ނުކުޅެދުންތެރިކަން ހުންނަ ފަރާތްތަކަށް ލިބޭ އިނާޔަތްތައް ބޮޑުވި ކަމުގައިވިޔަސް، އާސަންދަ ސްކީމްގެ ދަށުން ލިބޭ އެހީގެ އިތުރުން، އެފަދަ ފަރާތްތަކުގެ ހުންނަ ދަތިތަކަށް ބޭނުންވާ އިތުރު އެހީ ހޯދުމަށް އެންސްޕާގައި އެދެވޭނެ ކަމަށް ސަރުކާރުން ބުނެފިއެވެ. 

ނުކުޅެދުންތެރިކަން ހުންނަ ފަރާތްތަކަށްދޭ މާލީ އެހީގެ މިންވަރު މުރާޖަޢާކުރައްވައި، އިތުރު އިނާޔަތްތަކުގެ ތަފްޞީލު ހާމަކުރެއްވުމަށް ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި، ވާހަކަ ދައްކަވަމުން، އާސަންދަ ކޮމްޕެނީ ޕްރައިވެޓް ލިމިޓެޑްގެ އެމްޑީ އިސްމާޢީލް އައްޒާމް ވަޖީހު ވިދާޅުވީ ދިވެހިރާއްޖޭގެ ސިއްހީ ނިޒާމުގެ ތެރެއިން ބޭސްފަރުވާއަށް ޚަރަދު ހަމަޖައްސައިދިނުން އޮންނަނީ އާސަންދައިގެ ތެރެއިން ކަމަށެވެ.

އެގޮތުން އާސަންދައިން، ލިބިދޭ އެހީގެ އިތުރަށް، ނުކުޅެދުންތެރިކަން ހުންނަ ފަރާތަކަށް މާލީ ގޮތުން އިތުރުއެހީއެއް ބޭނުންވާ ކަމުގައިވާނަމަ، "ވިރަ" ފޯމު މެދުވެރިކޮށް އެންސްޕާ ގައި އެހީއަށް އެދުމުގެ ފުރުސަތު އޮންނާނެ ކަމަށް އައްޒާމް ވިދާޅުވި އެވެ.  

އައްޒާމް ވިދާޅުވީ، ބައެއް ފަރާތްތަކުން އެފަދަ މައުލޫމާތުތައް ހޯދައި، އެންސްޕާގެ އެހީ ހޯދަން އުޅުމުގެ ބަދަލުގައި، އެ މުއައްސަސާގެ ދިޔުމުގެ ކުރިން ރައްޔިތުންގެ އެހީ ހޯދުމަށް މަސައްކަތް ކުރައްވާ ކަމަށެވެ. އެފަދައިން ރައްޔިތުންގެ އެހީ ހޯދަން އެންމެ ފުރަތަަމަ އުޅުމުގެ ބަދަލުގައި، އެންސްޕާ އާއި އާސަންދައަށް ވަޑައިގެން، ނުވަތަ 1400 ނަންބަރަށް ގުޅައިގެން މައުލޫމާތު ހޯއްދެވުމަށް އައްޒާމް ވަނީ އެދިލައްވާފައެވެ. އެގޮތުން، އެ ނަންބަރަށް ގުޅައިގެން، އެ މީހަކަށް ދިމާވެފައިވާ މައްސަލައަށް އެހީ ލިބޭތޯ ބަލައި، އެކަމާއި ގުޅޭ މައުލޫމާތު ސާފު ކުރެއްވުމަށްވެސް އޭނާ ވަނީ އެދިލައްވާފައެވެ. 

އައްޒާމް ވިދާޅުވީ ސަރުކާރުގެ ބޭނުމަކީ އެހީއަށް ބޭނުންވާ ނުކުޅެދުންތެރިކަން ހުންނަށް އެފަދަ ފަރާތްތަކަށްވެސް ފުރިހަމަށް ގޮތުގައި އެހީ ފޯރުކޮށްދިނުން ކަމަށެވެ. އެހެންކަމުން، އެފަރާތެއްގެ ހުންނަ ނުކުޅެދުންތެރިކަމާއި، އޭގެ ސަބަބުން ދިމާވާދަތިތައް އެންސްޕާ ނުވަތަ އާސަންދަގެވެސް ސަމާލުކަމަށް ގެނެސް، އެކަން ހިއްސާ ކުރުމުން، އެކަމެއް ބަލައި، އެކަމާއި ގުޅިގެން ލިބެންޖެހޭ އެހީތެރިކަން ފޯރުކޮށްދެއްވަމުންދާނެ ކަމަށް އޭނާ ވިދާޅުވި އެވެ. 

މިއާއެކު އައްޒާމް ވިދާޅުވީ، އާސަންދަ އަދި އެންސްޕާ އިންވެސް މަސައްކަތް ކުރަމުންދާނީ ނުކުޅެދުންތެރިކަން ހުންނަ ފަރާތްތަކަށް ދެމުންދާ އެހީތެރިކަން އެންމެ ފުރިހަމައަށް ކުރިއަށް އޮތް ތަނުގައިވެސް ފޯރުކޮށްދިނުމަށް ކަމަށެވެ.

ނުކުޅެދުންތެރިކަން ހުންނަ މީހުންގެ ބޮޑުކުރި އެލަވަންސް އާއިއެކު އެންމެ މަދުން ލިބޭ މީހަކަށް ވެސް ޖޫން މަހުން ފެށިގެން 3000 ރުފިޔާ ލިބޭނެއެވެ.

ނުކުޅެދުންތެރިކަން ހުންނަ ފަރާތްތަކަށް ވީތީ އެ ލިބޭ 3000 ރުފިޔާގެ އިތުރުން، ނުކުޅެދުންތެރިކަން ހުންނަ ފަރާތްތަކުގެ ތެރެއިން އަމިއްލައަށް ނޫޅެވޭ މީހުންނަށް 2000 ރުުފިޔާގެ އެލަވަންސެއް ދޭ ގޮތަށް ވަނީ ނިންމާފައެވެ. އަދި އަސާސީ ބޭނުންތަކަށް އާއްމުކޮށް ބޭނުންކުރަންޖެހޭ އިތުރު ތަކެތި ނުވަތަ ކޮންސިއުމަބަލްސް ހޯދުމަށް އެހީތެރިވުމުގެ ގޮތުން، އެފަދަ ފަރާތްތަކަށް ލިބޭ އެހެން އެލަވަންސް ގެ އިތުރުން ސެލްފް ކެއާރ އެލަވަންސް ގެ ގޮތުގައި އިތުރު 1000 ރުފިޔާ ދިނުމަށްވެސް ސަރުކާރުން ވަނީ ނިންމާފައެވެ. 

މި އެލަވަންސް ތަކާއިއެކު، އެއް ގޭބިސީއެއްގައި ނުކުޅެދުންތެރިކަން ހުންނަ ތިން މީހުންނަށްވުރެ ގިނައިން ތިބި ނަމަ މީހުން ތިބި ނިސްބަތުން ކޮންމެ މީހަކަށް 1000 ރުފިޔާގެ އެލަވަންސެއް ވެސް ލިބޭ ގޮތަށް ވަނީ ހަމަޖެހިފައެވެ.