ދަ ޑިމޮކްރެޓްސް ޕާޓީގެ ބައްދަލުވުމެއް ކުރިއަށް ދަނިކޮށް އެ ޕާޓީގެ ޖަގަހައަށް ކަޅުތެޔޮ ޖެހި މައްސަލަ ފުލުހުން ބަލަން ފަށައިފިއެވެ. 

ކުރިން އެމްޑީޕީ ހިންގި، އަދި މިހާރު ދަ ޑިމޮކްރެޓްސް އިން ބޭނުން ކުރަމުން އަންނަ ޖަގަހައަށް ސައިކަލްގައި ދިޔަ ބަޔަކު ރޭގައި ވަނީ ކަޅުތެޔޮ ޖަހާފައެވެ. 

އެކަމާއި ގުޅިގެން އެމްޑީޕީއަށް ތުހުމަތު ކުރައްވައި އެމްޑީޕީގެ ކުރީގެ ނައިބްރައީސް، ދަ ޑިމޮކްރެޓްސް އުފެއްދެވުމުގައި އިސްކޮށް އުޅުއްވާ މުހައްމަދު ޝިފާޒް ކުރެއްވި ޓްވީޓެއްގައި ވަނީ "ކޮތަޅޭމެންގެ ކަޅުތެޔޮ ކޮތަޅަކުން ސިހޭނެ ކަމަށް ހީވީތޯ؟" ސުވާލު ކުރައްވައި އެއީ ފިނޑި އަމަލެއް ކަމަށް ވިދާޅުވެފައެވެ. އަދި އެފަދައިން ކަން ކުރި ނަމަވެސް ފަހަތަށް ނުޖެހޭނެ ކަމަށް އޭނާ ވިދާޅުވި އެވެ.

Advertisement

މި މައްސަލާގައި ފުލުހުންގެ މީޑިއާ އޮފިޝަލް މިއަދު ވިދާޅުވީ، ޑިމޮކްރެޓްސް ގެ ޖަގަހައަށް ކަޅުތެޔޮ ޖެހި މައްސަލަ ރޭ ފުލުހުންނަށް ރިޕޯޓް ކޮށްފައިވާ ކަމަށެވެ. 

އަދި އެ މައްސަލަ އާއި ގުޅިގެން މިހާތަނަށް އެއްވެސް މީހަކު ހައްޔަރު ކޮށްފައި ނުވާ ކަމަށާ، އެ މައްސަލަ ތަހުގީގު ކުރަމުންދާ ކަމަށް އޮފިޝަލް ވިދާޅުވި އެވެ.