ވެލާނާ އިންޓަރނޭޝަނަލް އެއާޕޯޓްގައި ތޮއްޖެހުން ކުޑަކުރުމަށްޓަކައި ފަސިންޖަރުން އެއާޕޯޓަށް 3 ގަޑިއިރު ކުރިން ދުރުވުމަށް މޯލްޑިވްސް އެއާޕޯޓްސް ކޮންޕެނީ ލިމިޓެޑް (އެމްއޭސީއެލް) އިން އެދިއްޖެއެވެ.

ބޮޑު ޗުއްޓީއަށް ސްކޫލްތައް ބަންދުވުމާއި އަޟްޙާ ޢީދު ކައިރިވުމާއި ގުޅިގެން ރާއްޖެއިން ބޭރަށާއި އަތޮޅުތެރޭގެ ރަށްރަށަށް ފުރާ މީހުންގެ އަދަދު ވަނީ އިތުރުވެފައެވެ.

މިކަމާއި ގުޅިގެން އެމްއޭސީއެލް އިން އިއްޔެ ކުރި ޓްވީޓެއްގައި ވަނީ ޗުއްޓީ ދުވަސްވަރު ދަތުރުފަތުރު ކުރާ ފަރާތްތައް ދިގު ކިއުތަކާއި ދަތުރު ލަސްވުން ފަދަ މައްސަލަތަކާއި ކުރިމަތިލުމުން ސަލާމަތްވުމަށް، ވެލާނާ އިންޓަރނޭޝަނަލް އެއާޕޯޓަށް ފުރުމުގެ 3 ގަޑިއިިރު ކުރިން ދުރުވުމަށް އެދިފައެވެ.

Advertisement

އަދި އެއާޕޯޓްގެ މަސައްކަތަށް ބުރޫނާރާނެހެން ފަސޭހަކަމާއިއެކު ކުރިއަށް ގެންދިޔުމަށްޓަކައި ޗެކްއިން ވުމުގެ ކުރިން އިމުގާ ފޯމް ފުރިހަމަ ކުރެއްވުމަށް ވެސް އެ ކުންފުނިން ވަނީ ދަތުރުވެރިންގެ ފަރާތުން އެދިފައެވެ.

މިއަހަރުގެ ސްކޫލް ބޮޑު ބަންދު ފެށިފައިވަނީ މިދިޔަ ބުރާސްފަތި ދުވަހުއެވެ. އަދި މި ފެށޭ ހަފްތާގައި އަޟްޙާ ޢީދުގެ ދުވަސްތައް ފާހަގަކުރެވިގެން ދާނެއެވެ.