ހިއުމަން ރައިޓްސް ކޮމިޝަންގެ މެމްބަރު ޝިފާތު އަބްދުއްރައްޒާގު އިދިކޮޅު ކޯލިޝަންގެ ލީޑަޝިޕަށް ފިލައިގެން އެ ކޮމިޝަންގެ އިދާރައިން ނިކުތުމަށް މީހަކު ފޮނުވާ ޗެނަލް-13 ގެ ނިއުސް ހެޑް މަރިޔަމް އިއްސާދާއަށް ހަމަލާދިނުން ހަރުކަށި އިބާރާތުން ކުށްވެރިކޮށްފި އެވެ. 

އެކަމާއި ގުޅޭގޮތުން ޗެނަލް-13 އިން ނެރުނު ބަޔާނުގައި ބުނެފައިވަނީ 14 ޖޫން 2023 ވީ ބުދަ ދުވަހު އިދިކޮޅު ކޯލިޝަނުން ހިއުމަން ރައިޓްސް ކޮމިޝަން އޮފް ދަ މޯލްޑިވްސްގެ މެމްބަރުންނާއި ބައްދަލުކުރުމަށް އެ އިދާރާއަށް ވަޑައިގެން، އެތަނުގައި ހަރަކާތްތެރިވަމުން ދިޔައިރު، އެ ސަރަހައްދުގައި ހިނގަމުންދިޔަ ކަންކަން ކަވަރުކުރަމުން ދިޔައީ ޗެނަލް-13 ގެ ނިއުސް ހެޑް މަރިޔަމް އިއްސާދާ ކަމަށެވެ. 

އެ ކޮމިޝަންގެ މެމްބަރުންނާއި ބައްދަލުކުރުމަށް އިދިކޮޅު ކޯލިޝަނުން 5 ގަޑިއިރު އެޗްއާރުސީއެމްގެ އިދާރާގައި ހޭދަކުރައްވާފައިވާއިރު މަރިޔަމް އިއްސާދާ ވެސް އެ ހުރިހާ ވަގުތެއް ހޭދަކުރެއްވީ އެ ސަރަހައްދުގައި ކަމަށެވެ. 

އެހެން ނަމަވެސް، އޭނާ އެ ސަރަހައްދުގައި ހުންނަވަނިކޮށް ކޮމިޝަންގެ މެމްބަރު އައިމިނަތު ޝިފާތު އަބްދުއްރައްޒާގު އިދާރާއިން ނިކުމެވަޑައިގަންނަވަންދެން އެ ސަރަހައްދު ދޫކޮށްދިއުމަށް މަރިޔަމް އިއްސާދާއަށް އެކި ގޮތުން އިންޒާރުދީފައިވާކަމަށް ޗެނަލް-13 އިން ވަނީ ބުނެފައެވެ. 

އެގޮތުން އާދަމް ރިފާއު (ޑަމޭ) ކިޔާ މީހެއް މަރިޔަމް އިއްސާދާ އެ ސަރަހައްދުގައި ހުއްޓާ އައިސް ދަންނަ މީހެއްގެ ފޯނުކޯލެއްކަމަށް ބުނެ މަރިޔަމް އިއްސާދާ އާއި ފޯނު ހަވާލުކުރި ކަމަށާއި، އެ ވަގުތު ފިރިހެނަކު ފޯނުން ވާހަކަދައްކަމުން ހިއުމަން ރައިޓްސް ކޮމިޝަންގެ އިދާރާ ބޭރުގައި މީޑިއާ ހަރަކާތްތެރިވަމުން ދާތީ ޝިފާތު ބިރުން ނިކުމެވަޑައި ނުގެންނެވިގެން ހުންނެވިކަމަށް ބުނެފައިވާކަމަށް ޗެނަލް-13 ގެ ބަޔާނުގައި ހާމަކޮށްފައި ވެއެވެ. 

އެހެން ނަމަވެސް އެވަގުތު މަރިޔަމް އިއްސާދާ އަދާކުރަމުން ދަނީ ވަޒީފާގެ ޒިންމާއެއް ކަމަށާއި، އެ ޒިންމާއަށް ހުރަސްއެޅޭގޮތަށް ދޭ އެއްވެސް އިރުޝާދެއް ޤަބޫލުނުކުރާނެކަމަށް ބުނުމުން ފަހުން އިންޒާރު ދިނީ އާދަމް ރިފާއު ކަމަށް ބުނެފައި ވެއެވެ. 

ޗެނަލް-13 ގެ ބަޔާނުގައި ބުނެފައިވަނީ އާދަމް ރިފާއު ދީފައިވަނީ ނުސީދާ އިންޒާރުތަކެއް ކަމަށެވެ. އެހެން ނަމަވެސް މަރިޔަމް އިއްސާދާ އެ ސަރަހައްދުގެ މަންޒަރުތައް ކަވަރުކުރަމުން ދިއުމާއި ގުޅިގެން އޭނާ އާއި ކުރިމަތިލާ އެ މަންޒަރުތައް ކަވަރުކުރަމުން ދިޔަ ޗެނަލް-13 ގެ ފޯނު ޖަހައިގެންފައިވާކަމަށް ބުނެފައި ވެއެވެ. 

ޗެނަލް-13 އިން ބުނީ އެ ސްޓޭޝަންގެ ނިއުސް ހެޑް މަރިޔަމް އިއްސާދާއަށް ބިރުދައްކާ އިންޒާރުދީ، އޭނާގެ އަތުގައި އޮތް ފޯނު ޖަހައިގަނެ ދިން ހަމަލާއަކީ އެޗްއާރުސީއެމްގެ މެމްބަރު ޝިފާތު ވަގަށް އެ އިދާރާއިން ނިކުތުމަށް ފުރުސަތު ފަހިކުރުމަށް މިނިވަން މީޑިއާއަށް ހުރަސްއަޅާ ހިންގި ފިނޑި އަމަލެއް ކަމަށެވެ. 

އަދި އެކަން ހަރުކަށި އިބާރާތުން ކުށްވެރިކޮށް ރިފާއުގެ މައްސަލަ މޯލްޑިވްސް ޕޮލިސް ސާވިސްއަށާއި، ބްރޯޑްކާސްޓިން ކޮމިޝަނަށް ހުށައަޅާނެކަމަށް ޗެނަލް-13 އިން ވަނީ ބުނެފައެވެ.