މާލެއަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދައިދިނުމަށް ސަރުކާރުން ހުޅުވާލި "ބިންވެރިޔާ ސްކީމް" ގެ ވަގުތީ ލިސްޓުގައި މަދު ވެގެން 10 ބިދޭސީންގެ ނަން ހިމެނޭ ކަން ހާމަ ވެއްޖެއެވެ.

އެގޮތުން ތިރީގައިވާ ތާވަލުގައި ހިމެނޭ 10 ފަރާތަކީ މިދިޔަ ހޯމަ ދުވަހު ޕްލޭނިންގ މިނިސްޓްރީއިން އާންމު ކުރި ލިސްޓުގައި ހިމެނޭ 10 ބިދޭސީންނެވެ.

ވަގުތީ ލިސްޓުގައި ހިމެނިފައިވާ ބައެއް ބިދޭސީން

ލިސްޓު އާންމު ކުރިއިރު ލިސްޓުގައި ބިދޭސީއެއްގެ ނަން ހިމެނިފައިވާކަން އެންމެ ފުރަތަމަ ހާމަވެފައިވަނީ މއ. މަލިކުވިއު، ހަބީބު ރަހިމާން މުހައްމަދު ހަނީފާ ނަމަކަށް ކިޔާ މީހަކު ލިސްޓުގައި އޮތުމުންނެވެ. އޭނާ ވަނީ ޝަރުތުހަމަވާ، އިތުރު މީހަކާ ޖޮއިންވުމުން ގޯތި ލިބުމުގެ ފުރުސަތު ލިބޭ ބައިގައި ހިމެނިފައެވެ.

އެހެންނަމަވެސް، ހަބީބުގެ ނަން ލިސްޓުގައި އޮތީ އޮޅުމަކުން ކަމަށާ، ދާއިމީ ލިސްޓު އާންމު ކުރާއިރު އެކަންކަން އިސްލާހު ކުރާނެ ކަމަށް ޕްލޭނިންގ މިނިސްޓްރީން ވަނީ ބުނެފަ އެވެ.

ހަބީބުގެ އިތުރުން މި ލިސްްޓުގައި ހިމެނޭ މުހައްމަދު ނަޒީރު އަކީ ގިނަ ވިޔަފާރިތަކެއް ހިންގާ މީހެކެވެ. އެގޮތުން، އޭނާގެ ނަމުގައި ޕެރަމައުންޓް ހޮޓެލް އާއި، އަލީ ނަޒީރު ކޮންސްޓްރަކްޝަން އާއި, ނިޔު ސަމުދުރާ ސްޕާ އާއި، ޕްލާޒާ ރެޑް އެޕަލް ނަމަކަށް ކިޔާ ވިޔަފާރިތަކެއް އަންނަނީ ހިންގަމުންނެވެ. 

މުހައްމަދު ނަޒީރު، ރާއްޖޭގެ ރަށްވެއްސެއްގެ ގޮތުގައި މިހާރު ހުއްޓަސް، އޭނާ އަކީ ދިވެއްސަކާއި އިނދެގެން އުޅޭ އިންޑިއާއަށް ނިސްބަތްވާ މީހެއްކަން "ވޮއިސް" އަށް ވަނީ ކަށަވަރުވެފައެވެ. 

ގޯތި ލިސްޓު އެކުލަވާލުމުގައި ކޮރަޕްޝަންގެ އެއްވެސް އަމަލެއް ނުހިމެނޭނެ ކަމުގެ ޔަގީންކަން ޕްލޭނިން މިނިސްޓަރު މުޙައްމަދު އަސްލަމް ދެއްވި ނަމަވެސް، ލިސްޓަށް ބަލާއިރު އެއީ ވަކި ފަރާތުން އަންގައިގެން ތައްޔާރުކޮށްފައިވާ، ލިސްޓެއްކަމަށް އިދިކޮޅު ފަރާތްތަކުން ދަނީ ތުހުމަތު ކުރަމުން ނެވެ.