ބޭންކް އޮފް މޯލްޑިވްސް އިން އައިޖީއެމްއެޗް ގައި ބަހައްޓާފައިވާ އޭޓީއެމް ސެންޓަރގައި ހުރި އޭޓީއެމްތަކުގެ ތެރެއިން އެއް އޭޓީއެމްއަކަށް ގެއްލުންވީީ ކަސްޓަމަރު ގަސްދުގައި ކުރިކަމަކުން ނޫން ކަމަށާއި އެކަމުގެ ސަބަބުން އެއްވެސް ފައިސާއެއް ގެއްލިފައި ނުވާކަމަށް ބޭންކް އޮފް މޯލްޑިވްސް (ބީއެމްއެލް) އިން ބުނެފިއެވެ.

އޭޓީއެމްއަލަށް ގެއްލުންވެފައިވާ މައްސަލަ ފުލުހަށް ރިޕޯޓު ކޮށްފައި ވަނީ ރޭ ފަތިހުގެ ވަގުތެއްގައެވެ.

އެކަމާ ގުޅިގެން ބީއެމްއެލްއިން ބުނީ، އޭޓީއެމްއަށް ގެއްލުންވެފައިވަނީ ވަރަށް ކުޑަކޮށް ކަމަށެވެ. އަދި މިކަމާ ގުޅިގެން އޭޓީއެމްގެ ހިދުމަތް މެދުކެނޑިފައި ނުވާ ކަމަށެވެ.

"މި ހާދިސާގައި، ބީއެމްއެލްގެ އޭޓީއެމް އަށް ގެއްލުންވެފައިވީ ނަމަވެސް އެއްވެސް ފައިސާއެއް ގެއްލިފައި ނުވަތަ ވަގަށް ނަގާފައެއް ނުވެއެވެ. އޭޓީއެމްގެ ސެކިއުރިޓީ 24 ގަޑިއިރު ބީއެމްއެލް އިން ބަލަމުންދާއިރު އޭޓީއެމްގެ ހިދުމަތަކީ ރައްކާތެރި އަދި ރައްޔިތުންގެ ފަސޭހައަށް ގާއިމްކޮށްފައިވާ ހިދުމަތެކެވެ." ބީއެމްއެލްއިން ބުންޏެވެ.

މިކަމާއި ގުޅިގެން މީގެ ކުރިން 'ވޮއިސް' އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލަކު ވިދާޅުވީ ބީއެމްއެލްގެ އޭޓީއެމް މެޝިންތަކުގެ ތެރެއިން އެއް މެޝިނަށް ގެއްލުންދީފައިވާ މައްސަލަ ފަތިހު 05:11 ކަންހާއިރު ފުލުހުންނަށް ރިޕޯޓް ކޮށްފައިވާ ކަމަށެވެ.

މިއާއިއެކު މި މައްސަލަ ތަހުގީގު ކުރަމުން ދާކަމަށް މީޑިއާ އޮފިޝަލު ވިދާޅުވިއެވެ.