ތިލަމާލެ ބްރިޖްގެ މަސައްކަތުގައި ދުނިޔޭގެ އެންމެ އުސް ޕްރީކާސްޓް ސެގްމެންޓްތައް ބޭނުން ކުރެވިގެން ދާނެ ކަމަށް ރާއްޖޭގައި ހުންނަ އިންޑިއާ ހައި ކޮމިޝަނުން ބުނެފިއެވެ.

އެގޮތުން މި މަޝްރޫޢާއި ގުޅިގެން މިއަދު ކޮށްފައިވާ ޓްވީޓެއްގައި އެކޮމިޝަނުން ބުނެފައިވަނީ މި ސެގްމެންޓްތަކުގައި 8.177 މީޓާރުގެ އުސްމިން ހުންނާނެ ކަމަށެވެ.

އަދި މި ސެގްމެންޓްތައް ހެދުމުގެ މަސައްކަތް ކުރިއަށް ދަނީ ގުޅިފަޅުގައިކަމަށް ވެސް ކޮމިޝަނުން ވަނީ ބުނެފައެވެ.

Advertisement

މިއާއިއެކު މާލެ، ވިލިމާލެ، ގުޅީފަޅު އަދި ތިލަފުށި ގުޅުވާލުމަށް އެޅިގެންދާ މި ބްރިޖްގައި 3 ކޯސްވޭ އާއި ދިގުމިނުގައި 6695 މީޓަރުގެ ދިގު މިން ހުންނާނެ ކަމަށް ވެސް އިންޑިއާ ހައި ކޮމިޝަނުން ވަނީ ބުނެފައެވެ.

ތިލަ މާލެ ބްރިޖުގެ މަޝްރޫއަކީ މި ސަރުކާރުން މިހާތަނަށް އިއުލާނުކުރި އެންމެ ބިޔަ މަޝްރޫއެވެ. އެ މަޝްރޫއު ކުރިއަށް ގެންދަނީ އިންޑިއާގެ އެފްކޯންސް ކުންފުންޏާއި ހަވާލުކޮށްގެން ނެވެ. 

ތިލަމާލެ ބްރިޖު އަޅަނީ އިންޑިއާގެ 100 މިލިއަން ޑޮލަރުގެ ހިލޭ އެހީއާއި 400 މިލިއަން ޑޮލަރުގެ ލޯނު ފައިސާއިން ނެވެ. 

ދާދިފަހުން ރައީސުލްޖުމްހޫރިއްޔާ އިބްރާޙިމް މުހައްމަދު ޞާލިހު ވަނީ ތިލަމާލެ ބްރިޖުގެ މަސައްކަތް ނިންމާ އަންނަ އަހަރު ބޭނުން ކުރަން ފެށޭނެކަމަށް ވިދާޅުވެފައެވެ.