އަރަބިއްޔާ ސްކޫލްގެ ބިމުގެ މައްސަލާގައި އެޑިއުކޭޝަން މިނިސްޓަރ އައިޝަތު އަލީ އާއި ބައްދަލުކުރަން އަދާލަތު ޕާޓީ (އޭޕީ) އިން 7 މަސްދުވަސް ވަންދެން ކުރި މަސައްކަތް ނާކާމިޔާބު ކަމަށް އެ ޕާޓީއިން ބުނެފައިވާ އެ ސުކޫލު ބެލެނިވެރިން ބުނެފިއެވެ. 

އެގޮތުން މިއަދު އަރަބިއްޔާ ސްކޫލް ބެލެނިވެރިން ހިންގާ ޓުވިޓާ އެކައުންޓުން ކުރި ޓްވީޓުގައި ބުނެފައިވަނީ މިދިޔަ އަހަރުގެ ނޮވެމްބަރު މަހު އެ ސްކޫލްގެ ބިމުގެ މައްސަލާގައި އޭޕީގެ ފަރާތުން ކުރެވެން ހުރި ކަންކަން ބެލުމަށްޓަކައި ބޭއްވުނު ބައްދަލުވުމުގައި އެއްބަސް ވެވުނު އެއްކަމަކީ އޭޕީގެ ފަރާތުން އެޑިއުކޭޝަން މިނިސްޓަރާއި އެ ޕާޓީއިން ބައްދަލުކޮށް އައު އިމާރާތުގެ މަސައްކަތް ފެށުމަށް ބާރު އެޅުން ކަމަށެވެ.

އެހެންނަމަވެސް އޭގެ ފަހުން މިކަމުގެ އަޕްޑޭޓް ހޯދަން އޭޕީއާއިއެކު މިދިޔަ މަހުގެ 14 ގައި ބޭއްވުނު ބައްދަލުވުމުގައި އެ ޕާޓީއިން ބުނެފައިވަނީ އޭރުއްސުރެ މިއަދާއި ހަމަޔަށް، 7 މަސްދުވަސް ވީއިރުވެސް ސަރުކާރު ތެރެއިން އެޑިއުކޭޝަން މިނިސްޓަރ އާއި ބައްދަލުކުރަން ކުރި އެއްވެސް މަސައްކަތެއް ކާމިޔާބު ވެފައި ނުވާ ކަމަށެވެ.

Advertisement

އަރަބިއްޔާ ސުކޫލުގެ އިމާރާތް މަރާމާތުނުކުރެވި ގިނަ ދުވަސްތަކެއް ވެގެންދިއުމާއި ގުޅިގެން އެ ސުލޫކުގެ އިމާރާތް މަރާމާތުނުކޮށް ކިޔަވައިދެމުން ދިއުމަކީ ދަރިވަރުންނަށް ރައްކާތެރިގޮތެއް ކަމަށް ނުފެންނާނީ ބެލެނިވެރިން މުޒާހަރާކޮށްގެން ކުދިން ވަނީ ވަގުތީ އިމާރާތަކަށް ބަދަލުކޮށްފަ އެވެ. އަދި ސުކޫލުގެ ދާއިމީ އިމާރާތް މި ދައުރުގައި ނިންމާނެކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވަނީ ވައުދުވެވަޑައިގެންފަ އެވެ.

އެގޮތުން 2024 ވަނަ އަހަރުގެ ދިރާސީ އަހަރުގެ ކިޔެވުން ފެށޭއިރު އިމާރާތް ބޭނުން ކުރެވޭނެ ކަމަށް ސަރުކާރުން ބުނެފައިވާއިރު އަދިވެސް އިމާރާތް ކުރުމުގެ އެއްވެސް މަސައްކަތެއް ނުފެށެއެވެ. އަރަބިއްޔާ ދަރިވަރުން މިހާރު ކިޔަވަނީ ކުރީން ފޮރިން މިނިސްޓްރީ ހިންގި އިމާރާތުގައެވެ. އާ އަހަރަށް އެ ކުދީން ކިޔަވަން ދާން ޖެހެނީ ދަރުމަވަންތަ ސުކޫލު ވަގުތީ ގޮތުން ހިންގި އިމާރާތަށެވެ.