އިލެކްޝަން ކޮމިޝަން (އީސީ)ން ދި ޑިމޮކްރެޓްސް އުފައްދަން ހުއްދަ ދޭން އުޅޭ ކަމަށް ގަބޫލެއް ނުކުރެވޭ ކަމަށާއި، އަދި މިހާތަނަށް އެ ހުއްދައެއް ލިބިފައިނުވާ ކަމަށް ބުނެ މައްސަލައެއް ސްޕްރީމް ކޯޓަށް ހުށަހަޅައިފިއެވެ.
"ދަ ޑިމޮކްރެޓްސް" ޕާޓީ އުފެއްދުމަށް ހުއްދަދޭން ނިންމައި އަންނަ އާދީއްތަދުވަހު އެ ހުއްދަ ދޭނެކަމަށް އިލެކްޝަންސް ކޮމިޝަނުގެ ނައިބުރައީސް ހުސައިން ހަބީބު މިއަދު ވަނީ ވިދާޅުވެފަ އެވެ.
އެކަމާއި ގުޅިގެން، ރައީސް އިބްރާހީމް މުހައްމަދު ޞާލިހަށް ރިޔާސީ އިންތިޚާބުގައި ތާއީދުނުކުރާ ހުރިހާ ޕާޓީތަކުގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން، ހަސަން ވިދާޅުވީ އެ ކޮމިޝަނުގެ މެންބަރަކު އެފަދައިން ވިދާޅުވެގެން އެ ވިދާޅުވާ ބަސްފުޅަށް އެއްވެސް އިތުބާރެއް ނެތް ކަމަށެވެ.
ހަސަން ވިދާޅުވީ، ޖޫން މަހުގެ 1 ވަނަ ދުވަހުގައި 3،500 ފޯމު އެ ޕާޓީގެ ފަރާތުން ހުށަހެޅުމުން 15 ޖޫންގައި އެ ފޯމުތައް ޕްރޮސެސްކޮށް ނިންމާފައިވާ ކަމަށެވެ. އަދި ޕާޓީން ހުށަހަޅާ ފޯމްތަކުގައި ޤާނޫނު އަދި ޤަވައިދުގައި ބަޔާންކޮށްފައި ހުންނަ ކަންކަން ފުރިހަމަވޭތޯ ބަލަން ތިން މަސް ލިބޭ ނަމަވެސް، އެ މަސައްކަތް ނިމުމުން އެހުއްދަ ނުދީ ހިފަހައްޓައިގެން އުޅެންޖެހޭ ޤާނޫނެއް ނޯންނާނެ ކަމަށް ހަސަން ވަނީ ވިދާޅުވެފައެވެ.
ހަސަން އިތުރަށް ވިދާޅުވީ އޭނާ ޤަބޫލުކުރައްވާ ގޮތުގައި ދަ ޑިމޮކްރެޓްސް ޕާޓީ އުފެއްދިޔަނުދިނުމަށް މަސައްކަތްކުރަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ކަމަށާއި، ބޭނުންފުޅަކީ އެ ޕާޓީ އުފެދުނަނުދީ އިންތިޚާބަށް ދިއުމަށް ކަމަށެވެ. އަދި އެމައްސަލަ މިހާރު ސްޕްރީމް ކޯޓަށް ހުށަހަޅާފައިވާ ކަމަށްވެސް ވިދާޅުވި އެވެ.
"އަޅުގަނޑުމެން މިއަދުވާނެ މައްސަލައެއް ސްޕްރީމް ކޯޓަށް ލާފައި. އެއީ މި ހުއްދަ އިލެކްޝަން ކޮޮމިޝަނަށް ހިފަހައްޓައިގެން ނުތިބެވޭނެ ކަމަށް ބުނެ ސްޕްރީމް ކޯޓުގައި މިހާރުވާނީ މައްސަލަ ހުށަހަޅާފައި.". ހަސަން ލަތީފް ވިދާޅުވިއެވެ.
އިތުރަށް ޙަސަން ވިދާޅުވީ އިލެކްޝަންސް ކޮމިޝަނުން މަސައްކަތްކުރާ ގޮތަށް ބަލާއިރު އިންސާފުވެރި މިނިވަން އިންތިޚާބެއް ބޭއްވިދާނެ ކަމުގައި ޤަބޫލުނުކުރެއްވޭ ކަމަށެވެ. އެގޮތުން އެ ކޮމިޝަނަށް ވަރަށް ބޮޑަށް އިތުބާރުވަނީ ގެއްލިފައި ކަމަށެވެ.
Advertisement
This content is created and paid for by advertisers and does not involve Voice Journalists
