މި އަހަރުގެ އަޟްހާ ޢީދު ހަރަކާތްތަކުގައި ސަރުކާރާއި އިދިކޮޅު ފަރާތްތަކުން "އިންޑިއާ އައުޓް" ޝިއާރު ބޭނުންކުރުމާއި އިންޑިއާގެ ބޮޑު ވަޒީރު ނަރެންދްރަ މޯދީގެ މޫނު ޖަހާފައިވާ މާސްކް ބޭނުންކުރުމުގެ އިތުރުން އެކި ޕްލެޓްފޯމްތައް ބޭނުންކޮށްގެން ދޮގު މައުލޫމާތު ފެތުރާކަމަށް ބުނެ, އެކަން ދިވެހިރާއްޖޭގެ ސަރުކާރުން ހަރުކަށި އިބާރާތުން ކުށްވެރި ކޮށްފިއެވެ.

މިކަމާއި ގުޅިގެން މިނިސްޓްރީ އޮފް ފޮރިން އެފެއާޒް އިން ނެރުން ބަޔާނުގައި ބުނެފައިވަނީ ޢީދު ފަދަ ސުލްހަވެރި އުފާ މުނާސަބަތެއްގައި ރާއްޖޭގެ މުހިންމު ބައިވެރިއެއް ކަމުގައިވާ އިންޑިއާ އާއި އެގައުމުގެ އިސްްވެރިންނާއި މެދު އިދިކޮޅު ފަރާތްތަކުން މިފަދަ ހަޑިހުތުރު އަމަލުތައް ހިންގުމަކީ ނަފްރަތު އުފެދޭނެ ކަމެއް ކަމަށެވެ.

އަދި މިކަމަކީ އިންޑިއާއިއެކު ޒަމާނުއްސުރެ އޮންނަ ގާތް ގުޅުން ކިލަނބު ކުރުމުގެ މަގުސަދުގައި އިދިކޮޅު ފަރާތްތަކުން ހިންގާ ޢަދާވާތްތެރި ހަރަކާތްތަކަށް ލިބޭ ކުރިއެރުމެއް ކަމަށެވެ.

ރާއްޖެއާއި އިންޑިއާއި ދެމެދުގައި އޮންނަ ވަރުގަދަ ގުޅުން ބިނާވެފައިވަނީ ދެގައުމުގެ ދެމެދުގައި އޮންނަ ތާރީޚީ އަދި ސަގާފީ ގުޅުމަށާއި ދެގައުމުގެ ރައްޔިތުންގެ މެދުގައި އޮންނަ ގުޅުމުގެ މައްޗަށް ކަމަށް މިނިސްޓްރީއިން ވަނީ ބުނެފައެވެ.

މިއާއިއެކު އިންޑިއާއަކީ އަބަދުވެސް ރާއްޖޭގެ އެންމެ ގާތް އެކުވެރިޔާ އަދި އެންމެ އިތުބާރު ހުރި އަވައްޓެރިޔާ ކަމަށާއި އެގައުމަކީ ރާއްޖޭގެ ރައްޔިތުންނަށް ހުރިހާ ފަރާތަކުންވެސް މެދުނުކެނޑި އެއްބާރުލުން ދިނުމުގައި ދެމި ތިބޭ ގައުމެއް ކަމަށް ބަޔާނުގައި ވަނީ ފާހަގަކޮށްފައެވެ.

އަދި ފާއިތުވެދިޔަ 5 އަހަރުގެ ތެރޭގައި ދެގައުމުގެ އިސްވެރިން ގުޅުން ދެމެހެއްޓުމުގައި ސާބިތުވެ ތިބުމުގެ ސަބަބުން ޒަަމާނުއްސުރެ ދެގައުމުގެ ދެމެދުގައި އޮންނަ ގުޅުން ވަނީ އައު އުސްމިންތަކަކަށް އުފުލިފައި ކަމަށް މިނިސްޓްރީއިން ވަނީ ފާހަގަކޮށްފައެވެ.

މީގެ އިތުރުން މި ސަރުކާރުން އިންޑިއާ ގެންގުޅޭ "ނެއިބާހުޑް ފަސްޓް ޕޮލިސީ" ގެ އަގު ވަޒަން ކުރާ ކަމަށާއި "އިންޑިއާ ފަސްޓް" ސިޔާސަތު ދަމަހައްޓައި އިންޑިއާއެކު އޮންނަ ގާތް ގުޅުން ވަރުގަދަ ކުރުމުގައި ސާބިތުވެ ތިބޭނެ ކަމަށް މިނިސްޓްރީއިން ވަނީ ބުނެފައެވެ.

އެހެންކަމުން ޒިންމާދާރުކަމާއިއެކު އަމަލުކޮށް، ރާއްޖެއިން އަވައްޓެރި ގައުމުތަކާއި، ބައިނަލްއަގުވާމީ މުޖުތަމައާއިއެކު އޮންނަ ގުޅުންތަކަށް ބުރޫއަރާ ފަދަ އިޙްތިރާމް ކުޑަ އަމަލުތަކާއި ދޮގު މައުލޫމާތު ފެތުރުމުން ދުރުހެލިވުމަށް ރާއްޖޭގެ ސަރުކާރުން ވަނީ ސިޔާސީ ޕާޓީތަކަށް އިލްތިމާސް ކޮށްފައެވެ.

މިފަހަރު ކުޅުދުއްފުށީގައި ބޭއްވުނު އީދު ހަރަކާތްތަކުގައި ވަނީ ސަރުކާރަށް ފާޑު އަމާޒު ކޮށްފައެވެ. އެގޮތުން އެރަށުގެ މާލި ޕެރޭޑުގައި އަމީނީ މަގުގެ މަޝްރޫއާއި، ފޯޅަވަހި މައްސަލައާއި، ކުޅުދުއްފުށީ ފުށް ފެކްޓްރީއާއި، ރައްޔިތުންގެ މަޖިލީހުގެ ޖަލްސާތަކުގައި ދާދިފަހުން ހިނގައިދިޔަ ކަންކަމަށް ޖޯކު ޖަހައި، "ޗޯރު ވަގާއި"، މުގާބެ ނަމުގައި ވަނީ ފުޅަނދު ހަދާފައެވެ.