މަޖިލީހުގެ ރައީސް މުޙައްމަދު ނަޝީދަށް ޖެހިވަޑައިގަންނަވާނީ މަޖިލީސް ހުއްޓާ ނުލައްވާ ހިންގަން ކަމަށާއި، އެ ޒިންމާ އަދާ ނުކުރެވޭނަމަ އިސްތިއުފާދެއްވުމަށް އެމްޑީޕީގެ ޕާލަމެންޓްރީ ގުރޫޕުގެ ލީޑަރު މުޙައްމަދު އަސްލަމް ވިދާޅުވެއްޖެ އެވެ.
އަސްލަމް މިފަދައިން ވިދާޅުވެފައިވަނީ އެމްޑީޕީގެ ޕާލަމެންޓްރީ ގުރޫޕުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ނެވެ.
އަސްލަމް ވިދާޅުވީ މަޖިލީހުގެ ރައީސާއި ނައިބު ރައީސްގެ މައްސަލަ މަޖިލީހަށް ހުށައަޅާފައި އޮތުމަކީ މަޖިލީސް ހުއްޓުވާލަން ޖެހޭ ކަމެއް ނޫން ކަމަށެވެ.
މަޖިލީހުގެ ރިޔާސަތު ބަލަހައްޓަވަން އުޒުރުވެރިވާ ކަމަށް ވިދާޅުވެ މިހާރުވެސް މަޖިލީހުގެ ރައީސް މަޖިލީހުގެ އެހެނިހެން މަސައްކަތްތަކުގައި އުޅުއްވާކަމަށް އޭނާ ވިދާޅުވި އެވެ.
އަސްލަމް ވިދާޅުވީ މަޖިލީހުގެ ރައީސާއި ނައިބު ރައީސްގެ މައްސަލަ އެއްވަގުތެއްގައި ހުށައަޅައިގެން ކުރިއަށް ގެންދެވޭނެ ގޮތަށް މަޖިލީހުގެ ގާނޫނު އިސްލާހުކުރުމަށް ވެސް ހުށައަޅާފައިވާ ކަމަށެވެ.
އެހެން ނަމަވެސް ރައީސް ނަޝީދު އެ މައްސަލަތައް އެޖެންޑާވެސް ކޮށްނުދެއްވާ މަޖިލީސް ހުއްޓުވާފައި އޮތުމަކީ ވަރަށް ހިތާމަކުރާ ކަމެއްކަމަށް އޭނާ ވިދާޅުވި އެވެ.
އެއާއެކު އަސްލަމް ވިދާޅުވީ މަޖިލީހުގެ މަސައްކަތްތައް ހުއްޓުވުމުގެ ބާރު އެއްވެސް ފަރާތަކަށް ލިބިވަޑައި ނުގަންނަވާ ކަމަށެވެ.
ރައީސް ނަޝީދުވެސް މަޖިލީހުގެ ރައީސްކަމުގައި ހުންނަވާހާ ހިނދަކު ޖެހިވަޑައިގަންނަވާނީ މަޖިލީސް ހިންގަން ކަމަށާއި، އެ ޒިންމާ އަދާ ނުކުރެވޭނަމަ ދެން ރަނގަޅުވާނީ އިސްތިއުފާ ދެއްވުންކަމަށް އަސްލަމް ވިދާޅުވި އެވެ.
"ރައްޔިތުންގެ މަޖިލީސް ޖެހޭނީ ހިންގަން... ޒިންމާ އާއި މަސްއޫލިއްޔަތު އަދާ ނުކުރެވެންޏާ ވަރަށް ރީތި ގޮތެއް އޮވެޔޭ. ޒިންމާ އާއި މަސްއޫލިއްޔަތު އަދާނުކުރެވެންޏާ އޮންނަނީ މަސްއޫލިއްޔަތުތަކުން އެއްފަރާތްވުން، ބަރީއަވުން. އެ އާންމު ބަހުން މި ދަންނަވަނީ އިސްތިއުފާ ދިނުން"
އެމްޑީޕީގެ ޕީޖީ ލީޑަރު އަސްލަމް
އަސްލަމް ވިދާޅުވީ ރައީސް ނަޝީދަށް މަޖިލީހުގެ މެޖޯރިޓީ މެމްބަރުން އިތުބާރު ނުކުރައްވާކަމަށެވެ.
އެހެންކަމުން ނަޝީދު މިވަގުތު މަޖިލީހުގެ ރައީސްގެ ގޮތުގައި ހުންނެވުމަކީވެސް ހަގީގަތުގައި ގައުމަށް އެންމެ ފައިދާ ހުރި ގޮތް ނޫންކަމަށް އަސްލަމް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
