ރައްޔިތުންގެ މަޖިލީހުގެ މިއަދުގެ ޖަލްސާގައި ރިޔާސަތުން މަޖިލިސް ދޫކޮށް "ފިލާފައި"ވާ ކަމަށާ، އެފަދައިން ކަން ކުރެއްވީ އިދާރީ މޭޒުން ގޮވަގޮވާ އޮއްވައި ކަމަށް މަޖިލީހުގެ އިހަވަންދޫ ދާއިރާގެ އެމްޑީޕީ މެންބަރު މުހައްމަދު ޝިފާއު ވިދާޅުވެއްޖެއެވެ. 

މަޖިލީހުގެ ދައުރުން ބޭރުގައި މިއަދު ބޭއްވި ޚާއްސަ ޖަލްސާއަކީ އެކަމަށް އެދި، އެމްޑީޕީގެ 29 މެންބަރުން މަޖިލީހަށް ހުށަހެޅުމާއި ގުޅިގެން ބޭއްވި ޖަލްސާއެކެވެ. މި ޖަލްސާގައި އެންމެ ފުރަތަމަ ކުރެއްވުމަށް އެންމެ އިސްކަމެއް ދެއްވުމަށް އެ މެންބަރުން އެދިލައްވާފައިވަނީ ދާއިމީ ކޮމިޓީތައް އެކުލަވާލުމުގެ މަސައްކަތެވެ.

އެހެންކަމުން، މިއަދުގެ ޖަލްސާގެ އެޖެންޑާގައި އޮތީވެސް، ރައްޔިތުންގެ މަޖިލީހުގެ ދާއިމީ ކޮމިޓީތަކުގައި ހިމެނިވަޑައިގަންނަވާ ސިޔާސީ ޕާޓީތަކަށް ނިސްބަތްވެވަޑައިގަންނަވާ މެންބަރުންނާއި، ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރުން ތަމްސީލުކުރައްވާނެ ގޮތަށް ގެނެވޭ ބަދަލާގުޅޭ މައްސަލަ އަށް ބަހުސް ކުރުމެވެ.

Advertisement

އެހެންނަމަވެސް, މަޖިލީހުގެ ޖަލްސާ ފަށްޓަވަމުން ރިޔާސަތުގައި އިންނެވި ވިލިފުށި ދާއިރާގެ މެންބަރު ހަސަން އަފީފު ވިދާޅުވީ، ވެރިކަންކުރާ މައި ޕާޓީ، އަދި މަޖިލީހުގެ މެޖޯރިޓީ ޕާޓީ، އެމްޑީޕީގެ ކުރީގެ ރައީސް، އަދި މަޖިލީހުގެ ރައީސް މުހައްމަދު ނަޝީދު އާއި އެޕާޓީގެ އެހެން މެންބަރެއް ޕާޓީން ވަކިވެވަޑައިގެންނެވުމާއި ގުޅިގެން މަޖިލީހުގެ އެމްޑީޕީ މެންބަރުންގެ ނިސްބަތަށް ބަދަލު އައިސްފައިވާ ކަމަށެވެ. 

އެހެންކަމުން، މެންބަރުން ހިމެނޭނެ ގޮތާއި ގުޅިގެން ކުރިން އެކުލަވައިލެވުނު ރިޕޯޓް އަށް މިވަގުތު އަމަލު ކުރެވެން ނެތް ކަމަށާ، އަލުން އެ ރިޕޯޓް އެކުލަވައިލަންޖެހޭ ކަމަށްވެސް އަފީފު ވިދާޅުވި އެވެ. ވުމާއެކު މިއަދު ޖަލްސާ ކުރިއަށް ގެންދެވެން ނެތް ކަމަށްވެސް އޭނާ ވިދާޅުވި އެވެ. 

މިކަމާއި ގުޅިގެން ޝިފާއު ކުރެއްްވި ޓުވީޓެއްގައި ވިދާޅުވީ،  އިދާރީ މޭޒުން ގޮވަގޮވާ އޮއްވައި ރިޔާސަތުން މަޖިލިސްދޫކޮށް "ފިލާފައި"ވާ ކަމަށެވެ. އަދި އެފަދައިން ކަން ކުރެއްވީ އެމްޑީޕީ ގެ މެމްބަރުން ހަމަޔަށް މަޖިލީހަށް ހާޒިރުވެފައޮތްތަންފެނި ކަމަށްވެސް ވިދާޅުވި އެވެ. 

މިވަގުތު ރައްޔިތުންގެ މަޖިލީހުގައި ތިބި އެމްޑީޕީގެ މެންބަރުންގެ އަދަދަކީ 54 އެކެވެ. އަދި ޕީޕީއެމްގެ 5 މެންބަރުން ތިބި އިރު ޕީއެންސީގެ ތިބީ 3 މެންބަރުންނެވެ. އަދި އެމްއެންޕީގެ 3 މެންބަރުންނާއި، ޖުމްހޫރީ ޕާޓީގެ ދެ މެންބަރުން އަދި އެމްޑީއޭގެވެސް ތިބީ ދެ މެންބަރުންނެވެ. މަޖިލީހުގެ މައިނޯރިޓީ އަށް މިވަގުތު ތިބީ ވަކި ޕާޓީއަކަށް ނިސްބަތް ނުވާ މެންބަރުންނެވެ. އެގޮތުން، އޭގެ ތެރޭގައި 18 މެންބަރުން ހިމެނެއެވެ.