ކުރީގެ ޓޫރިޒަމް މިނިސްޓަރު ޢަލީ ވަހީދު، މިއަދު ރާއްޖެ އަންނަގޮތަށް ހަމަޖެހިއްޖެއެވެ. 

މައުލޫމާތު ލިބިފައިވާ ގޮތުގައި އަލީވަހީދު ރާއްޖެ އަންނަނީ މިއަދުގެ މެންދުރު ގާތް ގަޑަކަށް 1:15 ހާއިރުއެވެ. ރާއްޖެ ވަޑައިގެންނެވުމަށްފަހު ނޫސްވެރިންނާއިވެސް އޭނާ ބައްދަލުކުރާނެ ކަމަށް މައުލޫމާތު ލިބެއެވެ. 

ބޭސްފަރުވާއަށްކަމަށް ވިދާޅުވެ 2021ވަނަ އަހަރުގެ ފެބްރިއަރީ މަހުގެ 21 ވަނަދުވަހު އަލީ ވަހީދު ރާއްޖެއިން ބޭރަށް ފުރީ އޭނާގެ މައްޗަށް ދައުލަތުން 7 ދައުވާއެއް އުފުލާފައިވަނިކޮށެވެ. އެއަށްފަހު އޭނާ ހުރީ އިނގިރޭސި ވިލާތުގައެވެ. 

އަލީ ވަހީދުގެ ރާއްޖެ އަންނަން ހަމަޖެހިފައި މިވަނީ، އޭނާގެ މައްޗަށް ކުރި ޖިންސީ ކުށުގެ ދައުވާތައް ސާބިތުކުރަން ބޭނުންވާ ހެކި ލިބޭނެ ގޮތެއް ނެތް ކަމަށް ބަލައި އެ ދައުވާތައް ޕީޖީ އޮފީހުން އަނބުރާ ގެންގޮސްފައިވާ ދަނޑިވަޅެއްގައި ކަން ފާހަގަކޮށްލަންޖެހެއެވެ. 

ޓޫރިޒަމް މިނިސްޓްރީގެ އަންހެން މުވައްޒަފުންތަކަކަށް ޖިންސީ ގޯނާކުރުމާއި ޖިންސީ އަނިޔާ ދިނުމާއި ރޭޕްކުރަން އުޅުމާއި ބޭއަދަބީ ގޮތުގައި ޖިންސީ ގުނަވަން ހާމަކުރުމާއި ހުއްދަ ނޫން ޖިންސީ މުއާމަލާތެއް ހިންގުމުގެ ދައުވާ އުފުލާފައިވަނީ 18 ނޮވެމްބަރު 2020 ގައެވެ. 

އެ ދައުވާތައް ކުރިއަށްދަނިކޮށް އޭނާރާއްޖެއިން ފުރައިގެން ދިޔުމާއި ގުޅިގެން ކޯޓަށް ހާޒިރު ނުކުރެވި، އެ މައްސަލަ ކޯޓުގައި އޮތީ ކުރިއަށް ނުގެންދެވިއެވެ. އެހެން ކަމުން މިދިޔަ އަހަރުގެ ނޮވެންބަރު މަހުގެ 22 ވަނަ ދުވަހު ކޯޓުން ވަނީ އެ މައްސަލަ އަނބުރާ ޕީޖީ އޮފީހަށް ފޮނުވާފައެވެ. އެގޮތުން އެ މައްސަލަ ޕީޖީ އޮފީހަށް ފޮނުވީ، އަލީ ވަހީދު ކޯޓަށް ހާޒިރުކުރެވޭނެ ގޮތެއް ވުމުން އަލުން މައްސަލަ ހުށަހެޅުމަށެވެ. އެހެންވެ އަލީ ވަހީދު ރާއްޖެއަށް އައުމުން އަލުން ހުށަހަޅަން ބުނެ އެ މައްސަލަ އޮކްޓޫބަރު 6 2022 ގައި ޕީޖީ އޮފީހުން އަލުން ފުލުސް އޮފީހަށް ފޮނުވީ އެވެ.

އެކަމާއި ގުޅިގެން ޕީޖީ އޮފީހުން ނެރުނު ނޫސް ބަޔާނެއްގައި ބުނީ، ދައުވާތައް އަނބުރާ ގެންދަން ނިންމީ، އަލީ ވަހީދުގެ ފަރާތުން އަނިޔާ ލިބުނު ކަމަށް ބުނެ ކުރިން ބަޔާންދިން މީހުންނާއި އަލީ ވަހީދާ ދެކޮޅަށް ހެކިބަސް ދޭން ބަޔާން ދިން މީހުން މި މައްސަލަ އިތުރަށް ކުރިއަށް ގެންދަން ބޭނުން ނުވާ ކަމަށާއި ބަޔާންތައް އަނބުރާ ގެންދަން އެދި ފުލުހުންނަށް ތަކުރާރުކޮށް ސިޓީ ފޮނުވަމުން އަންނަ ކަމަށް ބުނެ، އެ މައްސަލަ އަލުން މުރާޖައާކޮށްދޭން ފުލުހުން އެދުނު އެދުމުން ކަމަށެވެ. 

“މައްސަލާގައި އަނިޔާ ލިބުނު މީހުންނާއި ހެކިން މި އޮފީހަށާއި ދިވެހި ފުލުހުންގެ ހިދުމަތަށް ފޮނުވަމުން ދިޔަ ސިޓީތަކާ ގުޅިގެން މި އޮފީހުން ވާނީ އެ މީހުންނާ ބައްދަލުކޮށް، މައްސަލަ ކުރިއަށްގެންދިއުމާ ގުޅޭ ގޮތުން ދެކޭ ގޮތް ސާފުކޮށްފަ އެވެ.” ޕީޖީގެ ބަޔާނުގައިވެ އެވެ.

ޕީޖީ އޮފީހުން ބުނީ އެ މީހުންގެ ހެކިބަހާނުލައި މައްސަލަ ކުރިއަށް ގެންދިއުމުގެ ފުރުސަތު އޮތްތޯ ބަލައި ދިރާސާކުރި އިރު، މައްސަލައިގެ މައިގަނޑު ހެއްކަކީ އަނިޔާ ލިބުނު މީހުންނާއި ހެކިންގެ ހެކިބަސް ކަމަށް ވާތީ އެ ހެކިންގެ ހެކިބަހާ ނުލައި މައްސަލަ ސާބިތުކުރެވިދާނެ އެއްވެސް މަގެއް ނެތުމުން ދައުވާތައް ކުރިއަށް ނުގެންދިއުމަށް ނިންމައި، މައްސަލަ އަނބުރާ ގެންދިޔައީ އެވެ.