ވިލިމާލެއިން ގެއްލިގެން ހޯދަމުންދާ ދިވެހި އަންހެން މީހާ ވިލިމާލޭގެ ފިހާރައެއްގެ ނަންބަރަކުން ގުޅިކަމަށް އާއިލާއިން މައުލޫމާތު ދީފައިވާ ކަމަށް ފުލުހުން ބުނެފިއެވެ.

މ. އާޒާދީގުލްޝަން / އާޠިފާ ޢަބްދުﷲ (53އ) ގެއްލިފައިވާ ކަމަށް ފުލުހުން އިއުލާންކޮށްފައިވަނީ މިއަދު 10:25 އެހައިކަންހާއިރު ފުލުހުންނަށް މިކަން ރިޕޯޓުކޮށްފައިވާތީ އޭނާ ހޯދުމުގެ މަސައްކަތް ކުރުމުގެ ތެރެއިންނެވެ.

އެގޮތުން އޭނާ އެންމެ ފަހުން ފެނިފައިވަނީ ވިލިމާލޭގައި އޭނާ ދިރިއުޅޭ ގެއިން، އިއްޔެ ރޭ 22:45 ކަންހާއިރުކަމަށް އޭނާގެ އާއިލާއިން ފުލުހުންނަށް ވަނީ މައުލޫމާތު ދީފައެވެ.

އަދި އޭރު އޭނާ ހުރީ ފެހިކުލައިގެ ހެދުމެއް ލައިގެން ކަމަށާއި އަޅައިގެން ހުރީ ފިޔާތޮށި ކުލައިގެ ޝޯލެއް ކަމަށްވެސް އޭނާގެ އާއިލާއިން މައުލޫމާތު ދީފައިވާ ކަމަށް ފުލުހުން ވަނީ އިއުލާންކޮށްފައެވެ.

މިކަމާއި ގުޅިގެން ދާދި ދެންމެއަކު ފުލުހުން ވަނީ އާތިފާގެ އާއިލާގެ މީހަކަށް ވިލިމާލެ ފިހާރައެއްގެ ނަންބަރަކުން އޭނާ ގުޅިކަމަށް އާއިލާއިން މައުލޫމާތު ދީފައިވާ ކަމަށް ބުނެފައެވެ.

މިއާއިއެކު އެއީ އާތިފާކަން ކަށަވަރު ކުރުމަށް ފުލުހުން މަސައްކަތް ކުރަމުން ގެންދާ ކަމަށާއި އަދި މިހާތަނަށް އެކަން ކަށަވަރު ކުރެވިފައި ނުވާކަން ފުލުހުން ވަނީ ފާހަގަކޮށްފައެވެ.

ފުލުހުން ވަނީ އާޠިފާ ޢަބްދުﷲ ގެ މައުލޫމާތެއް ލިބިފައިވާނަމަ ފުލުހުންގެ ހޮޓްލައިން 3322111 އަށް ނުވަތަ ވިލިމާލެ ޕޮލިސް ސްޓޭޝަންގެ 9790083 އަށް ގުޅުއްވައި ހިއްސާކުރެއްވުމަށް އެދިފައެވެ.