ރައްޔިތުން މަޖިލީހުގެ ރައީސް މުހައްމަދު ނަޝީދަށް ތާއީދު ކުރައްވާ ބޭފުޅުންތަކެއް އިސްވެ އުފެއްދެވި 'ދަ ޑިމޮކްރެޓސް' ޕާޓީގެ ހަރުގެ ރަސްމީކޮށް ހުޅުވައިފިއެވެ.

ވެރިކަންކުރާ ޕާޓީ އެމްޑީޕީގެ ކުރީގެ ހަރުގެ ކަމަށްވާ ހ. ވެޔޮވިލާއަށް 'ހައުސް އޮފް ޑިމޮކްރެޓްސް' ގެ ނަން ދީ މިރޭ ހަރުގެ ރަސްމީކޮށްހުޅުއްވާ ދެއްވާފައިވަނީ އެމްޑީޕީގެ ކުރީގެ ރައީސް ނަޝީދެވެ.

މިއާއިއެކު އެމަނިކުފާނު ވަނީ ހަރުގެ ހުޅުވުމުގެ ރަސްމިއްޔާތަށް ވަޑައިގެން ތިއްބެވި ޕާޓީގެ އިސް ބޭފުޅުންނާއި އާންމު މެމްބަރުންނަށް މުޚާތަބުކޮށް ވާހަކަދައްކަވާފައެވެ. 

ރައީސް ނަޝީދު އަދި އެޕާޓީއަށް ރަސްމީކޮށް ސޮއިކުރައްވާފައިނެތް ނަމަވެސް ޕާޓީގެ މަޝްވަރާ ބައްދަލުވުންތަކުގައި އެމަނިކުފާނު އަންނަނީ ބައިވެރިވެ ވަޑައިގަންނަވަމުންނެވެ.

މިދިޔަ ހަފްތާގައި ދަ ޑިމޮކްރެޓްސް އިން ވަނީ ޕާޓީ އުފެއްދުމަށް ބާއްވާ ބައްދަލުވުން ބާއްވާފައެވެ. އެގޮތުން ޕާޓީގެ މުއައްސިސް ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވިދާޅުވެފައިވަނީ މި ބައްދަލުވުމުގައި ބައިވެރިވި މެމްބަރުންގެ އަދަދު 500 އިން މައްޗަށް އަރާކަމަށެވެ. 

ހަސަން ލަތީފު ވަނީ އެ ޕާޓީގެ ވަގުތީ ޗެއާޕާސަންގެ ގޮތުގައި ހަމަޖައްސާފައެވެ. އަދި ޕާޓީގެ ވަގުތީ ޗެއާޕަސަންގެ ނައިބުންނަކީ ނ.އަތޮޅު ކައުންސިލްގެ ރައީސް މުހައްމަދު ބަޝީރު، އެންވަޔަރްމެންޓް މިނިސްޓްރީގެ ކުރީގެ ޑެޕިއުޓީ މިނިސްޓަރު މުހައްމަދު އަންސަރު އަދި އެލްޖީއޭގެ ކުރީގެ ސީއީއޯ އަފްޝަން ލަތީފެވެ.

އިއްޔެ ދަ ޑިމޮކްރެޓްސް އިން ވަނީ ރަޖިސްޓްރީވުމަށް ހުށަހަޅާފައެވެ.