ކުރީގެ ނާއިބު ރައީސް އަދި އެމްއެމްޕީއާރުސީ ޚިޔާނާތުގެ މުގުލުގައި ހުންނެވި އެކެއް ކަމުގައިވާ އަހުމަދު އަދީބު، މާދަމާ ރާއްޖެއިން ބޭރަށް ފުރުވާލާނެ ކަމަށް އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.
ވައްޑެ މިއަދު ކުރެއްވި ޓްވީޓެއްގައި އޭނާ ވަނީ، އެމްއެމްޕީއާރުސީގެ ބޮޑުޚިޔާނާތް ހިންގުމުގައި އިސްކޮށްހުންނެވި އަހުމަދު އަދީބު މާދަމާ ރާއްޖޭން ބޭރަށް ފުރުވާލާ ކަމަށް ވިދާޅުވެ އެކަމާއި ކަންބޮޑުވުން ފާޅުކުރައްވާފައެވެ.
އަދި އެފަދައިން ކަން ކުރައްވަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ ކެމްޕޭނު ރަސްމީކޮށް ފެށުމުގެ ކުރިން އަދީބު ފުރުވާނުލައިފިނަމަ ކޮށްލާފާނޭ ފަޟީޙަތަކުން ރެކުމަށްޓަކައި ކަމަށްވެސް ބުނާ އަޑުއިވޭ ކަމަށް ވައްޑެ ވިދާޅުވި އެވެ.
އަދީބު ރާއްޖެ އިން ބޭރަށް ފުރުވާލަނީ ރައީސް ޞާލިހު ފަޟީހަތް ކޮށްލަފާނެތީ ކަމަށް ވައްޑެ ވިދާޅުވެފައިވާއިރު، އެ ކަމަށް ބާރުދޭ ފަދަ ވާހަކަ ތަކެއް މީގެ ކުރިން، ކުރީގެ ޓުއަރިޒަމް މިނިސްޓަރު އަލީ ވަހީދުވެސް ވަނީ ދައްކަވާފައެވެ.
އެގޮތުން، އެމްއެމްޕީއާރްސީގެ ހިޔާނާތުގެ ފައިސާ އިން 35 މިލިއަން ރުފިޔާ އަދީބުގެ އަތުން ރައީސް ޞާލިހު ނެންގެވިކަމަށް އަލީ ވަހީދު ވަނީ ވިދާޅުވެފަ އެވެ. އެކަން ހިނގައިދިޔައިރު އަލީ ވަހީދު ހުންނެވީ އެމްޑީޕީގެ ޗެއާޕާސަންގެ މަގާމުގައެވެ.
މީގެ އިތުރުން އަދީބު ބޭރަށް ފުރުވާލަނީ އެމްއެމްޕީއާރުސީގެ ހިޔާނާތުން ލިބިފައި ހުރި ފައިސާގެ ތެރެއިން ފޮރުވާފައި ހުރި ފައިސާ ރައީސް ޞާލިހުގެ ކެންޕެއިނަށް ޚަރަދު ކުރުމަށް ކަމަށްވެސް އަޑުތައް ވަނީ ފެތުރިފައެވެ.
Advertisement
This content is created and paid for by advertisers and does not involve Voice Journalists
