ރައްޔިތުންގެ މަޖިލީހުގެ ގައުމީ ސަލާމަތާއި ބެހޭ ކޮމިޓީ, 241 ކޮމިޓީގެ މަސައްކަތް ކުރިއަށް ނުގޮސް ހުއްޓުވާފައި އޮތުމަކީ ހެޔޮ ވާ ވަރުގެ ކަމެއް ނޫން ކަމަށް އިހަވަންދޫ ދާއިރާގެ މެންބަރު މުހައްމަދު ޝިފާއު ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާގައި އެޖެންޑާ ކުރެވި ބަހުސް ކުރެވެމުންދަނީ ކޮމިޓީތައް އެކުލަވާލުމާއި ގުޅޭގޮތުންނެވެ. އެކަން ނުނިމެނީސް މަޖިލީސް ޗުއްޓީއަށް ނުދިޔުމަށް މެޖޯރިޓީ ލީޑަރ އަސްލަމް މަޖިލީހުގެ ރައީސް މުހައްމަދު ނަޝީދުގެ އަރިހުން ވަނީ އެދިލައްވާފައެވެ.
އެހެންނަމަވެސް، ޖަލްސާ ފައްޓަވަމުން ރައީސް ނަޝީދު ވަނީ، މިއަދަކީ، މިދައުރުގެ ފަހު ޖަލްސާ ކަމާއި، މިއަދަށްފަހު މަޖިލީސް ޗުއްޓީއަށް ދާނެކަން އިއުލާން ކުރައްވާފައެވެ.
އެކަމާއި ގުޅިގެން މަޖިލީހުގެ ތަޅުމުގައި ވާހަކަދައްކަވަމުން ޝިފާއު ވަނީ، މި ދައުރުގެ އިތުރު ޖަލްސާއެއް ބާއްވައިގެން ނަމަވެސް، ކޮމިޓީތަކާއިމެދު ގޮތެއް ނިންމުމަށް އަސްލަމް ހުށަހެޅުއްވި ހުށަހެޅުމަށް ތާއީދު ކުރައްވާ ވާހަކަ ދައްކަވާފައެވެ.
މިއަދު މެންދުރު ފަހުވެސް އަޅުގަނޑުމެންނަށް އިތުރު ޖަލްސާއެއް ބޭއްވިދާނެ. ބާއްވާފައި މިކޮމިޓީތަކާއި ދޭތެރެގައި ގޮތެއް އަޅުގަނޑުމެން ނިންމާފައި ނުނިއްޔާ މަޖިލީސް ޗުއްޓީއަށް ދިޔުމަކީ، ގައުމެއްގެ ހައިސިއްޔަތުން މި ގައުމުގައި ކުރަން ނުވާ ވަރުގެ ނުރައްކާތެރި ކަމެއްގެ ގޮތުގައި އަޅުގަނޑަށް ފާހަގަވޭ. އެނގުވަޑައިގަންނަވާނެ، 241 ކޮމިޓީވެސް އެ އޮތީ އެހެން ކޮމިޓީތައް އޮތް ހާލުގައި... މި ގައުމުގައި މިއަދުވެސް މާދަމާވެސް ކިތަންމެ ނުރައްކާތެރި ކަމެއްވެސް ހިނގާފާނެ. ރައްޔިތުންގެ މަޖިލީހުގެ މެންބަރުންނަކީ ރައްޔިތުންގެ ފަރާތުން އެކަންކަމަށް ފާރަވެރިވެ، ޖަވާބުދާރީވެ، އެކަންކަން ހިނގާފައިވާގޮތް ބަލަންޖެހޭ ފަރާތް. އެހެން ނަމަވެސް، މަޖިލީހުގެ 241 ކޮމިޓީ ހުއްޓިފައި އޮންނަ އޮތުމަކީ އެންމެ ދުވަހަކުވެސް އަޅުގަނޑުމެން އެކަމަށް އެކޮމޮޑޭޓް ކޮށްގެން އެކަން ބަލައިގަނެގެންތިބެން މަރު ހެޔޮ ނުވާނެ ކަމެއް.
އިހަވަންދޫ ދާއިރާގެ މެންބަރު މުހައްމަދު ޝިފާއު
އެހެން ކަމުން ޝިފާއު ވިދާޅުވީ، ޗުއްޓީއަށް ދިޔުމުގެ ކުރިން، 241 ކޮމިޓީއާއި އެހެން ކޮމިޓީތަކުގެ ބައްދަލުވުންތައް ބޭއްވޭނެ ގޮތެއް ހަމަނުޖެހެނީސް ޗުއްޓީއަށް ގޮސްފިނަމަ، ރައްޔިތުންގެ މަޖިލީހުން ރައްޔިތުންނަށް ޚިޔާނާތްތެރި ވީ ކަމަށް ވާނެކަމަށެވެ.
މިއާއެކު ޝިފާއު ވިދާޅުވީ، ރައްޔިތުންގެ މަޖިލީހުގެ މެޖޯރިޓީ އެމްޑީޕީން ހޯދީ، މެޖޯރިޓީ ލީޑަރ މުހައްމަދު އަސްލަމް ދެއްވީމަ ނޫން ކަމަށާ، އެއީ ރައްޔިތުންގެ ވޯޓުން ނިންމެވި ނިންމުމެއް ކަމަށެވެ. އެހެންކަމުން، މަޖިލީހުގެ މައިނޯރިޓީ އިންވެސް، އެހެން މެންބަރުންވެސް އެކަން ގަބޫލު ކުރަންޖެހޭނެ ކަމަށް ޝިފާއު ވިދާޅުވި އެވެ.
އަދި މަޖިލީހުގެ ކަންކަން މަޝްވަރާގެ މަތިން ކުރިއަށް ގެންދިޔުމަކީ ރަނގަޅު ގޮތް ކަމަށް ބަލައި، މެޖޯރިޓީ ލީޑަރގެ ހައިސިއްޔަތުން، މައިނޯރިޓީ އަށް ދެވެން އޮތް ހުރިހާ ދުލެއް އަސްލަމް ދެއްވާފައިވާކަމަށް ޝިފާއު ވިދާޅުވިއެވެ. އެހެންނަމަވެސް އެއް ކަމުގައި ދޫ ދެއްވާ އިރަށް އަނެއް ކަމެއް ނަންގަވައި، މައިނޯރިޓީން މަސައްކަތް ކުރައްވަމުން ދިޔައީ ކޮމިޓީތައް ހިނގާނެ ގޮތެއް ހޯދައި ދެވުނަ ނުދޭން ކަމަށްވެސް ޝިފާއު ވިދާޅުވިއެވެ. އަދި އެއީ ރައްޔިތުންނަށް ވެވޭ ޚިޔާނާތެއް ކަމަށްވެސް އޭނާ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
