ބޮޑުންނަށާއި ނިކަމެތިި ރައްޔިތުންނަށް ވަކި ގޮތެއް އޮންނަ ކަމަށާއި މިމިންވަރަށް ރައްޔިތުންގެ މެދުގައި ތަފާތުކުރާ ވެރިކަމެއް އަދި ނާންނަ ކަމަށް ވިލިމާލެ ދާއިރާގެ މެމްބަރު އަހްމަދު އުޝާމް ވިދާޅުވެއްޖެއެވެ.

އުޝާމް މިހެން ވިދާޅުވީ ބ. ބޮޑު ފިނޮޅުގައި ރިސޯޓެއް ހަދަން ގެނައި ބިދޭސީންނާ މެދު އަމަލުކުރި ގޮތާ ގުޅުވައި، ރައްޔިތުންގެ މަޖިލީހުގެ މިލަންދޫ ދާއިރާގެ އެމްޑީޕީ މެމްބަރު އަލީ ރިޒާއަށް ކުރި ހިއުމަން ޓްރެފިކިންގެ ކުށުގެ ދައުވާތައް އަނބުރާ ގެންގޮސްފައިވާ ކަން އެމެރިކާ ސަރުކާރުގެ "ޓްރެފިިކިން އިން ޕާސަންސް ރިޕޯޓް" ގައި ފާހަގަކޮށްފައިވާތީއެވެ.

އެގޮތުން ރިޒާގެ މައްޗަށް ކޮށްފައިވާ ދައުވާ އަނބުރާ ޕްރޮސެކިއުޓަރ ޖެނަރަލްސް އޮފީހުން ގެންގޮސްފައި ވަނީ އެ ދަައުވާގައިވާ ކަންތައްތައް ސާބިތު ނުކުރެވޭނެތީ ކަމަށް ބުނެއެވެ.

Advertisement

މިކަމަށް އަލިއަޅުވާލައި އުޝާމް ކުރެއްވި ޓްވީޓުގައި ވިދާޅުވީ ވަޒީރުންނާއި ސަރުކާރުގެ މަޖިލިސް މެންބަރުންގެ މައްޗަށް ކޮށްފައިވާ ޖިނާއީ ދަޢުވާތައް "ސާބިތު ނުކުރެވޭނެތީ" ކަމަށްބުނެ ދައުވާތައް އަނބުރާ ގެންދާ ކަމަށެވެ.

އަދި ބަދަލުދޭ މައްސަލަތައް ޝަރީއަތުގައި "ސާބިތުވާނެތީ" ކަމަށް ބުނެ ރައްޓެހިންނަށް ކޯޓުން ބޭރުގައި މިލިއަނުން ފައިސާ ބަހާ ކަމަށެވެ.

"ބޮޑުންނަށް ވަކިގޮތެއް. ނިކަމެތި ރައްޔިތުންނަށް ވަކިގޮތެއް. މިމިންވަރަށް ރައްޔިތުންގެ މެދުގަ ތަފާތުކުރާ ވެރިކަމެއް އަދި ނާދޭ." ސަރުކާރަށް ފާޑު އަމާޒު ކުރައްވަމުން އުޝާމް ވިދާޅުވިއެވެ.