ޑިޕާޓްމެންޓް އޮފް ޕަބްލިކް އެގްޒޭމިނޭޝަންސް (ޑީޕީއީ) އިން ރާވާ ހިންގާ އިމްތިހާންތަކުގައި ބައިވެރިވާ ދަރިވަރުންގެ ސެޓްފިކެޓްތައް ރައްކާތެރިކަމާއިއެކު އަތޮޅުތެރޭގެ ސެންޓަރުތަކަށް ފޯރުކޮށްދިނުމަށްޓަކައި މިނިސްޓްރީ އޮފް އެޑިއުކޭޝަނާއި މޯލްޑިވްސް ޕޯސްޓް ލިމިޓެޑް (އެމްޕީއެލް) އާއި ދެމެދު ފަހުނާމާއެއްގައި ސޮއިކޮށްފިއެވެ.
އެގޮތުން މިނިސްޓްރީ އޮފް އެޑިއުކޭޝަންގައި މިއަދު ބޭއްވި ރަސްމިއްޔާތެއްގައި މި ފަހުނާމާގައި ސޮއިކުރެއްވީ މިނިސްޓްރީގެ ފަރާތުން ޑެޕިއުޓީ މިނިސްޓަރ މުޙައްމަދު އިހުސާން އަދި އެމްޕީއެލްގެ ފަރާތުން އެކުންފުނީގެ މެނޭޖިންގ ޑިރެކްޓަރ އާދަމް މުހައްމަދެވެ.
މިކަމާއި ގުޅިގެން އެޑިއުކޭޝަންއިން ނެރެފައިވާ ބަޔާނުގައި ބުނެފައިވަނީ މީގެ ކުރިން ކޮންމެ އިމްތިހާނެއް ނިމި، ސެޓްފިކެޓްތައް ޑީޕީއީއަށް ލިބުމުން ސެންޓަރުތަކުން ހަވާލުވުމަށް އަންގާ، ކޮންމެ ސެންޓަރަކުންވެސް ސެޓްފިކެޓްތަކާ ޙަވާލުވާނޭ މީހަކު ޑީޕީއީ އަށް ފޮނުވާ ކަމަށެވެ.
އެހެންނަމަވެސް އިތުބާރުކުރެވޭ ފަރާތެއް ސެޓްފިކެޓްތަކާ ހަވާލުވުމަށް ފޮނުވަން ދަތިވުމާއި، ބައެއް ފަހަރު ހަވާލުވާ ފަރާތުގެ އިހުމާލުން ސެޓްފިކެޓްތައް ސެންޓަރުތަކާއި ހަމައަށް ނުގޮސް ގެއްލިފައި އެބަހުރި ކަމަށް މިނިސްޓްރީއިން ވަނީ ބުނެފައެވެ.
މިއާއިއެކު އަތޮޅުތެރޭގެ ދަތުރުފަތުރުގެ ކަންކަން ހުންނަގޮތުން މާލެއިން އެ ސެންޓަރުތަކަށް ސެޓްފިކެޓް ނުގެންދެވި ގިނަ ދުވަސް ވެގެން ދިޔުމުގެ ސަބަބުން އަވަހަށް ސެޓްފިކެޓް ބޭނުންވާ ދަރިވަރުންނަށް ސެޓްފިކެޓް ލިބުން ލަސްވެ، ދަތިތަކާ ކުރިމަތިލާން ޖެހޭ ކަމަށް ވެސް މިނިސްޓްރީއިން ވަނީ ފާހަގަކޮށްފައެވެ.
އެހެންކަމުން ޕޯސްޓް އޮފީސް މެދުވެރިކޮށް އަތޮޅުތެރޭގެ ސެންޓަރުތަކަށް ސެޓްފިކެޓް ފޮނުވަން ފެށުމާއެކު، ޑީޕީއީއަށް ސެޓްފިކެޓް ލިބޭތާ ގިނަވެގެން 20 ދުވަހުގެ ތެރޭގައި ސެންޓަރުތަކާއި ހަވާލުކުރެވި ރައްކާތެރިކަމާއިއެކު ވީހާވެސް އަވަހަށް ދަރިވަރުންނަށް ސެޓްފިކެޓްތައް ހަވާލުކުރެވޭކަން ކަށަވަރުވެގެންދާނެ ކަމަށް މިނިސްޓްރީއިން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
