ކުރިއަށް އޮތް ބަރަކާތްތެރި އަޟުހާ ޢީދު ފާހަގަކުރުމަށް، ހަތަރު ލައްކަ ރުފިޔާ ޚަރަދު ކޮށްގެން، އިންޑިއާގެ މިއުޒިކް ކުޅޭ ބޭންޑެއް ގެނައުމަށް ހއ. ކެލާ ކައުންސިލުން ނިންމުމާއި ގުޅިގެން، ގިނަ ބައެއްގެ ފާޑުކިޔުންތައް އެ ކައުންސިލަށް އަމާޒުވެއްޖެ އެވެ. 

އެކަން އަންގައި ކެލާ ކައުންސިލްގެ ފޭސްބުކް ޕޭޖުގައި ވަނީ ބޮޑު އީދަށް އިންޑިއާގެ ބޭންޑް ގެނައުމަށް ބަޖެޓު ސީލިންގގެ ގޮތުގައި 400،000 ރުފިޔާ ހަމަޖެއްސުމަށް އެކައުންސިލްގެ ހަތަރުވަނަ ދައުރުގެ 101 ވަނަ އާއްމު ބައްދަލުވުމުގައި ނިންމާފައިވާ ކަމަށެވެ. 

ކެލާ ކައުންސިލްގެ ފޭސްބުކް ޕޭޖުގެ ޕޯސްޓް

މިކަމާއި ގުޅިގެން ނުރުހުން ފާޅުކޮަށް ކޮމެންޓު ކުރި ގިނަ މީހުން ވަނީ އެއީ ބޮޑު އިސްރާފެއް ކަން ފާހަގަކޮށް، އެގޮތަށް އިންޑިއާގެ ބޭންޑެއް އީދު ޝޯއަށް ގެނައުމަށް ވުރެ މުހިންމު ކަންކަން ރަށުގެ ތަރައްގީއަށް އެ ހަތަރު ލައްކަ ރުފިޔާއިން ކުރެވިދާނެ ކަމަށް ބުނެފައެވެ. 

އަދި ބަރަކާތްތެރި ވެގެންވާ ޢީދެއް ފާހަގަ ކުރުމަށް އެފަދަ ހަރާން ކަންކަން ކޮށް ރައްޔިތުންނަށް ދުނިޔެއާއި އާޚިރަތުގައި ވެސް ގެއްލުންވަނިވި ގޮތަކަށް ރައްޔިތުންގެ ފައިސާ ބާތިލް ކޮށްގެން ނުވާނެ ކަމަށާ އެ ނިންމުން ބާތިލް ކުރުމަށްވެސް އެދިފައިވެއެވެ. 

ރަށަށް ފައިދާވާ ކަންކަން ކުރުމަށް ކައުންސިލްތަކުގައި ބަޖެޓް ނެތް ކަމަށް ބުނާއިރު، އެފަދަ ކަންކަމަށް ބޮޑު ބަޖެޓެއް ކަނޑައެޅުމުން އެއިން އެނގެނީ ކައުންސިލް ބޭނުން ކަންކަމަށް ބަޖެޓު ހުންނާނެ ކަން ކަމަށްވެސް ބައެއް މީހުން ވަނީ ބުނެފަ އެވެ. 

"ތިކަމުން ދޭހަވަނީ ރަށަށް ފައިދާހުރި އެހެން ކަންކަން ކުރަންވެސް ކައުންސިލުން ބޭނުންވެއްޖެ ނަމަ ބަޖެޓު ލިބޭނެކަން،" އެކަމާ ގުޅިގެން ފޭސްބުކްގައި މީހަކު ކުރި ކޮމެންޓެއްގައި ބުނެފައިވެ އެވެ.

"ތި ފައިސާ ރައްޔިތުންނަށް ބެހިޔަސް މާ ރަނގަޅުވާނެ،"

"ތި ލާރިން ކުރާނެ ކަމެއް ނޭނގެންޏާ ރަށު ބޮޑު މިސްކިތު އޭސީ ހަރުކޮށްބަލަ. މިއުޅެނީ އިންޑިޔާ ބޭންޑު ނުގެނެވިގެންދޯ؟"

"ރައްޔިތުންގެ ލާރި ހޭދަކުރި ގޮތާއިމެދު ސުވާލު ވެވޭނެ ދުވަހެއް އަންނާނެކަމާމެދު، ރައްޔިތުން މަތިކޮށްފައިތިބޭ އިސްވެރިން ވިސްނާލަންޖެހޭ. ތިމާ މެންނަށް ލިބިފައިވާ އަމާނާތާމެދު ފަރުވާ ކުޑަކޮށް ނުލާ"

ކެލާ ކައުންސިލްގެ ނިންމުމާ ގުޅިގެން ބައެއް މީހުން ކުރި ކޮމެންޓްތަކުގައި ބުނެފައިވެ އެވެ.