ރައްޔިތުންގެ މަޖިލިސް ހުއްޓުވާފައިވަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އަންގަވައިގެން، ކަމަށާ، އެފަދައިން ކަން ކުރެއްވީ މައިގަނޑު ދެ ސަބަބެއް އޮވެގެން ކަމަށް މަޖިލީހުގެ މެދު ހެންވޭރު ދާއިރާގެ މެންބަރު ޢަލީ އާޒިމް ވިދާޅުވެއްޖެއެވެ.
ރައްޔިތުންގެ މަޖިލީހުގެ ސަރުކާރާއި ދެކޮޅު ޕާޓީތަކުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އާޒިމް ވިދާޅުވީ، ރައްޔިތުންގެ މަޖިލިސް ހުއްޓާފައިވަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އަންގަވައިގެން ކަމަށެވެ. އަދި އެމަނިކުފާނު އެފަދައިން އެންގެވީ މައިގަނޑު ދެ ސަބަބެއް އެކަމުގައި އޮވެގެން ކަމަށް އާޒިމް ވިދާޅުވި އެވެ. އެއީ؛
1) ސަރުކާރު ޖަވާބުދާރީ ކުރުމަށް ލިބޭ ފުރުސަތުތައް މަޖިލިސް ތެރެއިން ހުއްޓުވުން
2) އިންތިހާބު ތަކަށް، ސަރުކާރުން ނާޖާއިޒު ފައިދާ ނަގަމުންދާ ދިޔުމާއި ދެކޮޅަށް ވާހަކަދެއްކުން ހުއްޓުވަން
މިކަން ހަގީގަތުގައި ސަރުކާރުން ކުރަމުން މިދަނީ، ރައީސުލްޖުމްހޫރިއްޔާ އިސްވެ ހުންނަވައިގެން ކުރަމުން މިދަނީ ދެކަމެއް ހާސިލް ކުރަން. އޭގެ އެއްކަމެއްގެ ގޮތުގައި އަޅުގަނޑުމެންނަށް ފެންނަނީ ސަރުކާރު ޖަވާބުދާރީ ކުރުމަށް ލިބޭ ފުރުސަތުތައް މަޖިލިސް ތެރެއިން ހުއްޓުވުން، ނުވަތަ އެވާހަކަ މަޖިލިސް ތެރެއިން އަޅުގަނޑުމެން ދެއްކިޔަ ނުދޭން، ސަރުކާރުގެ ކޮރަޕްޝަނުގެ ވާހަކަ ތަކުރާރުކޮށް ދައްކަމުން އެބަދަން. މިރާއްޖެ ދަރަނިވެރިވާ ވާހަކަ ދައްކަމުން އެބަދަން އިސްރާފު ބޮޑުވަމުންދާތީ. ދެވަނަ ކަމަކަށް، އިންތިހާބު ތަކަށް، ނާޖާއިޒު ފައިދާ ސަރުކާރުން އެބަ ނަގަމުންދޭ. މިހާރުވެސް، ރައީސުލްޖުމްހޫރިއްޔާ ދަތުރު ކުރަމުން އެބަ ގެންދަވާ. ހަގީގަތުގައި، ރަސްމީ ދަތުރޭ ވިދާޅުވި ނަމަވެސް، އެ ކުރައްވަމުން ގެންދަވަނީ ކެންޕެއިން ދަތުރު ތަކެއްގެ ގޮތުގައި، އަޅުގަނޑުމެން އެންމެންވެސް ގަބޫލުކުރަން.
މެދު ހެންވޭރު ދާއިރާގެ މެންބަރު ޢަލީ އާޒިމް
މިއަދުގެ މަޖިލީހުގެ ޖަލްސާ އެމްޑީޕީ މެންބަރުން ހުއްޓުވީ މަޖިލީހުގެ ރިޔާސަތުގައި ވިލިފުށި ދާއިރާގެ މެންބަރު އިންނެވީ ގަވާއިދާއި ޚިލާފަށް ކަމަށް ބުނެ ކަމަށާ، އަދި ނައިބު ރައީސް އީވާ އަބްދުاللهގެ އިތުބާރު ނެތްކަމުގެ މައްސަލަ ނުބަލައި މަޖިލިސް ކުރިއަށް ނުގެންދެވޭނެކަމަށް ވިދާޅުވެ ކަން ފާހަގަކުރައްވައި އާޒިމް ވިދާޅުވީ، ރިޔާސަތު ބަލަހައްޓަވާނެ ފަރާތެއް ކަނޑައަޅާނެ ގޮތް މަޖިލީހުގެ ގަވާއިދުގައިވާ ކަމަށާ، އަދި އެކަންކަން ކުރިއަށް ދަނީ ގަވާއިދާއި އެއްގޮތަށް ކަމަށް އިދިކޮޅު ޕާޓީ ތަކުން ދެކޭ ކަމަށެވެ.
އަދި އެފަދައިން ކަން ހުރިއިރު، އެމްޑީޕީން މަޖިލީސް ކުރިއަށް ގެންދިޔުމާއި ދެކޮޅު ހަދައި މަޖިލީސް ހުއްޓުވުމަކީ ނިހާޔަތަށް ކަންބޮޑުވާ ކަމެއް ކަމުގައި އާޒިމް ވިދާޅުވިއެވެ.
އާޒިމް އިތުރަށް ވިދާޅުވީ މަޖިލީސް ހުއްޓުމަކަށް އައިސްފައިވާ އަނެއް ސަބަބަކީ ކޮމިޓީތައް އެކުލަވައި ނުލެވޭތީ ކަމަށެވެ. އެގޮތުން ވިދާޅުވީ، މަޖިލީހުގެ ކޮމިޓީތައް އުވިގެން ނުދާ ކަމަށާ، ނަމަވެސް ކޮމިޓީ ތަކުގައި މެންބަރުން ހިމެނޭ ނިސްބަތަށް އައި ބަދަލާއި އެކު ކޮމިޓީ ތަކުގައި ހިމެނޭ ޕާޓީތަކާއި އަމިއްލަ މެންބަރުންގެ ނިސްބަތާއި މެދު އެއްބަސް ނުވެވި، އަލުން ކޮމިޓީ އެކުލަވައި ނުލެވެނީ ކަމަށެވެ.
Advertisement
This content is created and paid for by advertisers and does not involve Voice Journalists
