ދިވެހިރާއްޖޭގެ ތަރައްގީގެ އެންމެ ބޮޑު ބައިވެރިއަކަށް އަދިވެސް ވާނީ ޗައިނާ ކަމަށް ޕީޕީއެމްގެ ނައިބު ރައީސް އަދި ރައްޔިތުން މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވެއްޖެއެވެ.
އެގޮތުން އިއްޔެ ޝިޔާމް ކުރެއްވި ޓްވީޓުގައި އިތުރަށް ވިދާޅުވީ ޗައިނާގެ ބެލްޓް އެންޑް ރޯޑް އިނީޝިއޭޓިވް (ބީއާރްއައި) ގެ ދަށުން ރާއްޖޭގައި ތަރައްގީގެ އިތުރު މަޝްރޫއުތައް ފެންނަން ބޭނުންފުޅުވާ ކަމަށެވެ.
އަދި ޝިޔާމް ވަނީ ޗައިނާއާއި ރާއްޖެއާއި ދެމެދު އޮންނަ ގުޅުމުގެ ސަބަބުން ރައްޔިތުންނަށް ލިބުނު ފައިދާގެ މިސާލެއްގެ ގޮތުގައި ސިނަމާލެ ބްރިޖް ނަންގަވާފައެވެ.
މިއާއިއެކު މި ބްރިޖްގެ ސަބަބުން ދިރިއުޅުމަށް ހުރިހާ ގޮތަކުންވެސް ފަސޭހަތަކެއް ލިބިގެން ދިޔަކަން ޔަގީން ކަމަށް ޝިޔާމް ވިދާޅުވިއެވެ.
ކުރީގެ ރައީސް ޔާމީނުގެ ސަރުކާރުގެ ގިނަ މަޝްރޫއުތައް ހިންގާފައިވަނީ ޗައިނާގެ ކުންފުނިތަކުގެ އެހީގައި، އެ ގައުމުން ލޯން ނަގައިގެންނެވެ. މީގެ ތެރޭގައި ޗައިނާއާއި ރާއްޖޭގެ އެކުވެރިކަން ރަމްޒު ކޮށްދޭ ބްރިޖް ކަމުގައިވާ ސިނަމާލެ ބްރިޖް ހިމެނެއެވެ.
އެހެން ނަމަވެސް ރައީސް ޞާލިހް ގެ ސަރުކާރުގައި ގިނަ މަޝްރޫއުތައް ހިންގަމުން ދަނީ އިންޑިއާގެ އެހީގައި އެ ގައުމުގެ ކުންފުނިތަކާއި ހަވާލުުކޮށްގެން އެ ގައުމުން ލޯން ނަގައިގެންނެވެ. އެގޮތުން ތިލަމާލެ ބްރިޖްގެ މަސައްކަތް ކުރިއަށް ދަނީ އިންޑިއާގެ އެފްކޮންސް ކުންފުންޏާއި ހަވާލު ކޮށްގެންނެވެ.
Advertisement
This content is created and paid for by advertisers and does not involve Voice Journalists
