ނުކުޅެދުންތެރިކަން ހުންނަ ފަރާތްތަކަށްދޭ މާލީ އެހީގެ މިންވަރު މުރާޖަޢާކުރައްވައި، އިތުރު އިނާޔަތްތަކެއް ސަރުކާރުން ތަޢާރަފުކުރައްވާފައިވާއިރު, އިތުރު ކުރެވުނު އިނާޔަތްތައް ވަޒީފާ އަދާކުރާ، ނުކުޅެދުންތެރިކަން ހުންނަ ފަރާތްތަކަށް ވެސް، އެ މީހެއްގެ ހާލަތަށް ރިޢާޔަތް ކުރައްވައި ދެވޭނެ ކަމަށް ސަރުކާރުން ބުނެފިއެވެ. 

ނުކުޅެދުންތެރިކަން ހުންނަ ފަރާތްތަކަށްދޭ މާލީ އެހީގެ މިންވަރު މުރާޖަޢާކުރައްވައި، އިތުރު އިނާޔަތްތަކުގެ ތަފްޞީލު ހާމަކުރެއްވުމަށް ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި، ނުކުޅެދުންތެރިކަން ހުރި ފަރާތްތަކުގެ އިނާޔަތަށް އެ އައި ބަދަލު، ވަޒީފާގައި އުޅޭ އެފަދަ ފަރާތްތަކަށް ވެސް އަންނާނެތޯ ވަނީ ސުވާލު ކޮށްފައެވެ. 

އެސުވާލުގެ ޖަވާބު ދެއްވަމުން، އެންސްޕާގެ ސީއީއޯ މަރިޔަމް ޝަފީޤާ ވަނީ ނުކުޅެދުންތެރިކަން ހުންނަ ފަރާތަކީ ވަޒީފާއެއް އަދާކުރާ ފަރާތަކަށްވީތީ ލިބޭ އިނާޔަތަށް އެއްވެސް ބަދަލެއް ނާންނާނެ ކަމަށެވެ. 

Advertisement

ނުކުޅެދުންތެރިކަން ހުންނަ ފަރާތްތަކުގެ އިނާޔަތް ބޮޑުކުރުމާއި ގުޅިގެން، ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން، އާސަންދަ ކޮމްޕެނީ ޕްރައިވެޓް ލިމިޓެޑްގެ އެމްޑީ އިސްމާޢީލް އައްޒާމް ވަޖީހު ވިދާޅުވީ، ނުކުޅެދުންތެރިކަން ހުންނަ މީހުންގެ އެލަވަންސް އެންމެ މަދުން ލިބޭ މީހަކަށް ވެސް ޖޫން މަހުން ފެށިގެން 3000 ރުފިޔާ ލިބޭނެ ކަމަށެވެ. އަދި މި މަހުގެ އެ ފައިސާ މި މަސް ނިމުމުގެ ކުރިން ޖަމާކުރެވޭނެ ކަމަށްވެސް އޭނާ ވިދާޅުވި އެވެ. 

ނުކުޅެދުންތެރިކަން ހުންނަ ފަރާތްތަކަށް ވީތީ އެ ލިބޭ 3000 ރުފިޔާގެ އިތުރުން، ނުކުޅެދުންތެރިކަން ހުންނަ ފަރާތްތަކުގެ ތެރެއިން އަމިއްލައަށް ނޫޅެވޭ މީހުންނަށް 2000 ރުުފިޔާގެ އެލަވަންސެއް ދޭ ގޮތަށް އެފަދަ ފަރާތްތަކަށް ޖުމުލަ 5000 ރުފިޔާ ދެން ލިބޭނެ ކަމަށް އައްޒާމް ވިދާޅުވި އެވެ.

އަދި އަސާސީ ބޭނުންތަކަށް އާއްމުކޮށް ބޭނުންކުރަންޖެހޭ އިތުރު ތަކެތި ނުވަތަ ކޮންސިއުމަބަލްސް ހޯދުމަށް އެހީތެރިވުމުގެ ގޮތުން، އެފަދަ ފަރާތްތަކަށް ލިބޭ އެހެން އެލަވަންސް ގެ އިތުރުން ސެލްފް ކެއާރ އެލަވަންސް ގެ ގޮތުގައި އިތުރު 1000 ރުފިޔާ ލިބޭނެ ކަމަށްވެސް އައްޒާމް ވިދާޅުވި އެވެ. އެހެންކަމުން، ނުކުޅެދުންތެރިކަން ހުންނަ ފަރާތްތަކުގެ ތެރެއިން އަމިއްލައަށް ނޫޅެވޭ މީހުންނަށް ޖުމުލަ 6000 ލިބޭނެއެވެ. އަދި އެނޫން ފަރާތްތަކުގެ ތެރެއިންވެސް ކޮންސިއުމަބަލްސް ބޭނުންވާ ފަރާތްތަކަށް ނުކުޅެދުންތެރިކަން ހުންނަ ފަރާތްތަކަށް ވީތީ އެ ލިބޭ 3000 ރުފިޔާ އާއި އެކު ޖުމުލަ 4000 ރުފިޔާ ލިބޭނެއެވެ. 

މި އެލަވަންސް ތަކާއިއެކު، އެއް ގޭބިސީއެއްގައި ނުކުޅެދުންތެރިކަން ހުންނަ ތިން މީހުންނަށްވުރެ ގިނައިން ތިބި ނަމަ މީހުން ތިބި ނިސްބަތުން 1000 ރުފިޔާގެ އެލަވަންސެއް ވެސް ލިބޭނެކަންވެސް އައްޒާމް ފާހަގަކުރެއްވިއެވެ. 

މި ބަދަލުތަކާއި ގުޅޭ އިތުރު މަޢުލޫމާތު ބޭނުންނަމަ ނޭޝަނަލް ސޯޝަލް ޕްރޮޓެކްޝަން އެޖެންސީއިން އެ މަޢުލޫމާތު ފޯރުކޮށްދެއްވާނެކަމަށާއި، ނުކުޅެދުންތެރިކަން ހުރި ފަރާތްތަކުން އެފަރާތްތަކުގެ މަޢުލޫމާތު އަދާހަމަކުރެއްވުމަށް NDR ޕޯޓަލް (www.ndr.nspa.gov.mv) މެދުވެރިކޮށް އެ މަޢުލޫމާތު ޙިއްޞާކުރެއްވުމަށް ސަރުކާރުން ވަނި އެދިފައެވެ.