ވަކި ވަރަކަށް އެކައުންޓުގައި ލާރި ހުރި މީހަކަށް ވިއްޔާ މާދަމާ ވެސް ފުޓްބޯލް އެސޯސިއޭޝަން އޮފް ދަ މޯލްޑިވްސް (އެފްއޭއެމް) ގެ ރައީސްކަމަށް އާދެވިދާނެކަމަށް ކުރީގެ ޓުއަރިޒަމް މިނިސްޓަރު އަލީ ވަހީދު ބުނެފި އެވެ. 

ޖިންސީ ފުރައްސާރައިގެ ސީރިއެސް ތުހުމަތުތަކެއް ކުރެވިފައި ވަނިކޮށް ރާއްޖެއިން ފުރައިގެން އިނގިރޭސި ވިލާތުގައި 3 އަހަރާއި 3 މަސް ހުންނެވުމަށްފަހު މާލެ ވަޑައިގެން ނޫސްވެރިންނާއި ބައްދަލުކުރައްވާ އަލީ ވަހީދު ބުނީ އޭނާ އަނބުރާ ރާއްޖެ އައީ "ފުޓު ބޯޅަ މީހެއް" ގެ ގޮތުގައި ކަމަށެވެ. 

ރާއްޖޭގެ ފުޓު ބޯޅަ ކުރިއެރުވުމަށް އޭނާގެ ވިސްނުން އޮތް ކަމަށާއި، ވަރަށް އަވަހަށް އެ ވިސްނުންފުޅު ރައްޔިތުންނާއި ހިއްސާކުރާނެކަމަށް އަލީ ވަހީދު ބުންޏެވެ. 

އަލީ ވަހީދުގެ އެ ވާހަކަތަކާއި ގުޅިގެން ނޫސްވެރިއަކު ވަނީ އެފްއޭއެމްގެ ރައީސްއާއި ދޭތެރޭ ގިނަ ބައެއްގެ ނުރުހުން ފާޅުކުރަމުން އަންނަ މި ދަނޑިވަޅުގައި އަލީ ވަހީދު އެމްއޭއެމާއި ހަވާލުވުމުގެ ޝައުގުވެރިކަމެއް އޮތް ތޯ ސުވާލުކޮށްފަ އެވެ. 

އެ ސުވާލަށް ޖަވާބުދެމުން އަލީ ވަހީދު ބުނީ ފުޓުބޯޅަ ކުރިއެރުވުމަކީ މިހާރު އޭނާ އެންމެ ޝައުގުވެރިވާ މަސައްކަތް ކަމަށެވެ. އަދި އެ މަސައްކަތް ކުރުމަށް އެއްވެސް މަޤާމެއް ބޭނުން ނުވާ ކަމަށެވެ. 

އެމްއޭއެމްގެ ރައީސްކަމަކީ ހޯދަން އުނދަގޫ މަގާމެއް ވެސް ނޫން ކަމަށާއި، ވަކިވަރަކަށް ލާރި ހުރިއްޔާ މާދަން ވެސް އެ މަގާމު ލިބިދާނެކަމަށް އަލީ  ވަހީދު ބުންޏެވެ. 

އަލީ ވަހީދު ބުނީ މިހާރު އޭނާގެ ޝައުގުވެރިކަން ހުރީ ކްލަބު ފުޓުބޯޅައާއަށް ވަނުމަށް ކަމަށެވެ. 

އަލީ ވަހީދު ބުނީ މިހާރު އެފްއޭއެމްގެ ހުރި ރައީސް މަގާމުން ވަކިކުރުމުން އެފްއޭއެމްގައި ހުރި މައްސަލަތަކަށް އަދި ހައްލު ލިބިގެންދާނެކަމަށް ވެސް ގަބޫލު ނުކުރައްވާކަމަށެވެ. 

އެހެން ނަމަވެސް އެފްއޭއެމްގެ ހިންގުން ހަރުދަނާ ކުރެވިއްޖެ ނަމަ އަވައްޓެރި ގައުމުތަކުގައި ބާއްވާ ފެންވަރަށްވުރެ ފުރިހަމަ މުބާރާތްތައް ރާއްޖޭގައި ވެސް ބޭއްވޭނެ ކަމަށާއި، އަދި ކުޅުންތެރިން ބިނާކޮށް ފުޓުބޯޅައިން ރާއްޖެއަށް ކާމިޔާބީތަކެއް ހޯދިދާނެކަމަށް އަލީ ވަހީދު ބުންޏެވެ.