ޖުމްހޫރީ ޕާޓީ (ޖޭޕީ)ގެ ލީޑަރ އަދި މާމިގިލީ ދާއިރާގެ މެމްބަރު ގާސިމް އިބްރާހިމްގެ މަގްބޫލުކަން ފެނި ސިޔާސީ ވާދަވެރިން ކަންބޮޑުވާން ފަށައިފި ކަމަށް އެ ޕާޓީއަށް ދާދިފަހުން ގުޅިވަޑައިގެންނެވި ކްރިމިނަލް ކޯޓުގެ ކުރީގެ އިސް ގާޒީ އަހުމަދު ހައިލަމް ވިދާޅުވެއްޖެއެވެ.

ހައިލަމް މިހެން ވިދާޅުވެފައިވަނީ ކުރީގެ ޓެކްނޮލޮޖީ މިނިސްޓަރ މުހައްމަދު މަލީހު ޖަމާލު ޖޭޕީއަށް ފާޑު ވިދާޅުވަމުން ޤާސިމަށް އެންމެ ރަނގަޅުވާނީ ތިޖޫރީ ނުހުޅުވާ ތާއީދު ހޯދުން ކަމަށް ވިދާޅުވެ އިއްޔެ ކުރެއްވި ޓްވީޓަށް ރައްދު ދެއްވަމުންނެވެ.

އެގޮތުން މަލީހަށް ރައްދު ދެއްވާ ޖޭޕީގެ ހާއްސަ އެޑްވައިޒަރ އިރުތިޝާމް ކުރި ޓްވީޓަށް ބާރުދެއްވަމުން ހައިލަމް ވިދާޅުވީ ޖޭޕީގެ ލީޑަރުގެ މަގުބޫލުކަން ފެނި ސިޔާސީ ވާދަވެރިން ކަންބޮޑުވާން ފަށައިފި ކަމަށެވެ.

Advertisement

އަދި ދައްކާނެ ވާހަކަ ހުސްވެގެން ޤާސިމް އާއި ޖުމްހޫރީ ފިކުރުގެ ބޭފުޅުންނާއި ސިޔާސީ ވާދަވެރިން ޒާތީ ވާން ފަށާފައިވާ ކަމަށެވެ.

އެހެންނަމަވެސް ޖޭޕީގެ ރިޔާސީ ކެނޑިޑޭޓް ޤާސިމް މި އިންތިޚާބު ބޮޑު ތަނުން ކާމިޔާބު ކުރާނެ ކަމަށް ހައިލަމް ވިދާޅުވިއެވެ.

ޤާސިމް އަށް ރިޔާސީ ޓިކެޓް ހަވާލު ކޮށްފައިވަނީ މިދިޔަ ހަފްތާގެ ހުކުރު ދުވަހު ބޭއްވުނު ޙާއްސަ ހަފްލާއެއް ގައެވެ. މި ހަފްލާއަށްފަހު ގާސިމްއަށާއި އޭނާގެ ޕާޓީއަށް ރައްދުކޮށް އެތަކެއް ފާޑު ކިޔުންތަކެއް ދަނީ އަމާޒު ވަމުންނެވެ.