ބަނީ ހޯލްޑިންގްސް (ބީވީއައި) ލިމިޓެޑްގެ ފަރާތުން އީއައިއޭ މަރުޙަލާ ފުރިހަމަ ކުރުމަކާ ނުލައި ބ. ކުންފުނަދޫ (ސޮނެވާ ފުށި) ގެ ފަޅުތެރޭގައި ތޮށިބުރިތަކެއް ޖެހުމާއި މުރަކަ އާލާކުރުމުގެ މަސައްކަތް ފެށުމާއި ގުޅިގެން އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ) ގެ ފަރާތުން އެ ކުންފުނި ޖޫރިމަނާ ކޮށްފިއެވެ.
އީޕީއޭއިން ބުނީ، އެ މައްސަލަ ބަލައި އެ މައްސަލައާ ގުޅިގެން އެއްކުރެވުނު މަޢުލޫމާތުންނާއި، ދެފަރާތް ދެމެދު ބަދަލުކުރެވިފައިވާ ލިޔެކިޔުންތަކަށް ރިޢާޔަތްކުރުމުން، އީއައިއޭ މަރުޙަލާ ފުރިހަމަ ނުކޮށް މަސައްކަތް ފަށާފައިވާކަން އެ އޭޖެންސީއަށް ޔަގީން ކުރެވުނު ކަމަށެވެ.
އެހެންކަމުން، ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓު ހެދުމާބެހޭ ގަވާއިދުގެ ދަށުން، މިދިޔަ ހޯމަ ދުވަހު ބަނީ ހޯލްޑިންގްސް 20 ހާސް ރުފިޔާއިން ޖޫރިމަނާ ކޮށްފައި ވާނެ ކަމަށް އީޕީއޭއިން ބުންޏެވެ.
އަދި އެ ފައިސާ އެއް މަސް ދުވަހުގެ ތެރޭގައި ދައްކާ ނިންމުމަށް އީޕީއޭއިން ވަނީ އެ ކުންފުންޏަށް އަންގާފައެވެ.
"ސޮނެވާ ފުށިގެ ފަޅުތެރޭގައި ތޮށިބުރިތަކެއް ޖެހުމާއި މުރަކަ އާލާކުރުމަށް މިހާރު ކުރެވިފައިވާ މަސައްކަތްތަކާއި އެ މަސައްކަތްތަކާއި ގުޅިގެން މިހާރު ރަށުގެ ތިމާވެށީގެ ހާލަތު އީއައިއޭ ކޮންސަލްޓަންޓެއް މެދުވެރިކޮށް ވަޒަންކުރުމަށްފަހު އެކަމާގުޅޭ ރިޕޯޓެއް 30 ދުވަހުގެ ތެރޭގައި ހުށަހެޅުއްވުމަށްވެސް ވަނީ ދަންނަވާފައި" އީޕީއޭއިން ބުންޏެވެ.
Advertisement
This content is created and paid for by advertisers and does not involve Voice Journalists
