އެމްއެމްޕީއާރުސީގެ ޚިޔާނާތުގެ ކުށް ސާބިތުވެފައިވާ ކުރީގެ ނައިބު ރައީސް އަހުމަދު އަދީބު ބޭސްފަރުވާއަށް ރާއްޖެއިން ބޭރަށް ދާން މޯލްޑިވްސް ކަރެކްޝަނަލް ސާވިސްއިން ހުއްދަދީފި އެވެ.
އެކަން އަދީބުގެ އާއިލާއިން ވަނީ "ވޮއިސް" އަށް ކަށަވަރުކޮށްދީފަ އެވެ.
އަދީބުގެ ސިއްހީ ހާލުކޮޅު ގޯސްވެ މީގެ ކުޑަ ދުވަސްކޮޅެއް ކުރިން ވަނީ ހޮސްޕިޓަލުގައި އެޑްމިޓްކޮށްގެން ފަރުވާދީފަ އެވެ.
އެގޮތުން 24 ގަޑިއިރު ފަރުވާދިނުމަށްފަހު އަދީބު އަލުން ގެއަށް ބަދަލުކޮށްފައިވާކަމަށް ކަރެންޝަންސްއިން ވަނީ ބުނެފައެވެ.
އަދީބު ފަރުވާ ހޯދާފައިވަނީ ނުރައްކާތެރި ބައްޔަކަށް ކަމަށާއި، އެއީ ރާއްޖެއިން ފަރުވާ ކުރެވެން ނެތް ބައެއްކަމަށް އަދީބުގެ ސިޔާސީ ޕާޓީއަށް ނިސްބަތްވާ ބައެއް މުއައްސިސުން ވަނީ ސޯޝަލް މީޑިއާގައި ހާމަކޮށްފަ އެވެ.
އަދީބުގެ ބައްޔާއި ގުޅޭގޮތުން މޯލްޑިވްސް ތާޑްވޭ ޑިމޮކްރޭޓްސްއިން ބުނެފައިވަނީ އަދީބަށް ޖެހިފައިވަނީ ނާރުގެ ނިޒާމަށް އަސަރުކުރާ ފުރާނައަށް ނުރައްކާތެރި ބައްޔެއް ކަމަށެވެ. ބަލި ޖެހިފައިވަނީ ކުރީ ސަރުކާރުގައި އަދީބު ޖަލުގައި ހުންނެވި ދުވަސްވަރު ކަމަށް ވެސް ބުނެފައިވެ އެވެ.
އަދީބު ބޭސްފަރުވާއަށް ދިއުމަށް ކަރެކްޝަންސްއިން ހުއްދަދީފައިވާއިރު، އޭނާ ވަޑައިގަންނަވަނީ ސިންގަޕޫރަށެވެ.
އަދީބު ރާއްޖެއިން ބޭރަށް ފުރުވާލުމަށް ހުއްދަދީފައިވާ މި ދަނޑިވަޅަކީ ރިޔާސީ އިންތިޚާބު ބޯމަތިވެފައިވާ ދަނޑިވަޅެއް ކަމަށްވެފައި، ސަރުކާރުގެ ވާދަވެރި ސިޔާސީ ލީޑަރު ރައީސް އަބްދުالله ޔާމީން އަބްދުލްގައްޔޫމާއި ދެކޮޅަށް ދައުލަތުން ރ ފުއްގިރި ކުއްޔަށް ދޫކުރުމުގެ މުއާމަލާތާއި ގުޅުވާ އުފުލި ދައުވާ ސާބިތުކޮށްދިނުމަށް އަދީބުގެ ހެކިބަސް ދީފައިވާ ވަގުތާއިވެސް އިއްތިފާގު ވާނީ އިދިކޮޅުން ގެންދަނީ ބޮޑެތި ތުހުމަތުތަކެއް ކުރަމުންނެވެ.
އެގޮތުން އަދީބު ފުރުވާލުމަކީ ސަރުކާރުން ހަދާފައިވާ ޑީލެއް ކަމަށާއި، އެ ޑީލު ހެދީ ރައީސް ޔާމިނާއި ދެކޮޅަށް ހެކިބަސް ދިނުމުގެ ބަދަލެއްގެ ގޮތުން ކަމަށް ވެސް އިދިކޮޅުން ވަނީ ތުހުމަތުކޮށްފަ އެވެ.
ފުއްގިރި މައްސަލައިގައި ދައުލަތުން ފާހަގަކޮށްފައިވާ ކަންކަމަށް ބަލާއިރު، އަދީބާއި އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު އަބްދުالله ޒިޔަތުގެ ހެކިބަސް ނޫން އިތުރު ކާފީ ހެއްކެއް ނެތްކަމަށް ދައުލަތުން ވަނީ ކޯޓުގައި ބުނެފަ އެވެ.
އެހެންކަމުން މިހާލަތުގައި އަދީބުގެ ހެކިބަހާއި ނުލާ އެ މައްސަލަ ކުރިއަށް ނުގެންދެވޭނެތީ، އަދީބު ފުރުވާކަން ހުއްދަދިނުމަށް ދައުލަތަށް މަޖުބޫރުވެފައިވާކަމަށް ވެސް އިދިކޮޅުން ވަނީ މީގެ ކުރިން ތުހުމަތުކޮށްފަ އެވެ.
އަދީބަކީ އޭނާގެ ޖަލު ހުކުމް ގޭ ބަންދަށް ބަދަލުކުރިތާ ކުޑަ ދުވަސްކޮޅެއްގެ ތެރޭގައި ޓަގު ބޯޓެއްގައި ފިލައިގެން ރާއްޖެއިން ބޭރަށް ދިއުމަށް ވެސް މަސައްކަތް ކުރި ފަރާތެއްކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
