ރައްޔިތުން މަޖިލީހުގެ ކ. ގުރައިދޫ ދާއިރާގެ ބައި އިލެކްޝަނުގައި ވާދަކުރެއްވި 3 ކެންޑިޑޭޓުން ޖޫރިމަނާ ކުރުމަށް އިލެކްޝަންސް ކޮމިޝަން (އީސީ) އިން ނިންމައިފިއެވެ.

15 އޭޕްރީލް ގައި ބޭއްވުނު ގުރައިދޫ ބައި އިލެކްޝަންގައި ވާދަކުރައްވާފައިވަނީ އެމްޑީޕީގެ ފަރާތުން އިބްރާހީމް ޝާޒް، ޕީޕީއެމްގެ ފަރާތުން ހުސައިން ރިޒާ އަދި އެމްއެންޕީ ފަރާތުން އަލީ އާރިފްއެވެ.

މި 3 ކެންޑިޑޭޓުން ޖޫރިމަނާ ކުރަން ނިިންމާފައިވާ ކަމަށް އިއުލާންކޮށްފައިވަނީ އީސީގެ ނާއިބު ރައީސް އިސްމާޢީލް ހަބީބު ކުރެއްވި ޓްވީޓެއްގައެވެ.

Advertisement

އެގޮތުން ހަބީބު ވިދާޅުވީ މި ނިންމުން ނިންމާފައިވަނީ މި ބޭފުޅުންގެ ފަރާތުން ހުށަހަޅާފައިވާ، މާލީ ބަޔާންތަކަކީ، ގާނޫނު ނަންބަރު 11/2008 އިންތިހާބުތަކާ ބެހޭ ޢާންމު ގާނޫނު ގެ 73 ވަނަ މާއްދާގައިވާ ގޮތުގެ މަތީން ހުށަހަޅާފައިވާ މާލީ ބަޔާނަކަށް ނުވާތީ ކަމަށެވެ.

އަދި މި ގާނޫނުގެ 75 ވަނަ މާއްދާގެ (ށ) ގެ ދަށުން، މި 3 ކެންޑިޑޭޓުންނާއި، ކެންޑިޑޭޓުންގެ އިންތިޚާބީ އޭޖެންޓުން ކުރެ، ކޮންމެ ފަރާތެއް ޖޫރިމަނާ ކުރުމަށް އީސީއިން ނިންމާފައިވަނީ -/6000 ރުފިޔާ އިން ކަމަށް ހަބީބު ވަނީ ވިދާޅުވެފައެވެ.

މިއާއިއެކު މި ފައިސާ މި މަހުގެ 15 ވަނަ ދުވަހުގެ ކުރިން ދެއްކުމަށް ކެންޑިޑޭޓުންނަށް ދަންނަވާފައިވާ ކަމަށް ހަބީބު ވަނީ ފާހަގަކުުރައްވާފައެވެ.

ހަބީބު އިތުރަށް ވިދާޅުވީ މާލީ ބަޔާނުގައި ގާނޫނު ލާޒިމްކުރާ މިންވަރަށް ފުރިހަމަ ވާންޖެހޭ ކަންކަން ފުރިިހަމަ ނުވާނަމަ، ކުރިޔަށް ހުރި އިންތިޚާބުތަކުގައި ވާދަކުރާ ހުރިހާ ކެންޑިޑޭޓުންނާ މެދު ވެސް މިފަދައިން ޢަމަލުކުރާ ގޮތަށްވެސް ކޮމިޝަނުންވަނީ ނިންމާފައި ކަމަށެވެ.

ގުރައިދޫ ދާއިރާގެ ގޮނޑި ތަމްސީލުކުރައްވަމުން ދިޔަ ޕީޕީއެމްގެ މެންބަރު އިބްރާހީމް ރިޒާ އަވަހާރާވުމާއި ގުޅިގެން ބޭއްވުނު މި ބައި އިލެކްޝަން ކާޟިޔާބު ކުރައްވާފައިވަނީ އެމްޑީޕީއިން އިބްރާހީމް ޝާޒްއެވެ.