ސަރުކާރުން އަތޮޅުތެރޭގެ ރަށްތައް ތަރައްޤީކުރަން ކަމަށް ބުނެ ރަށަކަށް ބިލިއަނެއް ޖެހޭހާ ފައިސާ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު "ތަޅާ ބާލައިފި" ކަމަށް އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.
ވައްޑެ މިހެން ވިދާޅުވެ ކުރެއްވި ޓްވީޓުގައި ވަނީ ކުރީގެ ވެރިކަންތަކުގައި ރައީސުން ކުރައްވާފައިވާ މަސައްކަތްތަކަށް އަލިއަޅުވާލައިފައެވެ.
އެގޮތުން ރައީސް މައުމޫން އަބްދުލްޤައްޔޫމްގެ ވެރިކަމުގައި ސިނަމާލެ ފްލެޓްތައް އަޅުއްވާ، ހުޅުމާލެ ހެއްދެވި ކަމަށާއި، ރައީސް މުހައްމަދު ނަޝީދުގެ ވެރިކަމުގައި "ވެށިފަހި މާލެ" ފައްޓަވައި، މާލެއާއި ހުޅުމާލޭގައި އެތައް ފުލެޓެއް އެޅުމުގެ އިތުރުން ގުޅީފަޅު ހިއްކެވި ކަމަށް ވައްޑެ ވިދާޅުވިއެވެ.
މިއާއިއެކު ރައީސް ޔާމީންގެ ވެރިކަމުގައި ހުޅުމާލޭގެ ދެވަނަ ފިޔަވަހި ހިއްކަވައި، ހިޔާ ޓަވަރުތަކާއި ވިނަރެސް ފްލެޓްތައް އިމާރާތް ކުރެއްވި ކަމަށް ވައްޑެ ވިދާޅުވިއެވެ.
އެހެންނަމަވެސް މިހާރު ރައީސް ޞާލިހުގެ 5 އަހަރު ނިމެން ގާތްވެފައިވާއިރު އެންމެ ފްލެޓެއްވެސް އަދި ނުނިމޭ ކަމަށް ވަހީދު ވިދާޅުވިއެވެ.
އަދި އަތޮޅުތެރެ ތަރައްޤީކުރި ކަމަށް ރައީސް ޞާލިހު ވިދާޅުވާއިރު 190 ބިލިއަނާ ގާތަށް 5 އަހަރުގެ ޚަރަދު އަރައިފައިވާ ކަމަށް ވެސް އޭނާ ވިދާޅުވިއެވެ.
"ރަށަކަށް ބިލިއަނެއް (އެއްހާސް މިލިއަން) ޖެހޭހާ ފައިސާ ތަޅާ ބާލައިފި." ވަހީދު ވިދާޅުވިއެވެ.
މީގެ އިތުރުން މެމްބަރު ވަހީދު ވިދާޅުވީ ރައީސް ޞާލިހުގެ ސަރުކާރުން ފަށާފައި ހުރި މަސައްކަތްތަކުގެ 30 އިންސައްތަވެސް އަދި ނުނިންމޭ ކަމަށެވެ.
އަދި އެމަނިކުފާނުގެ ދައުރު ނިމެން ދެން ބާކީ އޮތީ 3 މަސް ކަމަށް ވައްޑޭ ވަނީ ފާހަގަކުރައްވާފައެވެ.
Advertisement
This content is created and paid for by advertisers and does not involve Voice Journalists
