މި ސަރުކާރުން ކުނި މެނޭޖުކުރުމަށް 32 ރަށުގައި މަޝްރޫއުތައް ހިންގުމުގެ ނަމުގައި ގްރީން ފަންޑުން 30 މިލިއަންގެ ކޮރަޕްޝަނެއް ހިންގާފައިވާކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑާ) ތުހުމަތު ކުރައްވައިފި އެވެ. 

ކ މާފުއްޓަށް ދިމާވެފައިވާ ކުނީގެ މައްސަލަ ފެނިގެންދާ ވީޑިއޯއެއް ހިއްސާކުރައްވާ ބޮންޑާ ކުރެއްވި ޓްވީޓެއްގައި ވިދާޅުވީ މާފުށި ކުންޏާއި ވަސީލަތްތައް މެނޭޖުކުރާ މަރުކަޒު އަޕްގްރޭޑްކުރުމުގެ މަސައްކަތުގެ ނަމުގައި ގުރީންފަންޑުގެ ތެރޭން ދައުލުތަގެ ބަޖެޓުން އެތަކެއް މިލިއަން ރުފިޔާއެއް މިސަރުކާރުން ނަގާފައިވާއިރު އެ މަސައްކަތް ކުރަމުން ނުދާކަމަށެވެ. 

ބޮންޑާ ހިއްސާކުރެއްވި އެ ވިޑީއޯގައި ކުނި އުކާލާނެ ނިޒާމެއް ނެތުމުގެ ސަބަބުން ކުނި މެނޭޖު ނުކުރެވި ބޮޑު ސަރަހައްދަކަށް ކުނި އަޅާ ފެންހެދިފައިވާ ތަން ފެނިގެން ދެއެވެ. 

Advertisement

ބޮންޑާ ވިދާޅުވީ މާފުށީގެ އިތުރުން ވެސް ޒޯނު ތިނެއްގައި ހިމެނޭ ކ. އއ. އދ. ވ. މި ހަތަރު އަތޮޅުގައި ހިމެނޭ 32 ރަށުގެ ކުނި މެނޭޖްކުރުމުގެނަމުގައި ގުރީންޓެކްސް ގޮތުގައި މީރާއަށް ރައްޔިތުން ދައްކާ ފައިސާ މި ސަރުކާރުން ގުރީންފަންޑަށް ޖަމާކޮށްގެން 30,840,000.00 ރުފިޔާ ހިމެނޭ ބޮޑު ކޮރަޕްޝަނެއް ހިންގާފައިވާ ކަމަށެވެ. 

އެކަން ކަން ފާހަގަކުރައްވާ ބޮންޑާ ވަނީ ގްރީން ފަންޑުން ސަރުކާރުން ހިންގަމުންދާ ކޮރަޕްޝަން ބެލުމަށް ކޮރަޕްޝަނާއި ގުޅުންހުރި މައްސަލަތައް ބެލުމަށް އޮންނަ އެންޓި ކޮރަޕްޝަން ކޮމިޝަނަށް ގޮވާލައްވާފަ އެވެ.