މިނިސްޓްރީއިން މަސައްކަތް ހަވާލުކުރުމުގެ އެގްރީމެންޓްގައި ސޮއިކޮށްފައިވަނީ މިދިޔަ އަހަރުގެ 20 އެޕްރީލް ގައެވެ. އަދި މަސައްކަތްކުރާ ފަރާތަށް ހޯލް އިމާރަތް ކުރާނެ ބިން ހަވާލު ކޮށްފައިވަނީ މިދިޔަ އަހަރުގެ 29 މޭ ގައެވެ.

މި މަސައްކަތް ހަވާލު ކުރެވުނީ 12،008،846.18 ރުފިޔާ އަށް 365 ދުވަހުގެ ތެރޭގައި ނިންމާ ގޮތަށެވެ.

އެހެންނަމަވެސް މަކުނުދޫގެ ނަން ހާމަ ކުރަން ބޭނުންނުވާ ރައްޔިތަކު "ވޮއިސް" އަށް މައުލޫމާތު ދެއްވަމުން ވިދާޅުވެފައިވަނީ ހޯލްގެ މަސައްކަތުގެ ނިންމުމަށް ހަވާލު ކޮށްފައިވާ މުއްދަތު ހަމަ ވެފައިވީ އިރުވެސް މަސައްކަތް ނުނިމޭ ކަމަށާއި އެ މަސައްކަތުގައި އުޅޭ މުވައްޒަފުންނަށް މިނިސްޓްރީއިން މުސާރަ ނުދޭ ކަމަށެވެ.

އެގޮތުން ރައްޔިތު މީހާ ވިދާޅުވީ އިންޑިއާއަށް ނިސްބަތްވާ މުޒާހަރާވެރިންގެ ޝަކުވާއަކީ އެމީހުންނަށް ފައިސާ ނުދިނުން ކަމަށާއި 3 މަސް ދުވަސް ވީއިރުވެސް އެ މުވައްޒަފުންނަށް ފައިސާ ދީފައިނުވާ ކަމަށެވެ.

އަދި މިކަމާއި ގުޅިގެން އެއިމް ކޮންސްޓްރަކްޝަން އިން ބުނެފައިވަނީ އެ ކުންފުންޏަށް އެޑިޔުކޭޝަން މިނިސްޓްރީއިން ފައިސާ ނުދޭ ކަމަށް ކަމުގައި އެމީހާ ވިދާޅުވިއެވެ.

"ދެން ކޮންޕެނީއިން ބުނަނީ މިނިސްޓްރީއަކުން ތިމަންނަ މެނަކަށް ފައިސާއެއް ނުދޭ. މިނިސްޓްރީއިން ފައިސާ ދީގެނެއްނޫންހޭ މުވައްޒަފުންނަށް ފައިސާ ދެވޭނީ." ރައްޔިތު މީހާ ކިޔާ ދެއްވިއެވެ.

އެއިމް ކޮންސްޓްރަކޝަންގެ މުވައްޒަފުން ކަންބޮޑުވުން ފާޅުކުރަނިކޮށް 'ވޮއިސް' އަށް ލިބިފައިވާ ވީޑިއޯއެއްގައި މުވައްޒަފަކު ވާހަކަދައްކަމުން ބުނެފައިވަނީ މުސާރަ ނުލިބުމުގެ ސަބަބުން އެމީހުންނަށް ވެސް އަދި އެމީހުންގެ އާއިލާތަކަށް ވެސް ކާން ނުދެވޭ ކަމަށެވެ. އަދި މުސާރަ ދިނުމަށް ސުޕަވައިޒާ ކައިރި ބުނުމުން މާލެ ދާން ބުނާ ކަމަށެވެ.

އެހެންނަމަވެސް ވަޒީފާ ދޫކޮށްލާފައި މާލެ ދާނީ ކިހިނެއްތޯ އެ މުވައްޒަފު ވަނީ ސުވާލު އުފައްދާފައެވެ.

މީގެ އިތުރުންވެސް ވާހަކަ ދެއްކި މުވައްޒަފަކު ބުނެފައިވަނީ އެމީހާ ރާއްޖެ އައިސް ފައިވަނީ 1 ލައްކަ އަށް ވުރެ ގިނަ ފައިސާ ހަރަދު ކޮށްގެން ކަމަށެވެ.

އެހެންކަމުން ވަޒީފާ ދޫކޮށްލާފައި ދިޔުމުން މުސާރަވެސް އަދި އަތުން ދިޔަ ފައިސާ ވެސް ނުލިބޭނެ ކަަމަށް އެ މުވައްޒަފު މީހާ ވީޑިއޯގައި ބުނެފައިވެއެވެ.

މަކުނުދޫއިން ވާހަކަދެއްކި ރައްޔިތު މީހާ އިތުރަށް ވާހަކަ ދައްކަވަމުން އެރަށު ސްކޫލްގެ މަލްޓިޕާޕޮސް ހޯލްގެ މަޝްރޫއު ދިގު ލައިގެން ގޮސް ދީފައިވާ ތާރީހަށް ނުނިންމުމުގެ ސަބަބުން ވަނީ ކަންބޮޑުވުން ފާޅު ކޮށްފައެވެ.

އެގޮތުން މި މަސައްކަތަކީ މިދިޔަ މަހު 26 އަށް ނިންމަން ދީފައިވާ މަޝަރޫއެއް ކަމަށާއި މި މުއްދަތު ހަމަވެ، މަސައްކަތް ފަށައިގެން އުޅޭތާ އެތައް ދުވަހެއް ވެފައިވީ ނަމަވެސް މިއަދާ ހަމައަށް ވެސް އަދި އެޅިފައިވަނީ އެ ތަނުގެ ފައުންޑޭޝަން އެކަނި ކަމަށް އޭނާ މައުލޫމާތު ދެއްވިއެވެ.

މި ސައިޓްގެ ފޮޓޯތަކެއް 'ވޮއިސް' އަށް ލިބިފައިވާއިރު މި ފޮޓޯ ތަކުން ފެންނަ ގަޮތުގައިވެސް ހޯލްގެ ހުރީ ހަމައެކަނީ ފައުންޑޭޝަން އެޅުމަށްޓަކައި ޖެހި ތަނބު ތަކެވެ.

މުވައްޒަފުންނަށް މުސާރަ ނުދީގެން ނުވަތަ އިހާނެތިކޮށް ހިތުމުގެ ސަބަބުން އިހްތިޖާޖު ކުރުން އަންނަނީ ރާއްޖޭގައި އިތުރު ވަމުންނެވެ. މީގެ ތެރޭގައި ބިދޭސީ މުވައްޒަފުންނާއި ދޭތެރޭ އިހާނެތިކޮށް ކަންކަން ކުރުމުގެ ސަބަބުން ކުރާ އިހުތިޖާޖުތައް މިހާރު ގިނަ ވަމުން އަންނަ ކަން ފާހަގަކުރެވެއެވެ.