މިހާރު ކުރިއަށްދާ އެފްއޭއެމް ފުޓްސަލް މުބާރާތުގެ ނޯތް ޒޯންގައި މިއަދު ހަވީރު ނ.މަނަދޫ އާއި ރ.އިނގުރައިދޫ ބައްދަލުކުރިެމޗް ފަސޭހަކަމާއެކު އިނގުރައިދޫ ކާމިޔާބުކޮށްފިއެވެ.

މަނަދޫގެ މައްޗަށް މިމެޗްގައި އިނގުރައިދޫން ކުރި ހޯދީ 6-3 ގެ ނަތީޖާއިންނެވެ. މެޗް ފެށުނު ތަނާހެން އިނގުރައިދޫ ޓީމުން ވަނީ ލީޑް ނަގައި ހަމަޖެހިލާފައެވެ. މި ގޯލް ޖަހައިދިނީ ދެވަނަ މިނެޓް ތެރޭގައި ޖުމާނެވެ. އިނގުރައިދޫގެ ދެވަނަ ގޯލް ޖެހީ މިމެޗްގައި މޮޅު ކުޅުމެއްދެއްކި ބިދޭސީ ކުޅުންތެރިޔާ އުލާނެވެ. ތިންވަނަ ގޯލް ހަތްވަނަ މިނެޓް ތެރޭގައި ކެޕްޓަން އަލީ ހާފިޒް ކާމިޔާބުކޮށްދިން އިރު، މަނަދޫއިން ވަނީ 19 ވަނަ މިނެޓް ތެރޭގައި ލަނޑެއް ޖަހައި އުއްމީދު އާކޮށްދީފައެވެ. މި ގޯލް ޖަހައިދިނީ މުހައްމަދު ޝަދުވާނެވެ.

އިނގުރައިދޫ އާއި މަނަދޫ ބައްދަލުކުރިެމޗްގެ ތެރެއިން..

މަނަދޫއިން ގޯލެއް ޖަހާފައިވަނިކޮށް 24 ވަނަ މިނެޓް ތެރޭގައި މަސީދު ވަނީ މެޗްގެ ނަތީޖާ 5-1 ކަށް ބަދަލުކޮށްފައެވެ. އިނގުރައިދޫގެ ހަވަނަ ގޯލަކީ މަނަދޫގެ ރައުފަތު އަތުން ބައިކޮޅަށްވަތް ގޯލެކެވެ. މެޗްގައި ދެން މަނަދޫއިން ޖެހި އަނެއް ދެ ގޯލް ކާމިޔާބުކޮށްދިނީ  އިޔާން އާއި އިޝާނެވެ.

މެޗަށްފަހު އިނގުރައިދޫ ގްރޫޕް ސްޓޭޖް ނިންމާލީ އެއްވެސް މެޗަކުން ބަލިނުވެ 9 ޕޮއިންޓާއެކުއެވެ. ތާވަލްގެ އެއްވަނާގައި އިނގުރައިދޫ އޮތްއިރު ދެވަނާގައި ހަ ޕޮއިންޓާއެކު ހިންނަވަރެވެ. ތިން ޕޮއިންޓާއެކު ތިންވަނާގައި އުޅެނީ ތުޅާދޫއެވެ.