ރައްޔިތުން މަޖިލީހުގެ ރައީސް މުހައްމަދު ނަޝީދާއި އިދިކޮޅު ޕްރޮގްރެސިވް ކޮންގުރެސް ކޯލިޝަނުގެ ލީޑަރު އަދި ރިޔާސީ ކެނޑިޑޭޓު ރައީސް ޢަބްދުﷲ ޔާމީން ޢަބްދުލްޤައްޔޫމު ކުރިއަށް އޮތް ރިޔާސީ އިންތިޚާބަށް ކުރިމަތިނުލައި ދެބޭފުޅުން އެކުގައި ބާރަށް މަސައްކަތް ކުރުމަށް ނަޝީދު ގޮވާލައްވައިފިއެވެ.

ނަޝީދު މިހެން އެދިވަޑައިގެންފަިއވަނީ މިރޭ 'ދަ ޑިމޮކްރަޓްސް' ޕާޓީ އުފެއްދުމަށް ޢިޔާސުއްދީން ސުކޫލްގައި ބޭއްވުނު ރަސްމިއްޔާތުގައި ވާހަކަފުޅު ދައްކަވަމުންނެވެ.

އެގޮތުން އެމަނިކުފާނު ވިދާޅުވީ ޕީޕީއެމް ޕީއެންސީ ކޯލިޝަން، އެމްއެމްޕީ، އެމްއާރްއެމް އަދި ޖުމްހޫރީ ޕާޓީ ބޭފުޅުންގެ އަރިހުގައި ރާއްޖޭގެ ރައްޔިތުން އެދި ގޮވާ ކަމެއް އޮތް ކަމަށެވެ.

Advertisement

"ރާއްޖޭގެ ރައްޔިތުން އެބަ ބުނޭ ވަރަށް ސާފު ބަހުން މިގޮތް ކަމުނުދާ ކަމަށް. ރައީސް އިބްރާހިމް މުހައްމަދު ޞާލިހުގެ ވެރިކަން ކަމުނުދާ ކަމަށް." ނަޝީދު ވިދާޅުވިއެވެ.

އެހެންކަމުން ހުރިހާ އިދިކޮޅު ސިޔާސީ ޕާޓީތަކުގެ މަސްއޫލިއްޔަތަކީ މިކަމަށް ގޮތެއް ހޯދައިދިނުން ކަމަށް ނަޝީދު ވިދާޅުވިއެވެ.

"އަޅުގަނޑުމެން ސިޔާސީ ލީޑަރުންގެ ގޮޮތުގައި، ސިޔާސީ ޕާޓީތައް އުފައްދައިގެން ތިބި މީހުންގެ ގޮތުގައި އަޅުގަނޑުމެން ފެލެނީ ނަމަ، ބުނަނީ ނަމަ، އަޅުގަނޑުމެންގެ މަސްއޫލިއްޔަތެއް އަޅުގަނޑުމެންގެ ވާޖިބެއް އެބަ އޮތް. އަޅުގަނޑުވެސް ގޮތްދޫކުރުން. ޕީޕީއެމް ޕީއެންސީ ވެސް އެހެން ޕާޓީތައްވެސް ގޮތް ދޫކުރުން." ނަޝީދު ވިދާޅުވިއެވެ.

މިއާއިއެކު ގޮތްދޫކޮށް މޭޒެއްގެ ދަށުގައި އިށީނދެ އެހެން ވާދަވެރި ޕާޓީތަކާއި އެކީގައި މަޝްވަރާކޮށް ރާއްޖޭގެ ރައްޔިތުންނަށް އެންމެ ބޭނުންވާ ގޮތް ހޯދޭނެ ކަމަށް ރައީސް ނަޝީދު ވިދާޅުވިއެވެ.

އަދި ރައީސް ޔާމީނަށް މުުޚާތަބު ކުރައްވާ އެމަނިކުފާނު ޖަލުގައި ހުންނެވުމަކީ ރުހޭ ކަމެއް ނޫން ކަމަށް ފާހަގަކުރައްވާ ނަޝީދު ވަނީ ޚިދުމަތްތެރި ބޭފުޅެއްގެ ގޮތުގައި ރައީސް ޔާމިން ސިފަކުރައްވާފައެވެ.

އަދި ރިޔާސީ އިންތިޚާބުގައި ދެމީހުންވެސް ކުރިމަތިނުލައި އެކުގައި މަސައްކަތް ކުރުމަށް ގޮވާލައްވާފައެވެ.

"އަޅުގަނޑަށް ފެންނަ ފެނުމުގައި މިރިޔާސީ އިންތިޚާބަށް އަޅުގަނޑުމެން ދެމީހުންވެސް ކުރިމަތިނުލާ، އަޅުގަނޑުމެން ދެމީހުން އެކުގައި ބާރަށް މަސައްކަތް ކޮށްގެން ރާއްޖޭގެ ރައްޔިތުން މިއެދޭ ގޮތް އަޅުގަނޑޫމެން ހޯދައިދޭންވީ." ނަޝީދުގެ ވާހަކަފުޅު ނިންމާލަމުން ވިދާޅުވިއެވެ.