އެމްއެންޑީއެފް އާއި ރ. އިނގުރައިދޫ ކައުންސިލުން އިންތިޒާމް ކޮށްގެން އެރަށުގައި މޫދު ކަސްރަތު ޕްރޮގްރާމެއް ފަށައިފިއެވެ.

"އެންމެން އެކުގައި ކަސްރަތަށް" ޕްރޮގްރާމް ކުރިއަށް ގެންދިޔުމަށް ހަމަޖެހިފައިވަނީ އެރަށުގެ ކުޑަ ތުނޑީގައި މި މަހު 6 ކުން 14 އަށް ދުވާލަކު ދެ ސެޝަނަކަށް ބަހާލައިގެންނެވެ.

އެގޮތުން ކޮންމެ ދުވަހަކު ހެނދުނު 5:45 ކުން 8:30 އަށް އަދި ހަވީރު 4:30 އިން 6:00 ކަށް މޫދު ކަސްރަތު ޕްރޮގްރާމް ކުރިއަށް ގެންދިޔުމަށް ވަނީ ހަމަޖެހިފައެވެ.

Advertisement

މިއާއިއެކު ޕްރޮގްރާމް ފެށުމުގެ ގޮތުން މައުލޫމާތު ދިނުމުގެ ސެޝަންއެއް ރޭ ވަނީ ބާއްވާފައެވެ.

މޫދު ކަސްރަތު ޕްރޮގްރާމާއި ގުޅޭ ގޮތުން "ވޮއިސް" އަށް މައުލޫމާތު ދެއްވަމުން އެރަށު ކައުންސިލްގެ ރައީސް މުހައްމަދު ޖަލީލް ވިދާޅުވީ މި ޕްރޮގްރާމަކީ ބައިވެރިވާން ތިބި އެންމެނަށް ހުޅުވާލައިގެން ކުރިއަށް ގެންދާ ޕްރޮގަރާމެއް ކަމަށެވެ.

އަދި މިފަދަ ޕްރޮގްރާމެއް ކުރިއަށް ގެންދިޔުމުގެ މަގުސަދަކީ ދުޅަހެޔޮ ސިއްހަތު ހުރި ރައްޔިތުންތަކެއް ބައްޓަން ކުރުން ކަމުގައި ވެސް ޖަލީލު ވިދާޅުވިއެވެ.

މިއާއިއެކު މި ޕްރޮގްރާމް ފަށާފައިވަނީ އެމްއެންޑީއެފްއާއި ގުޅިގެން ސިލްސިލާކޮށް ކޮންމެ އަހަރަކުވެސް ބޭއްވުމަށް ނިންމައިގެން ކަމަށް ޖަލީލު ވަނީ ފާހަގަކޮށްފައެވެ.

އިނގުރައިދޫގައި މި ޕްރޮގްރާމް އެންމެ ފުރަތަމަ ކުރިއަށް ގެންގޮސްފައިވަނީ 2018 ވަނަ އަހަރުގެ ޑިސެންބަރު މަހުގައެވެ.